Македонија
Грковска – Вуцас: Австрија е силен поддржувач на евроинтеграцискиот процес на Северна Македонија
Република Северна Македонија ги почнува пристапните преговори за членство во Европската Унија и за таа цел добредојдена е секоја поддршка и искуство од нашите сојузници, кои веќе се дел од европското семејство, нагласи заменичката на претседателот на Владата задолжена за политики за добро владеење, Славица Грковска, на денешната средба со Георг Вуцас, амбасадор на Австрија во државата.
Вицепремиерката Грковска се заблагодари за досегашната поддршка што Австрија ѝ ја дава на Северна Македонија како на евроинтеграцискиот пат така и во реформските процеси. Таа го запозна амбасаорот Вуцас со основните столбови на кои се фокусира нејзината работа, а тоа е дигиталната трансформација на општеството, создавање професионални, одговорни и отчетни функции, како и креирање антикорупциски политики.
Амбасадорот Вуцас нагласи дека Австрија е силен поддржувач на евроинтеграцискиот пат на Северна Македонија, а доброто владеење и превенирањето на корупцијата се темел на овој процес. Антикорупциските политики и превенирањето на корупцијата, додаде тој, е суштинска вредност за тоа како функционира целото општество.
Амбасадорот Вуцас нагласи дека Австрија е подготвена да ѝ помага на нашата држава во градењето ефективни и трајни политики на добро владеење.
Двајцата соговорници се согласија да ја продлабочат меѓусебната соработка и да организираат размена на искуства и техничка поддршка помеѓу релевантните фактори од Северна Македонија и од Австрија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Фото) ВРЕДИ: 100 дена на нови политики и борба против старите навики
Денеска Коалицијата ВРЕДИ со слоганот “Преминуваме на дела“ први од Владината коалиција ги одбележаа 100-те дена на новата Влада, на настан на кој учествуваа лидерите, министрите, заменик-министрите, пратениците и останати вршители на високи должности и активисти.
Во својство на модератор, Заменикот премиер за добро владеење и транспарентност, Арбен Фетаи, ги истакна значајните достигнувања на коалицијата, вклучувајќи ги распределбата на 100 милиони евра за општините, зголемувањето на пензиите, борбата против коцкањето, создавањето 600 нови работни места за медицински специјализанти, како и формирањето на Албанската академија.
„ВРЕДИ не е само алтернатива на ДУИ, туку е канализиран револт што има за цел да донесе посакувани промени за Албанците. Ова е можност дадена од народот, и ние ќе ја одржиме оваа доверба со чест и одговорност,“ изјави Фетаи.
Претседателот на Алтернатива, Зеќирија Ибрахими, потенцираше дека ВРЕДИ направи значителна разлика за овие 100 дена.
„Оние што не постигнаа ништо за 22 години, ние направивме разлика само за 100 дена,“ рече тој.
Приоритетите на ВРЕДИ за иднината вклучуваат реформи во јавната администрација, енергетска транзиција и развој на човечки капитал. Исто така, Ибрахими ја објасни потребата од иницијативата за формирањето Албанската академија на науките како неопходен чекор за интегрирање на албанските интелектуалци и научната мисла.
Претседателот на Демократското движење и прв заменик-премиер, Изет Меџити, изјави дека ВРЕДИ претставува нов квалитет во политичкото претставување на Албанците.
„Ние сме лидери во Владата, а не во партиските канцеларии. Времето кога лидерите стоеја настрана од одговорноста за владините политики заврши. Сега, секој ден сме во нашите канцеларии, решавајќи ги проблемите на граѓаните,“ изјави тој.
Претседателот на Алијансата за Албанците и министер за здравство, Арбен Таравари, кој се вклучи преку видео врска од САД, истакна дека албанските граѓани конечно се ослободени од 22-годишната власт.
„Градиме иднина каде што моќта е во рацете на народот, а не во џебовите на корумпираните,“ рече Таравари, додавајќи дека Министерството за здравство сега функционира во служба на граѓаните, далеку од корупцијата.
Претседателот на Движењето БЕСА и градоначалник на Тетово, Билал Касами, ја критикуваше ДУИ за нејзините неуспеси, особено во областа на
децентрализацијата.
„ВРЕДИ е тука за да ги исправи неправдите и да обезбеди дека албанските општини ќе имаат вистинска децентрализација, а не празни ветувања,“ рече тој.
Говорниците потенцираа дека следува институционална борба за санкционирање на сите девијантни појави на минатата Влада и остануваат цврсто посветени на изградба на посветла иднина за сите Албанци во оваа земја, со чесен пристап, транспарентност и доследност кон исполнување на предизборните ветувања.
Македонија
ДУИ: Одлуката на ЕУ да ја одвои Албанија од Македонија е најголемиот неуспех за владата
Демократската унија за интеграција смета дека губитниците на претседателските и парламентарните избори од Влен секојдневно не оддалечуваат од интеграцијата во Европската унија и ја приближуваат државата до стратешко партнерство и финансиска зависност од Кина и Русија.
„Одлуката на Европската унија да ја одвои Албанија од Северна Македонија во нашиот европски пат е најголемиот неуспех за владата со моноетнички легитимитет.
Ги потсетуваме граѓаните дека албанските партии кои ги загубија изборите потпишаа предизборна декларација и ветија дека никогаш нема да станат дел од влада без промена на уставот и деблокирање на европскиот пат на земјата.
Ветија и дека за три до шест месеци ќе го сменат уставот, во спротивно ќе излезат од владата.
Но, повторно ги излажаа и ги измамија граѓаните.
За само 100 дена ја оддалечија земјата од Европа, предизвикаа непријателства со Грција, Бугарија, Косово и Албанија, а притоа ја доближија до Србија, Унгарија, Русија и Кина.
ДУИ останува цврсто определени да продолжи да биде гардиан на нашето евро-американско партнерство и по ниедна цена нема да дозволи промена на западниот курс на државата“ се наведува во соопштeнието на ДУИ.
Македонија
АХВ: Водата во Струмица не е безбедна за употреба поради зголемено присуство на манган и колиформни бактерии
Инспектор за храна на Агенцијата за храна и ветеринарство (АХВ) донесе решение со кое ја забрани за употреба водата од струмичкиот водоснабдителен систем.
Како што денеска соопштија од АХВ, решението е донесено врз основа на добиено известување од струмичкото јавно претпријатие „Комуналец“ и од Центарот за јавно здравје – Струмица, дека по извршените лабораториски тестирања утврдено е дека водата во струмичкиот водоснабдителен систем не е безбедна за употреба поради утврдено зголемено присуство на манган и колиформни бактерии.
„На јавното претпријатие, наложено му е да го информира месното население да не ја користи за пиење водата од градскиот водовод, односно, да обезбеди питка вода за граѓаните, се до обезбедување на безбедна вода во градскиот водоснабдителен систем“, соопштија од АХВ.
Што се колиформни бактерии?
Колиформните бактерии често се сметаат за показател дека може да има нешто посериозно што го загадува системот за вода за пиење, конкретно бактеријата Eшерихија коли. Колиформните бактерии се безбојни, без мирис и вкус и единствениот начин да се детектираат во водата за пиење е преку поднесување примерок за лабораториско испитување.
Бактериска контаминација може да произлезе од повеќе извори. Овие извори вклучуваат површинско истекување кое содржи животински отпад од кучиња или други локации каде што е натрупан животински отпад. Човечкиот отпад, исто така, може да биде извор на бактериска контаминација, најчесто од неисправен систем за отпадна вода на лице место, како што се станбени септички јами. Дополнителни извори на контаминација вклучуваат инсекти, глодари или други животни.