Македонија
СДСМ: Поради неодговорноста на Муцунски, училиштата во општина Аеродром останаа без храна за учениците
Општина Аеродром и Тимчо Муцунски ја дочекаа новата учебна година без обезбедена ужина за учениците во основните училишта. Веќе четврти ден од почетокот на учебната година учениците од речиси сите училишта останаа без топол оброк кој до лани го добиваа во организација на училиштата. Согласно бројните поплаки кои пристигнуваат од нашите сограѓани, во сите основни училишта освен во Ѓорѓија Пулевски, дадени им се насоки на родителите дека до 15 септември ќе мораат самите да обезбедат по два оброка дневно за своето дете, се вели во соопштението од СДСМ.
Од партијата додаваат дека според податоците достапни преку електронскиот систем на Бирото за јавни набавки, ниту Општина Аеродром ниту основните училишта на територија на општината до овој момент немаат распишано оглас за избор на оператор за услугата топол оброк за основните училишта.
Тимчо Муцунски и Општина Аеродром им должат одговори на граѓаните. Кога планираат да распишат оглас за јавна набавка за топол оброк за учениците во основните училишта? Уште колку долго родителите на овие ученици ќе мораат да обезбедуваат по два оброка дневно за своите деца?
Од СДСМ прашуваат кои се причините што огласот не е распишан на време и јавната набавка не е завршена пред почетокот на учебната година? На кој начин планира да ја спроведе јавната набавка за услугата топол оброк имајќи предвид дека на електронскиот систем за јавни набавки на БЈН во моментов нема ниту еден активен оглас за оброк во училиштата на територија на општина Аеродром?
Тимчо Муцунски им вети на граѓаните дека по неговиот избор за градоначалник проблемот со навременото обезбедување ужина за учениците во основните училишта ќе биде надминат.
Ова е уште едно неостварено изборно ветување на Тимчо Муцунски и ВМРО-ДПМНЕ. Учебната година започна, а ужина за учениците од основните училишта до овој момент нема, се вели во соопштението од СДСМ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
На 53-годишна возраст почина поранешниот градоначалник на Крива Паланка, Мицевски
Почина поранешниот градоначалник на општина Крива Паланка, Борјанчо Мицевски. Тој имаше 53 години и беше градоначалник од 2017 до 2021 година.
„Со длабока тага ја примив веста за смртта на Борјанчо Мицевски, градоначалник на Крива Паланка и наш соборец и сопартиец. Борјанчо беше човек кој искрено и посветено работеше за доброто на својата општина и за сите граѓани, секогаш воден од вредностите на солидарноста, правдата и напредокот. Неговата визија за подобар живот во Крива Паланка остави траен белег врз заедницата и сите кои го познаваа. Неговата човечност, енергија и посветена работа ќе ги паметиме со огромна почит и благодарност. Во овие тешки моменти, нашите мисли се со неговото семејство, пријателите и соработниците. Нека почива во мир“, напиша на социјалните мрежи лидерот на СДСМ, Венко Филипче.
„Со длабока тага и неверување ја примив веста за смртта на нашиот другар и сопартиец Борјанчо Мицевски. Во овие тешки моменти, изразувам искрено сочувство до неговото семејство и сите блиски. Нека почива во мир“, напиша на Фејсбук пратеникот Оливер Спасовски.
Македонија
Нова спортска сала доби основното училиште „Наум Охридски“ во Булачани
Основното училиште „Наум Охридски“ во Булачани во општина Гази Баба, доби нова спортска сала. Во присуство на премиерот Христијан Мицкоски, министерката за образование и наука Весна Јаневска и градоначалникот Бобан Стефковски, објектот со површина од 550 квадратни метри, денеска беше пуштен во употреба. Станува збор за инвестиција од 29,7 милиони денари кои ги обезбеди локалната самоуправа.
Честитајќи им на учениците, наставниците и на локалните жители, министерката Јаневска информираше дека Владата има намера во текот на мандатот да изгради триесетина училишни спортски сали, а за две веќе договорите се потпишани.
– За да имаме здрави деца, здрави генерации, неопходна им е физичка активност. Освен за часови по физичко, салата ќе биде достапна и за воннаставни спортски активности, кои создаваат здрави животни навики и ги учат децата од најмала возраст на другарство и позитивен однос кон врсниците, соработка и почит кон другите, ги ангажираат децата со позитивни активности и со тоа ги намалуваат ризиците од застранување, рече Јаневска.
Таа посочи дека МОН е насочено кон градење на поквалитетно образование кое ќе им овозможи на учениците оптимално да ги развиваат знаењата, вештините и компетенциите за да можат подоцна да бидат достојни граѓани на Македонија.
– Затоа и сакаме во што повеќе училишта да создадеме услови за едносменска работа и продолжен престој на децата. Тоа е услов нашите ученици да можат да се натпреваруваат со нивните европски врсници, истакна министерката, додавајќи дека големите промени веќе се случуваат и дека ќе бидат исполнети сите ветувања дадени пред граѓаните, кои воедно се и дел од програмата за работа на МОН.
Македонија
Со банките е договорена каматна стапка од 1,95 проценти за унгарскиот кредит, најави Мицкоски
„Од неколку од банките веќе имаме потврда и очекувам најголем дел од нив да застанат зад проектот и конечно 250-те милиони евра од унгарскиот заем да бидат поделени на македонското стопанство“, порача денеска премиерот Христијан Мицкоски.
-Договорена е каматна стапка од 1,95 проценти, до три години грејс период и до 15 години рок на отплата во зависност од потребите на компаниите. Ценам дека е ова историски договор со историска најниска каматна стапка, рече Мицкоски во одговор на новинарско прашање по денешното пуштање во употреба на новата спортска сала во ООУ „Наум Охридски“ во скопското село Булачани.
Нагласи дека за да добијат кредит компаниите ќе треба да имаат минимум 20 отсто сопствено учество, а максималниот износ кој можат да го добијат е ограничен на 10 милиони евра.
-Тоа значи дека ќе имаме инвестициски бран од 300 милиони евра. Сите компании ќе имаат можност да ги вложат овие средства во основни средства за работа, во обновливи извори на енергија, како и во објекти кои ќе ги користат како свои административни згради, односно за сопствена потреба, рече Мицкоски.