Македонија
Поранешен јавен обвинител од Охрид обвинет за незаконско работење, заштитувал крадци
Струшкото Обвинителство до надлежниот суд поднесе обвинение против поранешен јавен обвинител од Основното јавно обвинителство Охрид за продолжено кривично дело несовесно работење во службата.
„Обвинетиот, во периодот од 19 ноември 2013 година до 25 ноември 2021 година, додека сè уште ја извршувал функцијата јавен обвинител во Основното јавно обвинителство Охрид, очигледно несовесно постапувал во вршењето на своите овластувања и должности поврзани со преземање или непреземање дејства по конкретни предмети. На тој начин тој овозможил пријавените кривични дела апсолутно да застарат за гонење и со тоа потешко ги повредил правата на други – подносителите на кривичните пријави и оштетени бидејќи тие пред истекот на рокот за апсолутна застареност на гонењето по пријавените кривични дела, не добиле одлука ниту за гонење на пријавените лица – со што биле скратени да си ги остварат своите права како оштетени во судска постапка ниту, пак, добиле одлука – решение за отфрлање на поднесените кривични пријави, со која оштетените би имале право на жалба за да ги остварат правата во претходна постапка“, соопшти Обвинителството.
По извршен вонреден надзор на Вишото јавно обвинителство Битола, врз работата на јавниот обвинител беа констатирани пропусти во постапувањето, при што беше задолжен да ги преземе неопходните дејства во предметите. Тој не постапи по задолжението од извршениот надзор, односно состојбата во предметите остана идентична.
Од тие причини против обвинителот беше поведена и дисциплинска постапка, во која Дисциплинската комисија донесе решение со кое за сторените тешки дисциплински повреди изрече дисциплинска мерка – предлог за разрешување на јавниот обвинител.
Во текот на кривичната постапка против јавниот обвинител беше утврдено дека на овој начин настапила застареност на вкупно 14 предмети во Основното јавно обвинителство Охрид:
– Предмет заведен во Основното јавно обвинителство Охрид на 19.11.2013 година против две осомничени лица за кривично дело кражба по член 235 став 1 од Кривичниот законик. Обвинетиот не презел никакво службено дејство во предметот сè до 4 ноември 2019 година кога настапила апсолутна застареност за гонење на осомничените за пријавеното кривично дело, а на овој начин потешко ги повредил правата на едно оштетено лице.
– Предмет заведен во Основното јавно обвинителство Охрид од 2014 година против едно лице за кривично дело – кражба на електрична енергија, топлинска енергија или природен гас по член 235-а став 1 од Кривичниот законик. Обвинетиот на 9.12.2014 година го испитал осомничениот на записник и истиот ден издал наредба за вештачење, но понатаму не презел никакво службено дејство во предметот поради што на 24.4.2018 година настапила апсолутна застареност за гонење на осомничениот за пријавеното кривично дело, а на овој начин потешко ги повредил правата на оштетеното правно лице „ЕВН Македонија“.
– Предмет заведен во Основното јавно обвинителство Охрид од 2014 година против едно лице за кривично дело – кражба на електрична енергија, топлинска енергија или природен гас по член 235-а став 1 од Кривичниот законик. Обвинетиот на 22.12.2014 година испитал двајца сведоци, но понатаму не презел никакво службено дејство во предметот поради што на 28.2.2019 година настапила апсолутна застареност за гонење на осомничената за пријавеното кривично дело.
– Предмет заведен во Основното јавно обвинителство Охрид од 2013 година против еден осомничен за кривично дело – кражба по член 235 став 1 од Кривичниот законик. Обвинетиот на 12.1.2015 година испитал тројца сведоци, но понатаму не презел никакво службено дејство во предметот поради што на 16.5.2019 година настапила апсолутна застареност за гонење на осомничениот за пријавеното кривично дело.
– Предмет заведен во Основното јавно обвинителство Охрид од 2013 година против едно лице за кривично дело – кражба по член 235 став 1 од Кривичниот законик. Во овој предмет обвинетиот јавен обвинител на 15.9.2015 година со решение на Вишото јавно обвинителство Битола бил задолжен постапката да ја продолжи, но по ваквото задолжение, не ги презел службените дејства. На 11.5.2017 година настапила апсолутна застареност за гонење на осомничениот за пријавеното кривично дело.
– Предмет заведен во Основното јавно обвинителство Охрид од 2014 година против едно лице за кривично дело – кражба на електрична енергија, топлинска енергија или природен гас по член 235-а став 1 од Кривичниот законик. Со решение на Вишото јавно обвинителство Битола од 29.9.2015 година обвинетиот бил задолжен постапката да ја продолжи, но по ваквото задолжение не ги презел службените дејства. На 30.7.2020 година настапила апсолутна застареност за гонење на осомничениот за пријавеното кривично дело.
– Предмет заведен во Основното јавно обвинителство Охрид од 26.7.2013 година против еден осомничен за кривично дело – кражба на електрична енергија, топлинска енергија или природен гас по член 235-а став 1 од Кривичниот законик. Иако со решение од 21.10.2015 година на Вишото јавно обвинителство Битола обвинетиот бил задолжен постапката по поднесената кривична пријава да ја продолжи, очигледно несовесно постапувал во вршењето на своите овластувања и должности како јавен обвинител, па по ваквото задолжение, не презел никакво службено дејство во предметот. Апсолутна застареност за гонење на пријавениот настапила на 25.1.2019 година.
– Предмет заведен во Основното јавно обвинителство Охрид од 2015 година по поднесена кривична пријава против еден осомничен за кривично дело – загрозување на сигурноста по член 144 став 2 во врска со став 1 од Кривичниот законик. На 18.11.2015 година обвинетиот упатил барање за податоци до ЈЗУ Општа болница Охрид, но понатаму не презел никакво службено дејство во предметот. На 10.4.2021 година настапила апсолутна застареност за гонење на осомничениот за пријавеното кривично дело со што потешко биле повредени правата на една оштетена.
– По предметот заведен во Основното јавно обвинителство Охрид во 2014 година против едно лице за кривично дело – кражба на електрична енергија, топлинска енергија или природен гас по член 235-а став 1 од Кривичниот законик, обвинетиот на 15.1.2016 година упатил покана за испитување до осомничениот. Понатаму не презел никакво службено дејство во предметот поради што на 17.5.2019 година настапила апсолутна застареност за гонење на осомничениот за пријавеното кривично дело.
– Предмет заведен во Основното јавно обвинителство Охрид од 2014 година против едно лице за кривично дело – кражба по член 235 став 1 од Кривичниот законик. Обвинетиот на 16.2.2016 година на записник испитал еден сведок и потоа не презел никакво друго службено дејство во предметот. На 24.11.2020 година настапила апсолутна застареност за гонење на осомничениот за пријавеното кривично дело.
– Предмет заведен во Основното јавно обвинителство Охрид во 2015 година против еден осомничен за кривично дело – кражба на електрична енергија, топлинска енергија или природен гас по член 235-а став 1 од Кривичниот законик. Со решение од 10.6.2016 година на Вишото јавно обвинителство Битола, обвинетиот бил задолжен постапката да ја продолжи, но по ваквото задолжение, не ги презел службените дејства со кои бил задолжен, а кои биле неопходни за донесување на јавнообвинителска одлука. На 11.3.2021 година настапила апсолутна застареност за гонење на осомничениот за пријавеното кривично дело.
– Предмет заведен во Основното јавно обвинителство Охрид во 2014 година по поднесена кривична пријава против двајца осомничени за кривични дела – незаконит риболов по член 229 став 1 од Кривичниот законик и кражба по член 235 став 1 од Кривичниот законик. Од 22.6.2017 година, кога со наредба му го вратил металниот чамец на сопственикот и издал две барања за казнени евиденции до Основниот суд Охрид, обвинетиот понатаму не презел никакво службено дејство во предметот. На 11.7.2018 година настапила апсолутна застареност за гонење за кривичното дело незаконит риболов, а на 11.7.2020 година апсолутна застареност за гонење и за кривичното дело кражба. Со ова обвинетиот потешко ги повредил правата на државата во поглед на заштита на рибниот фонд, како и на едно оштетено лице.
– По предмет заведен во Основното јавно обвинителство Охрид во 2015 година против еден осомничен за кривично дело кражба по член 235 став 1 од Кривичниот законик, обвинетиот на 22.6.2017 година го испитал осомничениот на записник. Понатаму не презел никакво службено дејство во предметот поради што на 20.5.2021 година настапила апсолутна застареност за гонење на осомничениот, со што потешко биле повредени правата на оштетено правно лице „ЛТХ Леарница“ ДООЕЛ Охрид.
– Предмет заведен во Основното јавно обвинителство Охрид по поднесена кривична пријава од 2.12.2016 година против три лица од Охрид за кривично дело давање лажен исказ од член 367 став 1 и член 367 став 3 од Кривичниот законик. Обвинетиот во својство на јавен обвинител на 10.2.2020 година издал наредба за вештачење до вешто лице, но понатаму не презел никакво службено дејство во предметот. Како резултат на ова во 2021 година настапила апсолутна застареност за гонење на осомничените.
Постапката во овој предмет ја води Основното јавно обвинителство Струга бидејќи Основното јавно обвинителство Охрид побара изземање со оглед на тоа што обвинетиот го сторил кривичното дело во својство на јавен обвинител во тоа Обвинителство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Костадиновска-Стојчевска: Законот за верските училишта отвора многубројни нејасности и институционални проблеми
СДСМ изразува сериозна загриженост по однос на предлог-законот со кој верските училишта добиваат статус на средни училишта, а нивните дипломи стануваат признати за запишување на високо образование. Иако не поднесовме амандмани, оценивме дека во предлог-законот постојат повеќе суштински нејаснотии и недоречености, кои може да отворат нови правни и институционални проблеми, рече пратеничката на СДСМ, Бисера Костадиновска Стојчевска, на денешната седница на Комисија за образование, наука и спорт.
Костадиновска посочи дека законот влегува во Собранието без јавна дебата, а граѓаните имаат право да знаат кои образовни модели ќе бидат легитимирани под државна капа. Тука се отвора прашањето за секуларноста и финансиската контрола на ваквите училишта.
– Иако државата формално не ги финансира овие училишта, загрижува отсуството на механизми за контрола и увид во финансирањето и содржините што ќе се изведуваат. Тоа отвора простор за непознати влијанија и непрегледност во функционирањето на овие образовни институции, рече Костадиновска-Стојчевска.
Таа укажа и на фактот дека засега има отсуство на јасни критериуми за образовната содржина и според достапните информации, наставата во богословските и исламските училишта вклучува верски предмети изведувани од свештени лица, додека основните образовни и педагошки дисциплини се минимално застапени или нејасно дефинирани. Оттука, се поставува прашањето: дали овие ученици ќе имаат адекватна подготовка за да продолжат кон наставнички или други стручни факултети?
– Уставниот поредок мора да се почитува. Република Македонија е секуларна држава. Според амандманот 7 од Уставот државата мора да биде неутрална во однос на религијата, а верските заедници и државата се одвоени. Секоја легислатива што го доведува овој принцип во прашање мора да се разгледа со особена претпазливост. Автономијата на верските заедници е загарантирана, но со влезот на овие училишта под државна капа, тие мора да ги следат државните образовни стандарди и критериуми, констатираше пратеничката на СДСМ, Бисера Костадиновска Стојчевска.
Македонија
„Вреди“: ДУИ јавно ја призна вината за бришењето на дијаспората
Денес, пред очите на јавното мислење и медиумите, Демократската унија за интеграција јавно ја призна вината за една од најсериозните и неуставни неправди врз Албанците од Северна Македонија, бришењето на дијаспората од пописот на населението во 2021 година преку скандалозната методологија што ги подели жителите на резиденти и нерезиденти, велат од „Вреди“
Наместо да дадат отчет за овој сериозен политички и национален чин, како што истакнуваат во реакцијата, тие избегнаа каква било одговорност, молчејќи за фактот дека пописот е спроведен во време кога ДУИ беше на власт и имаше свој претставник во Државниот завод за статистика.
„Зошто ја избришавте албанската дијаспора од пописот?
Која беше валканата политичка зделка што ја направивте и со кого?
Зошто ги исклучивте Албанците од дијаспората од донесувањето одлуки кои со децении придонесуваат за оваа земја?“, прашуваат од „Вреди“.
Според нив, тоа е невиден чин, со кој се нарушува фундаменталното право на дијаспората да биде составен дел од албанскиот народ во Северна Македонија, не само емоционално, туку и правно и институционално.
„Сега е јасно: ДУИ, заедно со своите нонграти пријатели, не само што молчеа за оваа неправда четири години по ред, туку денес признаа дека биле коорганизатори на овој неправеден процес, а притоа не дадоа никаков одговор за нанесената штета.
Додека Албанците од дијаспората беа изоставени, ДУИ денес прави нови пазарења за заеднички листи на локалните избори. Дали ова е предупредување за нов таен договор меѓу ДУИ и нејзините патерици? Со овој договор, дали новите сојузници ја амнестираа ДУИ за овој срамен чин“.
Од „Вреди“ велат дека таквите неправди нема да останат неказнети.
Во октомври 2025 година, како што додаваат, најсилниот одговор ќе дојде од граѓаните и дијаспората, кои ќе изберат еднаквост, правда и достоинствено претставување, а не пазарење и манипулација.
„Вреди“ ќе продолжи да ја потсетува албанската јавност на сите антиалбански одлуки на претходниот режим. Оние кои ја исклучија дијаспората ќе бидат исклучени и од локалната власт. И тоа ќе го сторат граѓаните со својот глас, додаваат од оваа партија.
Македонија
Дали пироманите и некрофилите од СДС се радуваат на пожарите и мислат дека ќе помине паниката која ја прават во државата со фотографии од пожари во Шпанија, прашуваат од ВМРО-ДПМНЕ
Пироманската и некрофилската СДС сака да создаде некаква паника и хистерија помеѓу народот и дава се од себе да направи некаква слика дека Владата не се справува со пожарите, нешто во кое што никој не им верува, велат од ВМРО-ДПМНЕ.
СДС, додаваат од партијата на Мицкоски, тоне во својата безидејност и немајќи како да докажат дека Владата предводена од ВМРО-ДПМНЕ не се справува со пожарите, користат слики од пожари во Шпанија за да пробаат некако да си ја потврдат тезата.
„Во Бугарија има над 240 пожари, во Грција над 50, во Турција над 80, во Албанија над 40, во Косово на 10тина. Се евакуираат граѓани од местата каде што имаат пожари, се повикуваат ЕУ механизмите, надлежните институции и пожарникарите се 24 часа на терен и цел Балкан е на силен удар на високи температури и пожари кои уништуваат куќи, имоти, земјоделски површини. Во неколку од овие држави имаме дури и жртви.
Од друга страна пак, во Македонија имаме 8 активни пожари, 7 под контрола и 36 изгаснати пожари. Тоа значи дека надлежните реагираат брзо и ефикасно. Тоа значи дека она што го говорат пироманите и некрофилите од СДС, не е воопшто точно“, се истакнува во информацијата од партијата на власт.
Според нив, граѓаните знаат дека СДС изминатите 7 години не успеа да се справи со пожарите, а Владата предводена од ВМРО-ДПМНЕ ги користи сите механизми кои се пристапни да ги изгаснат пожарите и успешно се справува.
„Прашањето е, дали СДС со ова сака да го покрие сомнежот дека лица блиски до нив имаат некакво учество во подметнувањето на пожарите, кои за среќа веднаш се локализираат, ставаат под контрола и гасат.
Следен пат кога пироманите и некрофилите од СДС ќе говорат за пожари и неуспеси, нека се обидат барем сликата да биде од Македонија“.
И јас ќе ги прашам Фетаи и Меџити дали користеле службени возила за приватни или партиски цели, вели Мицкоски
Десет дена по медиумските објави, во кои се гледаат службени возила на вицепремиерите Изет Меџити и Арбен Фетаи нешто пред...
Мицкоски за интерпелацијата на Коцевски: Јас не ги менувам ставовите преку ноќ
На еден ден пред расправата за интерпелацијата на државниот јавен обвинител Љупчо Коцевски, поднесена од партијата Левица, премиерот Христијан Мицкоски...
Споменик на Андон Лазов Јанев-Ќосето поставен на кружниот тек во Автокоманда
Споменикот на Андон Лазов Јанев – Ќосето, кој беше отстранет од пред комплексот судови, е поставен на кружниот тек во...
(Видео) Македонски судија нападнат на кадетското Европско првенство во бокс
Извор и фото/ b92.net Заврши Европското првенство за кадети и кадетки (ученици на возраст од 13 и 14 години), кое...
Во изминатото деноноќие имало 51 пожар во Македонија, денеска активни осум
Во текот на изминатото деноноќие, 27/28.07, на територијата на Република Северна Македонија се регистрирани вкупно 51 пожар, од кои осум се...
Рубио: Трамп го губи трпението со Путин, размислува за драстични мерки
Претседателот на САД, Доналд Трамп, е сè повеќе фрустриран од недостатокот на напредок на Русија кон мировниот договор и сега...
Вучиќ: Србија нема да воведе санкции против Русија
Претседателот на Србија, Александар Вучиќ, изјави дека Србија нема да воведува санкции кон Русија и дека ќе се држи до...
САД и ЕУ постигнаа договор за царините
Соединетите Американски Држави и Европската Унија постигнаа рамковен трговски договор, објавија американскиот претседател Доналд Трамп и претседателката на Европската комисија,...
Паника во Катланово и Петровец поради голем пожар, Ангелов смирува дека нема опасност да се запали бензинската
Попладново пожар изби и помеѓу Катланово и Петровец. Директорот на Дирекцијата за заштита и спасување Стојанче Ангелов вечерва во видео-изјава...
И војниците на АРМ ќе се вклучат во гаснење на пожарот во кривопаланечкото село Нерав
Пожарот во кривопаланечкото село Нерав уште е активен, на терен се повеќе екипи на територијалните противпожарни единици од Крива Паланка...
Силувани деца на возраст од 3 и 10 години во Гостивар, мајката ги снимила и видеото го пратила на таткото
Основното јавно обвинителство Гостивар донесе Наредба за спроведување истражна постапка против мајка од гостиварско за која постои основано сомнение дека...
Ангелов: До 13:30 часот се евидентирани 16 пожари на отворен простор
До 13:30 часот на 27 јули 2025 година, на територијата на државата се евидентирани вкупно 16 пожари на отворен простор,...
Хеликоптерска акција во Штип: Полициски службеници спасија повреден војник од борбата со пожарот
Во време кога летните горештини го зголемуваат ризикот од пожари, а бројот на активни огнени жаришта се зголемува ширум државата,...
Шумскиот пожар во Крива Паланка се шири кон куќите, екипите се на терен
Шумскиот пожар што од вчера напладне зафати над 50 хектари борова шума во кривопаланечкото село Нерав, според информациите од Општина...
Пожарникарите неуморно и секојдневно на терен, во едно деноноќие се гасеа 33 пожари
Во текот на изминатото деноноќие евидентирани се вкупно 33 пожари на отворен простор, од кои 12 се активни, пет се...
Двегодишно девојче најдено мртво на плажа во Грција
Девојче на околу двегоишна возраст е пронајдено мртво на плажа во атинското предградие Палео Фалиро во неделата наутро, пренесуваат грчките...
Чекање до 45 минути на Табановце и Пелинце, а на Богородица околу 30 минути
Со зголемувањето на летните одмори и интензивните туристички патувања, на македонските гранични премини повторно се бележат големи гужви. Најголемиот притисок...
Поради гладување 90.000 жени и деца итно имаат потреба од медицинска интервенција во Газа
Секој трет жител на Појасот Газа со денови не добива храна, предупреди Светската програма за храна (WFP) на Обединетите нации....
Големиот пожар кој избувна попладнево во близина на Струмица е под контрола
Големиот пожар кој избувна попладнево во близина на Струмица меѓу Градските гробишта и селото Баница и зафати огромна површина и...
Анегелов: Пожарот на Готен не може да загрози ниту едно село
На територијата на целата земја денеска има шест активни пожари, а најтешкиот и најспецифичен е пожарот на планината Готен, на...
