Македонија
Стоилковски: Битолски „Стентон” и тетовски изведувач со единствена понуда на тендер на Бочварски и Рустеми

Во Македонија нема заинтересирани градежни компании за расчистување на одронот на автопатот Миладиновци – Штип, па работата ја добива единствениот понудувач за неверојатни 767 илјади евра, нормално, компанија блиска до СДСМ, изјави на прес-конференција портпаролот на ВМРО-ДПМНЕ, Наум Стоилковски.
„Очигледно, единствен критериум за избор на тендер на општини, ЈП и компании предводени од СДСМ/ДУИ е единствен понудувач. Единствениот понудувач, веројатно, бил критериумот за Благој Бочварски од СДСМ и директорот на ‘Државни патишта’, Ејуп Рустеми, од ДУИ да ја изберат фирмата блиска на кандидатот на СДСМ за градоначалник за Битола, ‘Стентон градба’, за расчистување на одронот што повеќе од половина година стои на автопатот Миладовци – Штип и зафаќа две од трите коловозни ленти. Притоа понудата на ‘Стентон’, односно сега договорот е групна, а како изведувач е наведена компанија за градежништво, транспорт, угостителство и услуги ‘Урбан план констракшн’ од Тетово.
Повторувам, единствен понудувач на тендер, јавен повик за градежни компании, за расчистување на одроните што повеќе од половина година стојат на автопат и се вози по само една коловозна лента.
Според документите, на огласот распишан од ‘Државни патишта’, водена од Ејуп Рустеми од ДУИ, во соработка со министерот за транспорт и врски, Благој Бочварски, на 10 мај годинава потпишале договор со единствениот понудувач ‘Стентон градба’ од Битола за расчистување одрони и олеснување косини за речиси 40 милиони денари, сума што со ДДВ изнесува над 767 илјади евра. Како изведувач е наведена компанијата за градежништво, транспорт, угостителство и услуги ‘Урбан план констракшн’ од Тетово. Како е возможно на толкав тендер да биде пријавен само еден понудувач?Како е возможно на тендери за патишта, за градба, за набавки, за санирање, тендери распишани од СДСМ/ДУИ, за работа да биде заинтересирана само една фирма, честопати поврзана со партијата на власт? Така е и во случајот кога СДСМ во Битола на локалните избори излезе со кандидат во тесна врска токму со фирмата што сега е единствен понудувач за расчистување на одроните на автопатот Миладиновци – Штип по дури 7 месеци.
Невозможно е во Македонија да нема градежна компанија што би била заинтересирана да се натпреварува да земе работа, која според Бочварски, беше проценета над 750.000 евра.
Почитувани, во Македонија ништо не е изградено, ниту е санирано, нема нови патишта, ама затоа има нови патарини и нови тендери со само еден понудувач“, рече Стоилковски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Филипче: Со ВМРО-ДПМНЕ на власт храната станува луксуз

Што имаме ние од скандинавската среќа што премиерот Мицкоски и ВМРО ДПМНЕ сакаат да ни ја прикажат и да не разубедат дека во држава со 400 евра минимална плата и цените што дивеат, добро се живеело. Да, се живее, ама до 10-ти во месецот, потоа е период на преживување. Со ВМРО ДПМНЕ на власт, година и пол, храната стана луксуз, луксуз е минималната плата, луксуз е чистиот воздух и справувањето со отпадот, луксуз е правдата, луксуз е да се има достоинствен живот. Ама, не е луксуз рекордно задолжување, новиот долг од 1,8 милијарди евра за првите 13 месеци, без никаков реален и видлив ефект на развојот, истакна лидерот на СДСМ, Венко Филипче на вечерашната граѓанска трибина под слоганот „Се бориме се нашиот дом“ што се одржа во Радовиш.
Додаде дека откако на власта не им успеале така наречените „кошнички“, кои се покажале дека биле само лажен пи-ар и откако не презеле ништо, Владата на ВМРО ДПМНЕ користела само спинови и манипулации.
– Реалните податоци кажуваат инфлација од 4 отсто, а власта со спин се обидува да каже минус 0,2 отсто, ама споредувано месец со месец. Вистината е дека реалната инфлација е 4 отсто, дека храната е поскапа 6,3 отсто, цените во рестораните и хотелите над 8 отсто. Колку сакаат нека прават спинови, граѓаните гледат и чувствуваат. Не им требаат бројки, знаат колку можеле да купат со истите пари пред една година, а колку може сега. Ќесата од маркет е се попразна и се полесна, се бира што да се купи. Премиерот треба да знае дека граѓаните не може да живеат од неговите спинови, туку од она што им останува во паричникот, потенцираше Филипче.
Тој ги повика радовишани на 19 октомври да излезат масовно на гласање и да го дадат својот глас за кандиатот за градоначалник на Радовиш од СДСМ и коалицијата, Ристо Спасов и за советничката листа од оваа коалиција.
Македонија
Мицкоски: Тоа што Филипче ме презира е помало гајле, поголемо е што ја доведе СДСМ на едвај 120-130 илјади гласови

Ова за СДСМ не се избори за спас на Македонија, туку избори за спас на нивните лични кариери. Тие се уплашени од одговорност и затоа ова тесна мала група која што ја има киднапирано СДСМ, ја држи цела држава Македонија во грч. И како такво, јас ова го разбирам како потценување на гласачите и директна уцена врз цела држава, рече вечерва лидерот на ВМРО-ДПМНЕ и премиер Христијан Мицкоски од митингот во Свети Николе.
Мицкоски се осврна и на трката за градоначалник на Град Скопје, посочувајќи дека кандидатот од СДСМ не е во трка со кандидатот за градоначалник од редовите на ВМРО-ДПМНЕ, туку со независните кандидати.
– Јас ја кажувам вистината во очи, без оглед на тоа дали Филипче ме мразел или презирал, како што тоа го кажа на еден од последните митинзи. И тоа што ме презира е помало гајле, поголемо е што таа негова политика на навреди, на ниски зборови, кои што не би требало човек интелектуалец да ги кажува, па колку и да чувствува гнев кон мене и кон ВМРО-ДПМНЕ, ја доведе СДСМ на едвај 120-130 илјади гласови, а во некои општини, оваа политичка партија е трета, во некои е и четврта опција. Во главниот град, на пример, очекувањата се дека нивниот кандидат за градоначалник на Скопје нема да ја надмине бројката од 30 илјади гласови. Што во суштина, е далеку под нивниот биолошкиот минимум, и е доволна основа да биде трка не со ВМРО-ДПМНЕ и со Орце Ѓорѓиевски во Скопје, туку со некои од независните кандидати, истакна Мицкоски.
Осврнувајќи се на довербата во судството, Мицкоски рече дека два проценти доверба во судството се последица на неказнетиот криминал и сознанието дека повеќе од 100 пријави стојат во фиоките на судиите и обвинителите кои им служат на СДСМ и ДУИ.
– Она што сега ги мачи е чувството и сознанието дека се ближи времето на одговорност и се стега обрачот и околу нив и околу оние кои упорно ги штитат. За тие што ги штитат, пак, претседателот на СДСМ, Венко Филипче, ќе каже дека биле големи професионалци, а тие кои што ги штитат и се нивниот последен бастион, се малкумина обвинители и судии, и поради нив денеска довербата на народот во обвинителите и судиите е скромни 2 проценти. Тие два проценти доверба се последица на секој неказнет криминал, на сознанието дека повеќе од 100-тина пријави држат во фиоки и ја штитат својата политичка олигархија по секоја цена. Тие малкумина се нивните лакеи и измеќари, кои што се уште и служат на претходната влада на СДСМ и ДУИ, рече Мицкоски.
Македонија
Спасовски вели дека ВМРО-ДПМНЕ ја злоупотребува трагедијата во Кочани, тврди дека не се јавил да спречи контрола

Пратеникот на СДСМ и поранешен министер за внатрешни работи, Оливер Спасовски денеска ги демантираше, како што вели, лагите изнесени на прес-конференција од страна на ВМРО-ДПМНЕ.
„Најостро ги демантирам лагите и манипулациите коишто ВМРО-ДПМНЕ ги пласира. Ги отфрлам како целосни невистини. Ова е класичен пример за очајна манипулација. Никогаш, ниту во еден момент, не сум се јавил за да спречам контрола, напротив, фактот што контроли имало насекаде е најсилна потврда дека ниту сум влијаел, ниту постои било каков обид за тоа.
Овие лаги кои ги шири власта се очаен обид на ВМРО-ДПМНЕ за последна злоупотреба на трагедијата во Кочани за политички цели, во момент кога јавноста веќе знае дека токму нивни функционери, од сите ешалони на власта, биле директно инволвирани во случајот ‘Пулс’ а сега се заштитени.
Сакам да им порачам дека со спинови и лаги не може да се побегне од фактот дека власта ја попречува правдата за трагедијата во Кочани”, стои во објавата на Спасовски.
Претходно, Викторија Андоновска од ВМРО-ДПМНЕ, на прес-конференција праша, дали Оливер Спасовски се јавувал во СВР Штип и барал да се р’же на полицијата во Кочани за спас на газдата на дискотеката Пулс? Што кријат ЈО и Коцевски?