Македонија
Грковска-Јовановиќ: Дигитализацијата е значаен процес во сите земји од регионот, неопходна е меѓусебна соработка
Во рамките на Меѓународната конференција „Партнерство за конкурентен регион“, што се одржува во Дубровник, Хрватска, заменичката на претседателот на Владата задолжена за политики за добро владеење, Славица Грковска, имаше средба со Михајло Јовановиќ, директор на Канцеларијата за информатички технологии и електронска администрација (Е-Управа) на Владата на Србија.
На состанокот вицепремиерката Грковска го потенцираше значењето од дигитална трансформација на општеството, кое е предуслов за брзи и квалитетни услуги за граѓаните, но и нејзината важност како алатка за ефикасни антикорупциски политики.
„Станува збор за процес кон кој се насочени сите земји во регионот и во светот и од тој аспект во заеднички интерес е да има меѓусебна соработка и размена на позитивните искуства“, оцени Грковска.
Двајцата соговорници разговараа за воведувањето на електронска лична карта, што, како што оценија, е најважниот чекор за успешна дигитална трансформација на општеството.
Вицепремиерката Грковска информираше дека Владата на Северна Македонија, со поддршка на естонскиот Центар за меѓународна соработка и САД, работи на воведување на електронска лична карта и на нов закон за архивска дејност.
Директорот Јовановиќ нагласи дека Србија веќе вовела електронска лична карта, но и за други дигитални решенија, како и дека во моментов работат на нов закон за електронска управа.
Вицепремиерката Грковска информираше дека, со цел да има координиран и инклузивен пристап, на нејзина иницијатива е формиран Национален совет за дигитална трансформација на општеството, во кој покрај надлежните министри, вклучени се и претставници од стопанските комори, локалната самоуправа, како и од опозицијата, со цел да се обезбеди одржливост и континуитет на целиот процес.
На крајот на средбата беше договорено двете држави да ја продлабочат соработката во однос на дигиталната трансформација на општествата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Радев: Преговорите помеѓу Бугарија и Северна Македонија завршија пред две години
Преговорите меѓу Бугарија и Северна Македонија завршија во јули 2022 година, кога двете земји го потпишаа билатералниот протокол по Договорот за добрососедство и соработка, изјави бугарскиот претседател, Румен Радев, кој смета дека нема потреба од посредништво во дијалогот помеѓу Македонија и Бугарија.
Со овие зборови тој одговори на прашање за изјавата на премиерот на Христијан Мицковски, дека е подготвен за преговори со бугарскиот претседател.
Радев посочи дека секогаш бил отворен за дијалог, но мора да се прави разлика меѓу дијалог и преговори.
„Преговорите меѓу Бугарија и Северна Македонија завршија во јули 2022 година, кога двете земји го потпишаа билатералниот протокол по договорот за добрососедство и соработка“, рече Радев, пренесува „Новини.бг“.
Според него, доколку се зборува за дијалог, тој треба да се води меѓу Северна Македонија и Европската комисија и врз основа на преговарачката рамка за Северна Македонија усвоена во исто време.
„Дијалогот е таму, а се работи за условите што мора да ги исполни Северна Македонија, за да можат да почнат преговорите за членство на земјата во ЕУ“, додаде.
Радев истакна дека Бугарија може и треба да помогне во овој процес, за Северна Македонија побрзо и поефективно да ги исполни условите и самоуверено да го тргне својот европски пат.
Македонија
Уште еден земјотрес почувствуван во Македонија
Земјотрес со јачина од 3,6 степени според Рихтеровата скала вечерва е регистриран во близина на граничните премини помеѓу Македонија, Косово и Србија.
Според информациите на ЕМСЦ земјотресот се случил на длабочина од 10 километри, на 9 километри од Врање.
Граѓаните веднаш се огласија на социјалните мрежи и, како што велат, ова е четврти земјотрес од синоќа.
„Добро удри! Немаше нишање, повторно вертикално“, сведочи граѓан на Врање кој го почувствувал потресот, пренесува „Б92“.
„Силно, но кратко“, се дел од коментарите на корисниците на EМСЦ.
Земјотресот бил почувствуван во делови од Македонија, Србија, Косово и Бугарија.
Претходно утрово, земјотрес со јачина од 4 степени според Рихтеровата скала ја погоди јужна Србија, а беше почувствуван и во Македонија и во Бугарија.
Македонија
Огромни гужви на грчко-македонската граница: „Се чека и до три часа“, се жалат граѓани
Колони возила има попладнево на граничниот премин Еврзони од грчка страна, додека голем број македонски граѓани се враќаат од продолжениот празничен викенд кој го поминаа на туристичките места во Грција.
Според информациите од АМСМ, за влез во земјава се чека повеќе од еден час.
Граѓани пак, сведочат дека чекаат и до три часа.
„Колони има до патарина“, се жалат македонските туристи.
Гужви има и на велешката патарина, а колона возила стои во место и на влезот на Гостивар од „Стража“.
Според последните информации, на Табановце времето за чекање веќе е намалено откако претходно денес и таму беше забележано зголемено движење.
(Фото: архива)