Свет
Пандемијата влијаеше на падот на бројот на новороденчиња и бракови во Кина
Пандемијата на коронавирусот придонесе за намалување на бројот на бракови и раѓања во Кина, која во последните години беше погодена од високите трошоци за образование и одгледување деца, објави кинеската Национална здравствена комисија.
Многу жени ги одложуваат своите планови да се омажат или да имаат деца, соопшти Комисијата, додавајќи дека брзиот економски и социјален развој довел до „длабоки промени“.
Младите кои се преселуваат во урбаните средини, повеќе време поминато на образование и работните средини под висок притисок одиграа улога, додаваат тие.
Демографите сугерираат дека бескомпромисната кинеска политика „нулта стапка на ковид“ придружена со строга контрола врз животите на луѓето може да предизвика длабока и трајна штета на нивната желба да изберат да имаат деца.
„Коронавирусот имаше јасно влијание врз договорите за брак и раѓање деца“, наведе Комитетот. Комисијата вчера ги испрати изјавите до „Ројтерс“ по факс како одговор на прашања на оваа тема.
Бројот на новороденчиња во Кина оваа година треба да падне на рекордно ниско ниво, предупредуваат демографите. Ќе има помалку од 10 милиони новороденчиња, во споредба со минатогодишните 10,6 милиони бебиња – помалку за 11,5 проценти од 2020 година.
Кина имаше стапка на фертилитет од 1,16 во 2021 година, една од најниските стапки во светот и под стапката од 2,1 што ОЕЦД смета дека е неопходна за стабилно население. Кина воведе политика на едно дете од 1980 до 2015 година и сега признава дека нејзиното население е на работ на потенцијална криза што ќе ја тестира нејзината способност да финансира и да се грижи за старите лица.
За справување со овој проблем, властите на национално и на провинциско ниво минатата година воведоа мерки како даночни олеснувања, подолго породилно отсуство, засилено здравствено осигурување, субвенции за домување и дополнителни финансиски средства за трето дете.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Египет ги повика Хамас и Израел да покажат флексибилност и да постигнат договор за прекин на огнот во Газа што е можно побргу
Египет апелира до Хамас и Израел да покажат флексибилност за што побргу да се постигне прекин на огнот во борбите во Газа, соопшти утрово египетското Министерство за надворешни работи. Египет смета дека преговорите во Каиро не доведоа до прекин на огнот. Тие во моментот се во деликатна фаза, а делегациите на Хамас и Израел го напуштија главниот град на Египет, се наведува во соопштението.
Во телефонски разговор со американскиот државен секретар Ентони Блинкен египетскиот министер за надворешни работи Самех Шукри ја нагласи „важноста да се повикаат страните да покажат флексибилност и да ги направат сите неопходни напори за постигнување договор за прекин на огнот и на тој начин да се стави крај на хуманитарната трагедија во Газа, соопшти Министерството.
Каиро стравува од опасноста израелската операција во Рафа да ги загрози стабилноста и безбедноста на регионот, се додава во соопштението на египетската дипломатија.
Блинкен потврди дека Соединетите Американски Држави се против голема воена операција во Рафа и какво било принудно раселување на Палестинците од Газа, изјави неговиот портпарол, Метју Милер.
Израелската армија во вторникот распореди тенкови во Рафа и ја презеде контролата на граничниот премин со Египет блокирајќи го главниот премин за конвои со хуманитарна помош кон опколената палестинска територија.
Свет
Десетици илјади Палестинци бегаат од Рафах
Десетици илјади раселени Палестинци ги спакуваа своите шатори и други работи и бегаат од Рафах во други делови на Појасот Газа поради израелската закана од инвазија, пишува АП.
Израел постојано се закануваше дека ќе го нападне Рафах, каде засолниште побараа околу 1,3 милиони Палестинци, повеќе од половина од населението на Газа.
Еден од раселените рече дека не знае каде да оди.
Израелскиот премиер Бенјамин Нетанјаху денеска изјави дека американската закана дека нема да достави одредено оружје нема да го спречи Израел да продолжи со офанзивата во Појасот Газа.
Во текот на оваа недела израелските сили започнаа ограничена операција при која го зазедоа граничниот премин Рафах од палестинска страна и го блокираа влезот на хуманитарна помош.
ОН објавија дека северот на Појасот Газа веќе е во состојба на „тотален глад“.
Израел смета дека Рафах е последното упориште на борците на палестинското движење Хамас и дека армијата мора да влезе во тој град за да го уништи тоа движење и да ги врати заложниците кои беа киднапирани на 7 октомври.
Европа
Украина: Русите го нападнаа Харков, уништени се згради, меѓу повредените има и дете
Украина ги уништи сите 10 беспилотни летала во руски напад во текот на ноќта, но две лица се повредени, а станбени згради во регионот Харков беа зафатени од пожар, соопштија денеска украинските власти.
Воздухопловните сили на Телеграм соопштија дека Русија лансирала и две противвоздушни наведувани ракети. Портпаролот на украинските воздухопловни сили во телевизиски пренос изјави дека руските ракети најверојатно биле насочени кон североисточниот град Харков.
Гувернерот на регионот Харков, Олех Синехубов, рече дека три станбени куќи биле запалени, а десетици биле оштетени како резултат на рускиот напад, чија цел, според него, била и инфраструктурата и станбените области. На фотографиите што ги објави Синехубов на Телеграм, се гледаат големи пламени јазици од станбените згради.
„Две лица, меѓу кои и едно 11-годишно дете, се ранети во нападот и се на медицинска помош“, рече Синехубов на апликацијата Телеграм.
Ројтерс сè уште не ја потврди независно оваа вест. Москва негира дека цели на цивили во овие „легитимни напади врз воената, енергетската и транспортната инфраструктура на Украина“.