Македонија
„Десет лопати за девет години“ – активистите со акција поради вечната изградба на клиничкиот центар во Штип
Во текот на денешниот ден од група активисти беше спроведена активистичката акција „10 лопати за 9 години“. Акцијата е посветена на веќе вечната изградба на новиот клинички центар во Штип.
Акцијата има цел потсетување на надлежните за овој отворен проблем, кој на над 500 илјади граѓани од Источниот и од Југоисточниот Регион им го скратува правото на квалитетна здравствена заштита.
На лопатите во вид на златни плакети се поставени следните пораки, кои се директно поврзани со изградбата на болницата.
· Техничка документација за нова клиничка болница во Штип од 2013 до 2015 година
· На 6 август 2015 година објавен тендерот за изградба на клиничка болница во Штип
· Министерството за здравство на 7 август 2015 година во Скопје го презентира проектот за нова клиничка болница во Штип
· 3 март 2016 – лопати за старт на новата клиничка болница во Штип
· Ветување дадено на камен-теленикот: Новата болница ќе биде готова за две години
· Болницата ја гради како главен изведувач„ Интракат“ од Грција, а подизведувач е ГП „Бетон“ – Штип
· 6 декември 2018 година пролонгирана изградбата на болницата за две години
· По две години
· 11 август 2020 – судски спор меѓу „Интракат“ и ГП „Бетон“ ја стопира изградбата на болница
· 17 ноември 2021 – Христијан Мицкоски во „Топ тема“ на „Телма“ обелоденува за повлекување на Банката на Советот на Европа, која беше финансиер на изградбата на клиничката болница во Штип.
· 18 ноември 2021 – Министерството за здравство го потврдува повлекувањето на финансиерот за изградба на болницата
· 6 декември 2021 – нов скандал: објавени поранешни градоначалници, административци, политичари добивале дебели хонорари за изградба на новата болница во Штип
· 4 март 2022 – по шест години, болницата изградена само 30 %
· До кога ќе редиме лопати и ќе чекаме, останува да видиме.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Уапсен врховен судија поради сомненија за примање поткуп
Врховниот судија Наке Георгиев е уапсен поради сомнеж за примање поткуп.
„Денеска 20 мај, лишен од слобода е судија од Врховниот суд поради сомневања за сторено кривично дело Примање награда за противзаконито влијание. Судијата е лишен од слобода на лице место при извршување на кривичното дело. Се чекаат натамошни насоки од надлежен јавен обвинител“, велат од МВР.
Засега не е позната локацијата каде што е приведен судијата, ниту пак, за колкава сума станува збор.
Македонија
Сиљановска доби честитка од кралот Чарлс
Претседателката Гордана Сиљановска Давкова денеска го прими амбасадорот на Обединетото Кралство на Велика Британија и Северна Ирска, Метју Лосон.
На средбата беа разменети мислења за севкупните билатерални односи меѓу двете држави, при што претседателката Сиљановска Давкова истакна дека нашата држава придава особено значење на развојот на пријателските односи и соработката со Обединетото Кралство, вклучувајќи го сојузништвото во НАТО алијансата. Претседателката Сиљановска Давкова посочи на нејзината подготвеност за натамошно унапредување на билатералната соработка со Обединетото Кралство во сите сфери од заемен интерес.
Претседателката Сиљановска Давкова истакна дека како држава особено ја цениме британската поддршка во исполнувањето на стратешката цел – членство во Европската Унија, која продолжи и по Брегзит.
Амбасадорот Лосон на претседателката Сиљановска Давкова и предаде честитка од Кралот Чарлс Трети по повод нејзиното стапување на функцијата, во која упатува најискрени честитки за нејзиниот избор.
„Уверен сум дека ќе го вложите целиот Ваш капацитет за време на Вашиот мандат како Претседател за справување со големите предизвици на нашето време, почнувајќи од справувањето со климатските промени до продлабочувањето на евроатлантската интеграција на Северна Македонија. Многу сум задоволен што нашите две земји имаат воспоставено цврсти трговски и безбедносни односи. Оттука, се надевам дека за време на Вашиот мандат како Претседател односите, кои се веќе толку блиски, уште повеќе ќе се продлабочат“, се вели во честитката од Кралот Чарлс Трети.
Македонија
Сиљановска Давкова се сретна со украинската амбасадорка Дир
Претседателката Гордана Сиљановска Давкова денеска ја прими амбасадорката на Украина, Лариса Дир.
На средбата, беше изразено задоволство од традиционалните пријателски односи, засновани на заемна почит и меѓусебно разбирање. Претседателката Сиљановска Давкова ја нагласи нејзината заложба за продлабочување на соработката во сите области од заеднички интерес, реафирмирајќи ја поддршката за Украина против руската агресија, со која се поткопува европската глобална безбедност и стабилност.
Двете соговорнички разменија мислења и за стратешките определби и перспективите на двете земји, истакнувајќи ја потребата од натамошна заемна помош, споделување искуства и експертиза. Претседателката Сиљановска Давкова ја нагласи македонската поддршка за Украина на нејзиниот пат кон Европската Унија и НАТО.
Амбасадорката Дир, упатувајќи честитки за изборот на претседателката Сиљановска Давкова ѝ посака успешно извршување на функцијата.