Македонија
Мицкоски: Власта да не го бојкотира референдумот

Претседателот на ВМРО-ДПМНЕ, Христијан Мицкоски, при денешната посета во општина Петровец во која се постави камен темелник на новата општинска зграда, одговараше на новинарско прашање поврзано со најавениот референдум и можниот консензус за усогласено референдумско прашање.
Мицкоски рече дека што се однесува до референдумското прашање, консултациите со експертите конвергираат кон тоа што и самиот претседател Стево Пендаровски го кажал, и се многу блиску до таа содржина која што ја претседателот ја кажал. Мицкоски рече дека очекува од Пендаровски да излезе со став во јавноста дека заедно со неговите соработници ќе излезе на референдумот и ќе го поддржи според своето убедување.
„Очекувам Пендаровски да излезе јавно со став со своите соработници ќе излезе на референдумот и ќе го поддржи, ќе гласа, а ќе гласа нормално според своето убедување -дали треба да продолжиме под овие услови, под услови на диктат или ќе треба да продолжиме под некои поинакви услови кои ние како ВМРО-ДПМНЕ и останатите би рекол, опозициски партии но и други кои се партии во власта и слободномислечки пратеници мислат дека треба да продолжи Македонија. Односно, да не бидеме под диктат, под закана за асимилација во 21 век повторно, во современа Европа, во Европа во која што треба да има рамноправност, во која ќе треба вредностите да победуваат и демократските вредности се разбира, вредностите на 21 век, ние сѐ уште да се плашиме и да се бориме за нашиот идентитет. Така што, тоа е одговорот на вашето прашање поврзано со референдумот. Очекувам поддршка од претседателот Пендаровски, но очекувам поддршка и од останатите политички партии да излеземе и да видиме каква иднина треба да има нашата Македонија“, рече Мицкоски.
Во врска со изборите, Мицкоски рече дека тие се на ставот дека оваа влада е исклучително корумпирана, неспособна и нема визија и треба час поскоро да замине и затоа било кој термин кој не може да се доведе во врска со референдумското изјаснување за нив е добредојден и подготвени се да излезат на избори и освојат мнозинство, мнозинство во кое ќе нема уцени и ќе се исправат грешките кои се случија во изминатите пет години. Во однос на активната блокада, Мицкоски рече дека се спречиле многу законски решенија како на пример злоупотребата на опојните дроги, измените во законот за работни односи со кој требаше на голем број партиски судии и обвинители да им се продолжи работниот стаж, законот за коцкање и уште многу закони кои активната блокада ги спречила.
„Секој оној од владата која сака да се консултира, подготвени сме да појдеме на состанок, во Клубот на пратеници, на нова лидерска средба да разговараме и да го утврдиме референдумското прашање. Јас веќе на следната седница на Извршниот комитет ќе излезам со позиција откако ќе завршат консултациите и со коалициските партнери бидејќи на крај сакам да го слушнам и нивното мислење, многу значаен сегмент од коалицијата која што ја предводи ВМРО-ДПМНЕ, да излеземе пред членовите на ИК, на ЦК и во секое време на владата и стоиме на располагање да разговараме за референдумското прашање. Нема бегање од ова.
Ние сме за задолжителен референдум, формално правно гледам има и јавна дебата од страна на власта и од оние инсталации од страна на власта во опозицијата чија што заедничка цел е да не успее овој референдум формално право, а тоа е да нема 50% плус 1 од бројот на избирачи кои се дел од избирачкиот список. Тоа е заедничкото од власта предводена од СДСМ/ДУИ и овие малкумина незначителни инсталации на власта во опозицијата и помеѓу македонскиот блок. Само тие имаат единствена желба, а тоа е референдумот да не успее, тоа е суштината нивна. А нашата суштина е што е можно повеќе граѓани да излезат на референдум и да си го дадат својот глас. Доколку власта одлучи да не го бојкотира овој референдум или да не го попречува референдумското изјаснување, јас сум убеден дека референдумот и формално правно ќе биде успешен. Доколку се обидува да го попречи, да го опструира, да го бојкотира, бидејќи тие еднаш си ја бојкотираа довербата во парламентот, тогаш ќе се бориме да дојдеме и до формално правно успешен референдум, но секој еден глас на референдумот, без разлика дали ќе биде ЗА или ПРОТИВ е највисока форма на демократија и јас ја почитувам и се поклонувам бидејќи суверенитетот доаѓа од народот, народот е суверен на оваа држава, не политичарите или политичките елити – додаде Мицкоски во врска со претстојниот референдум и референдумското прашање.
Мицкоски ги повика сите политички партии вклучувајќи ги албанските, академијата, универзитетите, верските заедници да ги повикаат граѓаните да излезат и да се изјаснат бидејќи ова ќе биде изјаснување за иднината на родените и неродените генерации.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Костовски: Ќе изградиме Дом на култура во Бутел

„Почитувани граѓани на општина Бутел, денеска се наоѓам во дворот на велелепниот храм Свети Јован. Доблесно е кога нешто нема да успеете да направите, да признаете, но бидете сигурни дека во потегот позади мене ќе изградиме нов модерен плоштад со културен дом“, рече Дарко Костовски, кандидат за градоначалник на општина Бутел од ВМРО-ДПМНЕ.
„На оваа тематика работевме во изминатиот период. Успеавме да ги надминеме сите имотно правни проблеми и успеавме да направиме еден убав модерен проект за којшто архитектите обезбедија и 3Д анимација којашто ќе можеме да ја погледнеме.
Плоштадот ќе се простира на 3000 метри квадратни. Домот на култура ќе се простира на 900 метри квадратни. За овој проект се потребни 100 милиони денари. Истите ќе бидат обезбедени од страна на буџетот на општина Бутел“, изјави Дарко Костовски, кандидат за градоначалник на општина Бутел од ВМРО-ДПМНЕ.
Македонија
Извештаи за примени донации доставиле 35 отсто од учесниците во изборната кампања

Согласно Изборниот законик, учесниците во изборната кампања за Локалните избори 2025 година, имаат обврска да поднесат извештаи за примени донации во текот на изборниот процес како извор на нивно финансирање. Обврската се однесува и на финансиски извештај со податоци за вкупните приходи и расходи на изборната кампања, во законски утврдени рокови, со што се овозможува следење на законитоста на финансирањето и трошењето на средствата од страна на надлежните институции, како и увид на јавноста во изворите на приходи и начинот на трошење на средствата во изборната кампања, со цел зајакнување на довербата во изборниот процес.
Согласно рокот за доставување на Извештај за примени донации на трансакциска сметка за изборна кампања, за период од отварање на сметката до 11-от ден од изборната кампања односно заклучно со 09.10.2025 година до 24,00 часот, до ДКСК доставени се вкупно 61 извештаи, што изнесува нешто над 35% од вкупниот број на учесници во изборниот процес. Сите 19 коалиции доставија извештаи за донации, примени се 18 извештаи од политичките партии и 24 извештаи од независни кандидати, поддржани од група избирачи.
По истекот на рокот, доставени се уште 2 извештаи од политички партии.
Извештаите за донации се објавени на веб страната на ДКСК, на следниот ЛИНК.
Македонија
Скопје е хаотично оти јавните претпријатија се заробени од партиски интереси, мој приоритет е нивна вистинска реформа, вели Шукова

За кандидатката за градоначалничка на Скопје од СДСМ, Каја Шукова, Скопје денес изгледа запуштено, нечисто и хаотично затоа што јавните претпријатија се заробени од партиски интереси, долгови и неспособни раководства. Таа констатира дека граѓаните плаќаат за услуги, а добиваат насобран смет, нефункционален јавен превоз и хаотична инфраструктура.
„Мој приоритет е вистинска реформа на јавните претпријатија, да им служат на граѓаните, а не на партиите. ЈСП се модернизира со нови еколошки автобуси, електронски систем за наплата и брз автобуски транзит за да се воспостави за да се воспостави јавен превоз што функционира. ‘Комунална хигиена’ се ревитализира со современ центар за селекција и рециклажа, редовно собирање отпад и конечно решавање на ‘Вардариште’. Во ‘Паркови и зеленило’ се отвора нова ера, десет илјади дрвја и петнаесет паркови за петнаесет месеци со редовно одржување и враќање на зелените површини во маалата. ‘Водовод’ се насочува кон стабилно снабдување, модерна опрема и намалени загуби на вода. Јавното претпријатие ‘Лајка’ се надградува во вистински хуман систем за згрижување и грижа за уличните животни“, рече денес Шукова.
Таа уверува дека со нејзината програма Скопје ќе добие функционални и транспарентни јавни служби и ќе прерасне во град што ќе работи и се грижи за жителите.
„Време е институциите да им служат на граѓаните, а не на партијата“, рече Шукова.
Политичките партии имаат уште четири дена за претставување на програмите пред да настапи изборниот молк за локалните избори.