Македонија
Маричиќ од Стразбур: На ЕУ ѝ се потребни јасен план и стратегија за проширување
Заменик претседателот на Владата задолжен за европски прашања, Бојан Маричиќ учествување на панел дискусијата во рамки на Европскиот самит во Стразбур, на тема „Дали Европа ќе ги преживее кризите?“, на кој рече дека само обединета, одлучна, со јасен план и стратегија ЕУ ќе успее да ги надмине предизвиците со кои се соочува во моментот.
– Новата реалност која ја живееме и ние и ЕУ бара конкретни чекори и одлуки кои ќе нè прават поединствени и ќе нè водат напред. Само со правилни одлуки и јасен стратешки план за проширување Европската Унија ќе ги надмине сегашните предизвици, рече Маричиќ.
На панелот се отвори дебата за кредибилитетот на ЕУ и влијанието во земјите на Западен Балкан, особено последните години, како последица од пасивноста на политиката на проширување, на која вицепремиерот Маричиќ одговори дека довербата на граѓаните во Европската Унија е најважна и мора да се работи да ја вратиме, потенцирајќи дека анкетите говорат за пад на поддршката за членство на Северна Македонија во ЕУ и дека постои неверување дека ќе станеме членка во кој било момент.
На истото прашање, Каролине Ештадлер, федералната министерка за ЕУ и Устав на Австрија рече дека проширувањето не е прашање на брзина, туку на кредбилност на ЕУ и дека долго време настрана беше држена политиката на проширување, нагласувајќи дека Австрија останува поддржувач на интеграцијата на земјите од Западен Балкан во ЕУ.
Канцеларот на Австрија, Карл Нехамер, рече дека е за голема почит и поздравување чекорот што го направи Северна Македонија и што ги започна преговорите со Унијата.
– Ние сме мостот со Западен Балкан и треба уште поинтензивно да се посветиме на него. Напредок мора да има во земјите од регионот. Ќе биде долготраен процес, но мора да им докажеме дека сме заинтересирани за нив, рече Нехамер.
Вицепремиерот Маричиќ на панелот говореше и за важноста од членството во НАТО, која се потврдува во овие денови на војна на тлото на Европа и кога земји како Финска и Кралството Шведска чекаат да станат дел од најголемиот воен сојуз.
– Направивме голема жртва за членство во НАТО и ги потврдивме нашата искрена намера и решителност во исполнувањето на стратешките цели на државата. Покажавме во овие моменти дека сме и доверлив партнер на ЕУ со 100% усогласеност со надворешната политика на ЕУ. Сега очекуваме и ЕУ да биде прва во поддршката и помошта со справувањето со кризите, истакна Маричиќ.
Вицепремиерот Маричиќ рече дека единствена опција за нашата земја е Унијата која сè уште е најдобриот мировен, политички и економски проект за целиот континент.
– Немаме подобра опција. Сè уште е мировен проект, инаку не би го поставувале денеска прашање дали Украина треба да биде дел од Европската унија. Западен Балкан, исто така, беше турбулентен регион. Но со влегувањето во ЕУ, ќе биде запечатена темата за нашиот просперитет, безбедност и стабилност, додаде вицепремиерот.
На панелот заедно со Маричиќ учествуваа и Никола Беер, Заменик претседателката на Европскиот парламент, Петер Лаунски-Тиефентал, Генерален секретар на Министерстото за надворешни работи на Австрија, Лилиана Павлова, заменик претседателка на Европска инвестициска банка и Марко Штуцин, Државен секретар за европски работи и меѓународно право на Словенија.
На маргините на Европскиот самит, Маричиќ оствари средби со еврокомесарот за буџет и администрација, Јоханес Хан, со генералениот секретар на Министерстото за надворешни работи на Австрија, Лаунски-Тиефентал и Александар Симурдиќ, директор на Фондот за европски прашања на АП Војводина.
Европскиот самит се одржува по 18-ти пат оваа година, од 23-ти до 25-ти октомври 2022 година, а годинава темата е Европа и мир: „Визии за Европа: Очекувања и реалност“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Топлотен бран во Македонија: Бремените и лицата над 60 години да се ослободат од работа, децата да не излегуваат на отворено до 17 часот
Владата на барање на Министерството за здравство, одржа вонредна седница, поради најавите за топлотен бран во државата и донесе соодветни препораки.
Од Институтот за јавно здравје и метео-алармот на Управата за хидрометеоролошки работи се добиени информации дека од утре (среда, 19.06.) до недела (23.06) територијата на цела држава ќе биде зафатена од топлотен бран – портокалова фаза, со што ќе важат препораките за намалување на ризиците од високи температури, согласно Акцискиот план на Министерство за здравство за превенирање на последиците од топлотни бранови врз здравјето на населението.
Согласно ова, на предлог на Министерството за здравство се донесени следните заклучоци за периодот од 19 до 23 јуни за целата територија на државата:
1. Ослободување од работните обврски на најранливите групи население, поточно: бремените жени и лицата на возраст над 60 години;
2. Во установите за згрижување на децата (градинки) да не се практикува физичка активност и да не ги изнесуваат децата на отворено во периодот од 11:00 до 17:00 часот;
3. Единиците на локалната самоуправа, Црвен крст и центрите за социјални работи, во регионите зафатени со топлотниот бран да пружаат помош на осамени, стари, изнемоштени лица, бездомни лица;
4. Со оглед на фактот дека одредени ризични производни и технолошки процеси може да претставуваат дополнителен ризик по здравјето на изложените работници се потсетуваат работодавците на обврската за почитување на законските прописи од оваа област.
Македонија
(Видео) Спасовски: Каде што има големи ветувањата, одете со мала торба, предлогот за влада е без план во економијата и стратешките цели
Од она што денеска беше соопштено во јавноста при поднесувањето на предлогот за работа и состав на новата влада јасно е дека не постои јасен план во делот на економијата, нема јасни правци за стратешките интереси, а кадровскиот потенцијал што се нуди не одговара на очекувањата на граѓаните, рече денеска во изјава за медиумите координаторот на пратеничката група на СДСМ, Оливер Спасовски.
„Од поднесениот предлог за состав на новата влада може да се констатира дека се продолжува во насока на големи ветувања и напразно кревање на очекувањата на граѓаните. Во суштина, важи народната: каде што имаат големи ветувања, одете со мала торба“, рече Спасовски.
Не постои јасен план во делот на економијата, додаде тој.
„Не постои јасен план во делот на економијата. Како и на кој начин ќе се заштити минималната плата? Како ќе расте просечната плата во државата? Нема детален план како ќе растат пензиите и кој ќе биде системот на гарантирање на растот на пензиите. Како ќе се стопираат зголемувањата на цените, што ќе се прави во делот на здравството како еден од клучните сегменти“, посочи Спасовски.
За жал, немаме ниту јасни правци за исполнување на нашите стратешки интерери, членството во ЕУ, освен декларативните, потенцира Спасовски.
Кадровскиот потецнијал што се нуди не може да одговори на очекувањата на граѓаните ниту, пак, на ветувањата што беа дадени во предизборниот период, додаде тој.
„Ова ќе биде влада која е составена, од една страна, со кадри што креираа политики во еден период на вледеењето на режимот на ВМРО-ДПМНЕ до 2017 година, кои не може да понудат ништо ново или подобро од она што било во тој период. Од друга страна, кадри што не биле на позиции и за кои не можеме да кажеме како ќе постапуваат. Има предложени кадри за кои самата ВМРО-ДПМНЕ имаше многу негативни ставови и мислења како опозиција. Се сеќавате на изјавите за кандидатот за министер за здравство, така што сето тоа уште еднаш потврдува дека нема реалност во ветувањата. Детаљно ќе ја анализираме програма и на седницата за избор на влада ќе дебатираме со факти и аргументи“, рече пратеникот Оливер Спасовски денеска во изјава за медиумите во македонското Собрание.
Македонија
Мицкоски на средба со амбасадорот на УНДП, Григоријан: Констатирани континуираната поддршка и можноста за уште повеќе заеднички проекти со владата на ВМРО-ДПМНЕ
Претседателот на ВМРО-ДПМНЕ, Христијан Мицкоски, заедно со предлог-министерот за локална самоуправа, Златко Перински, денеска оствари средба со амбасадорот и постојан претставник на УНДП, Армен Григоријан, и Билјана Цветановска-Гугоска, раководителката на секторот за демократско владеење во УНДП.
На средбата се разговараше за идните чекори на владата предводена од ВМРО-ДПМНЕ, како и за проектите што би се реализирале во рамките на Министерството за локална самоуправа, а би ги опфатило локалните самоуправи.
Воедно, беа констатирани добрата соработка, како и помошта и поддршката на УНДП, кои во континуитет ги дава во Македонија, и нивната исклучителна важност во земјата.
Претседателот Мицкоски се заблагодари на досегашната соработка и потенцира дека во иднина со владата на ВМРО-ДПМНЕ постои можност за нивно продлабочување и реализирање уште поголем број заеднички проекти.