Финската премиерка Сана Марин изрази увереност дека има широка поддршка во парламентот за изградба на ограда на границата на Финска со Русија. Изградбата на ограда на границата е предлог на финската гранична стража.

„Се работи за обезбедување на соодветен надзор на источната граница на Финска во иднина“, им рече на новинарите премиерката Сана Марин пред состанокот со парламентарните групи за прашањето за граничната ограда, пишува АП.

Финските граничари претходно предложија покривање на делови од границата долга 1.340 километри што Финска ја дели со Русија, најдолга од која било земја членка на ЕУ. Сметаат дека тоа ќе им помогне да спречат евентуални големи и илегални миграции.

Врз основа на анализа на ризик од страна на граничните службеници, оградата би била долга до 260 километри и би ги покривала областите за кои е утврдено дека се изложени на ризик за голема миграција од Русија.

Главните делови од оградата ќе бидат подигнати во југоисточна Финска, каде што се одвива најголемиот дел од граничниот сообраќај кон и од Русија. Сепак, некои делови веројатно ќе бидат изградени околу граничните пунктови на север.

Изградбата на оградата би траела до четири години и се очекува да чини неколку стотици милиони евра, според финската новинска агенција STT. Финските медиуми објавија дека проектот е поддржан од партиите во коалициската влада на левиот центар и опозицијата.

Наскоро ќе биде донесена одлука за пробниот дел од оградата, долг околу три километри, кој ќе се изгради брзо, но одлуката за целиот проект за оградата може да биде одложена до следната влада бидејќи во Финска ќе се одржат избори во април 2023 година.