Култура
Актерите Дарја Ризова и Саша Ханџиќ најдобри на Интернационалните театарски средби
![](https://makfax.com.mk/wp-content/uploads/2022/10/мнт.jpg)
Актерите на камерната драма „Нема да биде крај на светот“ Дарја Ризова и Саша Ханџиќ повторно најдобри, овој пат на ИНТЕРНАЦИОНАЛНИТЕ ТЕАТАРСКИ СРЕДБИ БРЧКО ДИСТРИКТ, БиХ.
На ИНТЕРНАЦИОНАЛНИТЕ ТЕАТАРСКИ СРЕДБИ БРЧКО ДИСТРИКТ, Брчко, БиХ, одржани од 20.10. – 28.10.2022 година, стручното жири во состав: Жељко Митровиќ, актер; Емина Муфтиќ, актерка; Драган Деспот, актер;
одлучи наградата за најдобра млада актерка да ја додели на Дарја Ризова за улогата на Маша, а наградата за најдобра споредна улога (актер или актерка), едногласно му беше доделена на Саша Ханџиќ за улогата на Таткото, а воедно Ханџиќ е добитник и на наградата за најдобра машка улога за улогата на Вања во претставата „Куќа“.
Ова е една хармонично изградена претстава, драматуршки склопена и режисерски заокружена само со тројца актери, но до сега претставата „Нема да биде крај на светот“ се одигра на 6 (шест) интернационални фестивали каде што од секој еден освои награди: специјална награда за режија на Нина Николиќ, најдобра актерка Дарја Ризова, најдобар актер Саша Хаџиќ и специјална награда за актерката Џана Џаниќ, на фестивалот „Живи фест“, БиХ.
Дарја Ризова – најдобра актерка на меѓународно ниво на фестивалот во Бурса, Р Турција, најдобра регионална актерка на фестивалот на актерот во Коњиц, БиХ, исто така, Ризова стана и дел од историјата на ФКТ „Ристо Шишков“ како најдобра актерка за улогата на Маша.
На фестивалот „БиХ драма Зеница”- БиХ, претставата беше прогласена за најдобра претстава во целина.
Претставата до сега има добиено вкупно 11 (единаесет) награди.
Претставата е копродукциски проект меѓу Македонскиот народен театар, Перипетија продукција – Скопје и Сараевскиот воен театар САРТР – Сараево.
Следната изведба е закажана на 8 ноември во Македонскиот народен театар со почеток во 20:00 часот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Култура
„Паланечка дума“: вечер на локалните книжевните автори од Крива Паланка
![](https://makfax.com.mk/wp-content/uploads/2024/07/449949579_789608426704549_3550974609986394428_n.jpg)
Вечерва, 8 јули, со почеток во 20 часот, летната сцена на градскиот плоштад, ќе биде средиште на културниот настан „Паланечка дума“, кој ги обединува кривопаланечките книжевни таленти и автори.
Оваа специјална вечер е посветена на сите роднокрајни автори, кои со своите дела во белетристика – поезија, романи и драми, ја збогатиле литературната збирка на градот. Од вкупно 30 автори, кои живеат во Крива Паланка или имаат кривопаланечко потекло, пред публиката ќе се претстават 20 локални творци од разни генерации, со извадоци од творештвото на веќе публикувани дела.
Специјлен гостин е младата и талентирана Нина Николовска од Крива Паланка, која ќе ја збогати литературната вечер со интерпретација на неколку музички нумери.
Сите заинтересирани љубители на книжевноста се поканети да го доживеат овој уникатен момент заедно со авторите и да уживаат во вечерта полна со инспирација и културно богатство.
Настанот е дел од манифестацијата „Крива Паланка – град на културата 2024“ и Кривопаланечко културно лето.
Култура
Македонската филхармонија ќе го отвори Охридско лето со ѕвездата Џулијан Рахлин
![](https://makfax.com.mk/wp-content/uploads/2024/07/Julian-Rachlin.jpg)
НУ Филхармонија на РСМ ќе учествува на годинешното свечено отворање на фестивалот Охридско лето.
На 12 јули во прекрасното здание на Античкиот театар во 21 часот, заедно со оркестарот на Филхармонијата, ќе настапи светската музичка ѕвезда, виолинистот Џулијан Рахлин, кој наедно ќе се претстави и како диригент. На програмата се познатиот Концерт за виолина и оркестар во e-moll оп. 64 од германскиот композитор Феликс Менделсон, како и класичната Увертира фантазија „Ромео и Јулија“ од рускиот композитор Петар Илич Чајковски.
Џулијан Рахлин, инаку, првпат настапи со Македонската филхармонија во 2017 година, на божиќниот концерт, кој се одржа на 7 јануари напладне.
Виртуозот на виолина Џулијан Рахлин е музички раководител на Симфонискиот оркестар на Ерусалим, шеф-диригент на Симфонискиот оркестар во Кристиансанд и прв гостин диригент на Филхармонискиот оркестар во Турку. Над 30 години неговата кариера го носи на сите светски меридијани како диригент, солист, камерен музичар, педагог и уметнички раководител. Снимките што критиката ги оценува како исклучителни престижните издавачки куќи „Дојче грамофон“, „Сони класикал“ и „Ворнер класикс“ ги издаваат на носачи на звук.
Рахлин е исто така и баран диригент во целиот свет. Во изминатите неколку сезони настапува со симфониските оркестри во Чикаго, Бирмингем, Виена, како и со Европскиот камерен оркестар, Кралската филхармонија во Лондон, Израелската филхармонија, филхармониските оркестри во Осло и Хелсинки, Кралската филхармонија во Ливерпул и Берлинскиот Концертхаус оркестар.
Осум децении непрекинато музицирање. Осум децении љубов, страст, неверојатна енергија, уметничка сплотеност. Осумдесет години поминати во прекрасни патешествија заедно со брилијантни музички умови – илјадници солисти и диригенти кои со себе донесоа илјадници дела од славните музички мајстори, подарувајќи нѝ различни емоции, креации, хармонии, мелодии, ритми. Годинава, Македонската филхармонија одбележува 80 години од постоењето под мотото – 80 години љубов. Ова е првиот и единствен симфониски оркестар во Република Северна Македонија, а со тоа и единствен постојан репрезент на симфониското творештво на македонската музичка сцена. Во последните декади особено, институцијата го подмлади оркестарот и со тоа внесе нов елан и ентузијазам и силна желба за работа. Денес, звукот е издигнат на високо квалитативно скалило, а својата програма редовно ја збогатува со комплексни и нови, современи дела, кои се предизвик и за светските симфониски оркестри. Инвентивниот и креативен репертоар е во баланс со традиционалните музички вредности и токму тоа ја привлекува публиката, особено новите генерации на слушатели. Оркестарот е формиран на 24 ноември во 1944 година, по завршувањето на Втората светска војна и само 11 дена по ослободувањето на Скопје. На ул. „Крушовска“ бр. 27, во домот на композиторот Тодор Скаловски, еден од стожерите на македонската музичка култура, се одржал првиот состанок на група музичари со цел да формираат симфониски оркестар, да го формираат првиот Државен оркестар, да ги стават темелите на една голема културна институција, прва од таков вид во ослободена Македонија. Создавањето на Филхармонија во едно такво време-невреме е всушност револуција во духовната смисла на зборот. Од тие скромни почетоци, па сè до денес, во осумдецениското постоење, Филхармонијата остварила незаборавни концертни мигови исполнувајќи широк репертоар од светската класична музичка литература, како и светски премиери од современи автори, оживувајќи ги со особена гордост и делата на македонските музички творци.
Култура
Вечерва на Скопско лето концерт на фаготистот Зоран Митев
![](https://makfax.com.mk/wp-content/uploads/2024/07/zoran-mitev.jpg)
Во рамките на јубилејното 45. издание на манифестацијата Скопско лето, вечерва, 8.7.2024 г., ќе се одржи концерт на фаготистот Зоран Митев по повод 40 години уметничка кариера, со почеток во 20. 30 ч во Музејот на македонската борба.
Настапуваат: Зоран Митев – фагот, членови на Уметничкиот центар „Полифонија“ – Скопје, Сања Шуплевска и Александра Колевска – виолина, Сашка Крстиќ – виола, Игор Шкерјанец – виолончело, Ѓорѓи Цинциевски – контрабас.
На концертот ќе бидат изведени дела од Гордон Џејкоб – Суита за фагот и гудачки квинтет, Томислав Зографски – Суита оп. 60 за гудачки квинтет, Ларс – Ерик Ларсон – Кончертино за фагот и гудачки квинтет, Драган Чуплевски – Капричо за гудачки квинтет и други.