Русија денес соопшти дека нејзината позиција за војната во Украина не се променила откако претседателот Владимир Путин ги постави своите услови минатата година: Украина целосно да ги повлече своите сили од клучните украински области и да се откаже од своите амбиции за членство во НАТО.

Путин и американскиот претседател Доналд Трамп ќе се сретнат во Алјаска в петок, што ќе биде првиот самит на САД и Русија од 2021 година, за да разговараат за опциите за завршување на војната. Трамп рече дека двете завојувани страни ќе мора да разменат дел од териториите што моментално ги држат за да се случи тоа.

Русија моментално контролира 19 проценти од Украина, вклучувајќи го целиот полуостров Крим, целиот регион Луганск, над 70 проценти од регионите Донецк, Запорожје и Херсон, и помали делови од регионите Харков, Суми, Николаев и Дњепропетровск.

По некои медиумски извештаи дека Вашингтон верува оти Путин е подготвен да направи компромис кога станува збор за територијални претензии, новинарите го прашаа портпаролот на руското Министерство за надворешни работи, Алексеј Фадеев, дали ставот на Русија се променил.

„Ставот на Русија останува непроменет, а беше изразен во оваа сала пред малку повеќе од една година, на 14 јуни 2024 година“, рече Фадеев, осврнувајќи се на говорот на Путин во министерството.

Потоа шефот на Кремљ ги изложи своите барања, вклучително и повлекување на украинските трупи од деловите на регионите Доњецк, Запорожје и Херсон што тие сè уште ги држат, што беше негов прв јавен коментар за евентуален мировен договор.

Путин, исто така, рече дека Киев ќе мора официјално да ја извести Москва дека се откажува од своите планови за влез во НАТО и дека има намера да остане неутрален и неврзан.

Покрај тоа, Путин рече дека правата и слободите на руските говорници во Украина мора да бидат гарантирани, како и „реалноста“ дека Крим, Луганск, Донецк, Запорожје и Херсон сега се дел од Русија. Путин рече дека неговите услови ќе мора да бидат одразени и во меѓународните договори.

Во времето на неговиот говор во 2024 година, Украина ги отфрли тие барања, нарекувајќи ги апсурден ултиматум. Украина постојано повторуваше дека нема да ја признае руската окупација на нејзината територија, а повеќето земји ја признаваат украинската територија во рамките на нејзините граници од 1991 година.

Украинскиот претседател Володимир Зеленски рече дека Русија мора да се согласи на прекин на огнот пред да разговара за територијални прашања. Тој рече дека ќе го отфрли секој руски предлог Украина да ги повлече своите војници од источниот регион Донбас и да ги предаде своите одбранбени позиции.

Зеленски денес пристигна во Берлин, каде што се среќава во живо со германскиот канцелар Фридрих Мерц, а заедно со него на видеоконференција со европските лидери, шефот на НАТО и американскиот претседател Доналд Трамп.

Пред видео повикот, Трамп напиша на платформата Truth Social дека „европските лидери сакаат да постигнат договор“ и дека тие се „одлични луѓе“.

Русија дневно губи речиси 1.000 војници, што е околу трипати повеќе од украинските загуби, изјави синоќа украинскиот претседател Володимир Зеленски, објави украинскиот „Киев индепендент“.

„На пример, вчерашните податоци, кои се приближно просечни, покажуваат дека руските загуби дневно биле од 500 до 1.000 убиени и 500 ранети“, рече Зеленски.

Подетаљните бројки на Зеленски за понеделник покажуваат дека бројот на убиени руски војници е 531, ранети се 428 и заробени се девет. Украинските загуби за истиот ден биле 340, вклучувајќи 18 убиени, 243 ранети и 79 исчезнати.

Зеленски рече дека односот на загубите е приближно 1 спрема 3 – руските загуби се трипати поголеми.

Украинската војска проценува дека вкупните загуби на Русија во Украина од почетокот на војната во февруари 2022 година надминале еден милион убиени, ранети и заробени војници, што е во согласност со западните процени. Москва не објавува официјални бројки за своите загуби.

Јунската студија на Центарот за стратешки и меѓународни студии процени дека 400.000 украински војници биле убиени или ранети од 2022 година, бројка блиска до онаа што Зеленски ја даде во декември.

Во исто време, според Зеленски, Русија има предност во жива сила од 1 спрема 3 и предност во артилерија од 1 спрема 2,4. Украина, сепак, има предност во беспилотни летала FPV од 1 спрема 1,4, а овој сооднос би можел да се зголеми на дури 1 спрема 4 доколку се обезбеди дополнително финансирање од европските партнери.

Киев долго време се соочува со недостиг на пешадија и нема капацитет да ги надомести загубите со иста брзина како Русија. Поради ова, ослабената одбрана на Украина отвора потенцијални можности за руски напредувања.

Според извештаите, на почетокот од оваа недела руските сили напредувале до 10 километри во близина на Добропила во регионот Донецк како дел од поширока офанзива помеѓу два важни и силно бранети градови – Покровское и Костантиновка.

Зеленски во јануари изјави дека украинската армија има приближно 880.000 војници наспроти руската сила од 600.000 војници, но Русија сè уште има бројчена предност во одредени области благодарение на концентрацијата на силите.

Фото: ЕПА

Сопругата на затворениот поранешен јужнокорејски претседател Јун Сук Јеол, Ким Кеон Хи, е уапсена по низа сериозни обвиненија вклучувајќи манипулација со акции и поткуп. Поранешната прва дама ги негира сите обвиненија за време на четиричасовното судско рочиште во Сеул, но судот сепак издаде налог за притвор наведувајќи го ризикот од уништување на доказите, објавува Би-би-си.

Иако Јужна Кореја има долга историја на обвинувања и затворање поранешни претседатели, ова е првпат и поранешен претседател и поранешна прва дама да бидат зад решетки. Нејзиниот сопруг Јун беше приведен во јануари и чека судење за неговиот неуспешен обид да воведе вонредна состојба минатата година, потег што ја втурна земјата во хаос и на крајот доведе до негово соборување.

Обвинителите тврдат дека 52-годишната Ким заработила повеќе од 800 милиони вони (приближно 578.000 долари) со учество во шема за фиксирање на цената на акциите на „Дојч моторс“, јужнокорејскиот дилер на БМВ. Иако наводно се случило пред нејзиниот сопруг да стане претседател, аферата фрли сенка врз целиот негов мандат.

Таа е обвинета и за прифаќање две чанти „шанел“ и дијамантски ѓердан како мито од контроверзната Црква за обединување во замена за деловни услуги. Меѓу другите обвиненија, Ким се обвинува и за влијание врз номинациите на кандидати за време на парламентарните дополнителни избори во 2022 година и општите избори минатата година.

Ким Кеон Хи се појави на сослушувањето со сериозен израз на лицето, облечена во црн костим. „Искрено се извинувам што предизвикав проблеми и покрај тоа што сум незначителна личност“, изјави таа кратко пред новинарите.

Додека беше на функцијата, нејзиниот сопруг Јун стави вето на три опозициски закони, со кои ќе се бараше специјален обвинител да ги истражи обвинувањата против неговата сопруга. Последен пат стави вето на нив во ноември, само една недела пред да прогласи вонредна состојба. Специјалниот обвинител за случајот беше назначен во јуни оваа година откога ривалот на Јун, Ли Џе Мјунг, ја презеде функцијата.