Македонија
Ангелоски за српска „Политика“: „Отворен Балкан“ ја забрзува интеграцијата на регионот
Иницијативата „Отворен Балкан“ треба да креира поповолно деловно окружување во регионот, услови и оперативни мерки кои ќе ја поттикнат и поддржат економската соработка меѓу земјите што засега се вклучени – Македонија, Србија и Албанија, со надеж дека ќе се вклучат и другите држави од Западен Балкан, истакнува претседателот на Сојузот на стопанските комори на Македонија, Трајан Ангелоски, во интервју за српскиот весник „Политика“, кое се објавува пред почетокот на Првиот меѓународен саем за вино, храна и туризам „Винска визија на ‘Отворен Балкан’“, кој во рамките на иницијативата „Отворен Балкан“ од денеска до недела се одржува во Белград.
„Носителите на политичките функции испратија јасна порака дека се свесни за потребите на бизнисот и дека се подготвени да направат позитивни промени во таа насока. Ова што е важно е што побргу да почне имплементацијата на договореното за да може полесно да се справиме со актуелните предизвици, како што се растот на цените на суровините, на основните прехранбени производи и на енергентите, кои претставуваат сериозна глобална закана. Сојузот на стопанските комори како деловна мрежа е дел од работните групи што работат на операционализација на мерките укажувајќи што е тоа што најмногу му е потребно за бизнисот. Побаравме да се овозможи зелен коридор на граничните премини за организираните туристички тури како би можело туристите да не ги губат часовите за уживање и релаксација чекајќи во автобусите. Бизнисот смета дека е дојдено вистинско време да почнеме да дејствуваме во правец на интегрирање на инвестициските пазари (берзите) и пазарите на енергетика или, на пример, сѐ она што е во сферата на услужни дејности да се врши без посебни ограничувања. Тука е и можноста преку поврзување на бизнисите да се обезбеди заеднички настап на трети пазари, како и заедничко привлекување странски инвестиции или кусо кажано – очекуваме целиот процес на регионална интеграција многу побргу да се одвива и што е можно побргу да ги почувствуваме позитивните придобивки“, потенцира Ангелоски.
Претседателот на Сојузот во интервјуто зборува и за справување со енергетската криза и очекувањето за конкретни мерки за поддршка на стопанството.
„Сојузот во континуитет истакнува дека за да се стабилизираат компаниите неопходно е да се субвенционираат сметките за струја, целосно ставање во функција на домашните капацитети за производство на електрична енергија и дел од оваа енергија која е по многу поволна цена во однос на берзанската да се даде на стопанството. Исто така побаравме поддршка за користење на обновливи извори на енергија, преку олеснување на процедурите за добивање на дозвола за поставување на фотоволтаици“, вели Ангелоски, акцентирајќи ги и традицоналните добри политички и економски односи меѓу Македонија и Србија и зголемениот обем на трговска размена.
Претседателот на Сојузот заедно со потпретседателите Горан Ѓорѓиевски, Сашо Дукоски и Аркан Керим е дел од настанот на „Отворен Балкан“, каде што активно учество ќе земат на бизнис-форумите, традиционалната македонска вечер, а фирмите, кои се членови на Сојузот, ќе ги презентираат туристичките можности на нашата држава, како и традиционалната македонска храна и висококвалитетните вина.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Нормализиран сообраќајот на патниот правец Охрид – Ресен
Сообраќајот на патниот правец Охрид – Ресен е нормализиран, извести АМСМ.
Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани –Делчево.
Македонија
Јаневска – Рокас: соработката со Европската унија е од суштинско значење за реализација на планираните образовни промени
Министерката за образование и наука Весна Јаневска денеска оствари средба со новоакредитираниот амбасадор на Делегацијата на Европската унија, Михалис Рокас.
Посакувајќи му успешен мандат, Јаневска се заблагодари на амбасадорот Рокас за континуираната поддршка на ЕУ во процесот на реформирање на националниот образовен систем.
На средбата, таа ги претстави тековните активности и планот за поквалитетно образование на сите нивоа.
„Стремежот за полноправно членство во Европската Унија продолжува да биде важен општествен стимул и значаен фактор на кохезија за македонските граѓани, кои пак, од нас како Влада очекуваат современо и модерно образование. Истрајни сме во определбата да ги реализираме промените кои ги претставивме на почетокот на нашиот мандат. Оптимизам и решителност постои, а соработката со Европската унија е од суштинско значење за остварување на зацртаната цел, рече Јаневска на средбата.
Евроамбасадорот укажа на подготвеноста на ЕУ и понатаму да биде посветен партнер на државата во градењето современ образовен систем, кој ќе образува европски граѓани.
Македонија
Сиљановска Давкова – Гутереш: Не смее да се дозволи, билатерализацијата во случајот со македонската евроинтеграција да стане камен на сопнување за проширувањето
Претседателката Гордана Сиљановска Давкова, во рамки на учеството на 79. Генерално Собрание на Обединетите Нации во Њујорк оствари средба со Генералниот секретар на Обединетите Нации, Антонио Гутереш.
На средбата претседателката ги потенцираше принципите на светската организација како основа на којашто мора да функционира меѓународниот поредок, без разлика дали се работи за мали или големи држави. Таа на својот соговорник му посочи дека во случајот со македонската евроинтеграција не смее да се дозволи билатерализацијата да стане камен на сопнување за проширувањето на Европската Унија, која е настаната како мировен процес.
Генералниот секретар на ОН, Гутереш, на средбата искажа лутина поради пречките коишто Северна Македонија ги има на патот кон Европската Унија. Порачувајќи дека е голем почитувач на македонската евроинтеграција, во разговорот тој ја потенцираше својата лична солидарност за напорите на земјата да биде дел од ЕУ.
Генералниот секретар како добар познавач на процесите на евроинтеграција и состојбата во регионот на Западен Балкан, нагласи дека македонската евроинтеграција, целосно заслужено, треба да се случи колку што е можно побрзо.