Култура
ТВ-серијата „Балканска приказна” со нова епизода од Битола и мариовско Маково

Ердал Озјаџилар како еден од главните протагонисти во новата турска серија „Балканска приказна”, којашто веќе подолго време се снима во Скопје, и Сердар Акар, режисер на серијата, деновиве се во посета на Битола, градот каде што пред точно 13 години се снимаше една од најуспешните серии во турска продукција „Збогум Румелија”, овој пат работејќи на новата епизода од „Балканска приказна”.
Озјаџилар, кој во „Балканска приказна” го глуми ликот на ќофтеџи Сулејман, е препознатлив во Македонија и Балканот по успешно доловената улога на млекарот Рамиз во серијата „Збогум Румелија”, снимена во периодот од 2007 до 2009 година во Битола, Охрид и мариовските села Маково, Орле и Ореово. „Збогум Румелија” е серија која на гледачите им раскажуваше приказна од периодот на 1899 година, кога Отоманската Империја ја губи својата надмоќ на Балканот. „Балканска приказна”, пак, обработува дејствие од денешно време, за две семејства од две различни националности и невозможната љубов која ќе се развие меѓу Ертан (Турчин) и Јованка (Македонка) како главни протагонисти во оваа серија.
„Дојдовме во Битола да ја снимиме новата епизода на ‘Балканска приказна’. Заедно со нашиот режисер Сердар Акар ги посетивме местата каде што работевме пред 13 години и куќата во која се снимаше ‘Збогум Румелија’. Имавме доста емотивни моменти. Во таа серија големо внимание привлече млекарот Рамиз. Овој пат во Битола дојдов како ќофтеџи Сулејман. Многу ми се допаѓа Битола и ми недостигаше. По многу години, ги посетивме Битола, Маково, места во кои навраќајќи се на старите убави денови поминати овде сфатив колку ми недостигаат и колку сум среќен што деновиве сум во Битола“, вели Ердал Озјаџилар по посетата на Битола.
Режисерот на серијата, Сердар Акар, пак, од неодамна изјави дека најубавите години од неговиот живот ги поминал токму овде, во Македонија, пред точно 13 години успешно носејќи се со режисерското столче на „Збогум Румелија” и за него е задоволство повторно да работи на голем проект во Македонија.
Како дел од актерската екипа во серијата „Збогум Румелија”, којашто за кратко време ги сруши рекордите и стана хит во Турција, се и македонските актерски имиња Сузан Акбелге и Ерман Шабан, сега играјќи ги улогите на Елена и Зафер во серијата „Балканска приказна”.
Мајсторските имиња Ердал Озјаџилар и Озлем Туркад ги делат главните улоги во серијата со Емре Беј и Мерих Озтурк, заедно со актерскиот тим составен од Хакан Бојав, Сузан Акбелге, Џан Колукиса, Сарп Бозкурт, Ѓозде Чиаџи, Дениз Ѓуркан, Емине Халил, Бурак Рахман, Сулејман Кара, Каан Тургут, Ерман Шабан, Џенап Самет и Бену Шахин. Сценариото е напишано од Угур Узунок, Нурулах Севимли, Абдулхамид Ишик и Есма Коч. Продуценти се Јалчин Ари и Угур Узунок, режијата е на Сердар Акар и Селахатин Санџакли, а линиски продуцент на серијата е Богдан Јончевски и локален партнер Сити Стар Продукција.
Серијата „Балканска приказна“ се прикажува на Турската национална телевизија ТРТ 1, а во вторник, 23 август во 20:00 часот, љубителите на оваа серија ќе може да ја проследат 9-тата епизода којашто изминатите денови се снимаше во Битола.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
„Голдберг варијациите“ на Бах во изведба на Дино Имери – утре во Виена

Македонскиот пијанист Дино Имери, еден од највпечатливите уметници на својата генерација, утре (13 јуни) ќе настапи во Виена – глобалниот и историски центар на класичната музика. На програмата е капиталното дело на Јохан Себастијан Бах – „Голдберг варијации“, кое ретко се изведува на концертните сцени низ Европа, токму поради неговата исклучителна сложеност и длабочина.
Концертот ќе се одржи во престижниот „Бехштајн Центрум“ во Виена, во организација на Амбасадата на Република Северна Македонија, со поддршка од Македонско-австрискиот бизнис клуб и компанијата SSB Infrastructure-Austria.
Ова дело, коешто Имери премиерно го изведе во Скопје во рамки на „Недела на Бах“, привлече големо внимание од публиката и критиката. Програмата бара техничка виртуозност и уметничка зрелост, а само мал број пијанисти во светот се осмелуваат да го стават во својот концертен репертоар.
„Настап во Виена е сон на секој уметник. Особено ми е чест да ги изведам ‘Голдберг варијациите’ – едно од најмонументалните дела на класичната литература, на сцена пред публика која секојдневно слуша врвни уметници и програми. Работев на ова дело повеќе од пет години. Искрено им се заблагодарувам на Н.Е. г-дин Освит Росоклија и на поддржувачите на концертот – без нив оваа реализација немаше да биде можна“, изјави „волшебникот на пијаното“ Дино Имери пред настапот.
Концертот е со слободен влез и отворен за сите љубители на класичната музика.
Култура
Фестивалот Credence Dance почнува на 16 јуни

Третото издание на фестивалот Credence Dance започнува на 16 јуни, а ќе трае до 21 јуни со програма конципирана тематски, Вечери на класичен балет и Вечери на современ танц.
Фестивалот оваа година има и дополнителна програма која ќе се состои од работилници и трибини. На програмата се фрагменти од бисерите на класичното наследство „Лебедово езеро“, „Рајмонда,“„Копелија“, „Дон Кихот“, „Силфида“ и други.
Освен тоа во делот на модерниот и современиот танц премиерно ќе бидат изведени дела на Игор Киров, Бојан Мицов, Џонс Хинг, Франциско Руиз и Јована Петровска кој кореографите наменски ги подготвија за фестивалот.
Овогодинешниот Credence Dance фестивал ќе понуди ексклузивни гости од Кина, САД, Италија, Франција, Германија, Велија Британија итн. Ова е исклучителна и ретка можност да се видат овие уметници на домашна сцена.
Во рамки на фестивалот традиционално ќе биде врачена Наградата за трајни вредности во танцовата уметност. Настанот се одржува во Националата опера и балет.
Фестивалот е поддржан од Министерството за култура и Универзитетот „Св Кирил и Методиј“, Скопје. Влезот е слободен.
Култура
Во Москва излезе „Пиреj“ од Петре М. Андреевски

Романот „Пиреj“ излезе од печат во Москва на инициjатива на Олга Панкина, познат популаризатор на македонските културни вредности во Русија. Таа го преведе уште во 2008 година, го обjави издавачката куќа „Феникс“, Скопjе. Како што обjаснува Панкина, романот на руски веднаш предизвика интерес каj публиката, но сепак книгата не можеше да допре до широк круг рускоjазични читатели. Сметаjќи го романот на основоположникот на современата македонска проза Петре М. Андреевски за ремек дело, таа си постави за задача да го преобjави во Москва.
Оваа година идеjата jа поддржа Центарот за книга „Рудомино“ со коj Олга Панкина плодно соработува веќе петнаесет години (Центарот за книга има обjавено творби на над 20 македонски автори).
Ова издание на „Пиреj“ е многу квалитетно (368 страни, тврд повез) и изгледа современо. На корицата има фрагмент од сликата „Стара куќа“ на Олга Панкина. Блескав предговор за книгата напиша Венко Андоновски, коj даде за руска читателска публика основни информации за историјата која е заднина на личната драма на едно македонско семејство од почетокот на ХХ век, семејството на Јон и Велика, jа подвлече актуелноста на романот и го нарече како најголем македонски бестселер на сите времиња.
Тукушто обjавениот роман веќе заживее своj книжевен живот – почна да стекнува читатели. Минатата недела, од 3 до 7 jуни, беше презентиран на Саемот на книга на Црвениот плоштад во Москва на штандот на издавачот Центар за книга „Рудомино“.