Македонија
Мицкоски: Власта за еден квартал успеа да го зголеми долгот на Македонија за 400 милиони евра

„Ако ја анализирате макроекономската слика на Македонија, ќе видите дека во третиот квартал, тоа се три месеци, од 30 јуни до 30 септември, државниот долг е зголемен за 400 милиони евра, внимавајте 400 милиони евра. А јавниот долг за тој квартал е зголемен за 422 милиона евра. Ете така тие се справуваат со кризата со нашите пари“, истакна денеска претседателот на ВМРО-ДПМНЕ, Христијан Мицкоски, од Битола.
Мицкоски додаде дека власта не знае да се справи со кризата, а за тоа е доказ и третиот квартал, каде што државниот долг се зголемил за 400 милиони евра, а јавниот долг се зголемил за 422 милиона евра.
„Од власта ги трошат вашите пари за да склучуваат договори во четири очи“, рече Мицкоски.
Претседателот на ВМРО-ДПМНЕ посочи дека власта за еден квартал успеа да го зголеми долгот на Македонија за 400 милиони евра.
„Е, сега, власта сака тој долг да го зголеми за една милијарда и повеќе в година и затоа прават така екстремно голем буџет за да може да врват договорите во четири очи. Знаат дека таа им е последна година, би рекол, и тие викаат ајде што може да се земе – да се земе. Ама забораваат дека има одговорност. Не знам дали се свесни дека има одговорност. Оваа генерација политичари на ВМРО-ДПМНЕ нема намера со никого да се пазари. Не знам дали тоа не го разбраа досега. Еве јас им ветувам дека ќе има одговорност. Ако мислат дека ќе потрошат 5,3 милијарди народни пари, а најголемиот дел од тие пари во договори во четири очи, се лажат“, истакна тој.
„Предвиделе капитални инвестиции од 49, ни помалку ни повеќе, 49 милијарди денари. Оваа година предвидуваа најпрвин 38 милијарди денари за со ребалансот да намалат на 32 милијарди, а заклучно со првите 10 месеци од годината, со 31.10 успеале да реализираат 14 милијарди. А вам ви вели овде градоначалникот дека реализирале 75 % од капиталните инвестиции, така работи ВМРО-ДПМНЕ. А така краде СДСМ. Ете тоа е разликата меѓу овие политички измамници и луѓето што навистина си ги сакаат државата и народот и сакаат нешто да направат“, нагласи Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За три дена, 109 повредени од Кочани доставиле барања и предлози на телефонската линија на Владата

109 граѓани за три дена од пуштање на телефонската линија за повредените лица и нивните семејства, која е во директна комуникација со Канцеларијата на Ппретседателот на Владата, ја искористиле можноста и доставиле свои барања и предлози, соопштија од Владата.
Од таму велат дека тоа покажува дека оваа телефонска линија дава резултат и дека Владата е отворена за секаква сугестија и идеја.
„Како Влада преку низа на мерки помагаме за помош на повредените и нивните семејства. Ова е заедничка борба и нема да отстапиме од неа, бидејќи секој граѓанин има право на соодветна здравствена заштита и медицинска нега, токму поради тоа како Влада донесовме одлука за рехабилитација во Пониква на повредените лица кои се во стабилна здравствена состојба, но им е потребна дополнителна медицинска услуга. Тим на лекари од 10 јуни до 20 август во рехабилитацискиот центар Пониква на сите лица ќе им пружат дополнителна медицинска грижа, но и психолошка поддршка“, велат од Владата.
Од таму ги повикуваат и ги охрабруваат сите повредени лица кои се засегнати да се јават на телефонскиот број 070/355-526 и да ги изразат своите барања и потреби.
Македонија
Сончево време, попладне локален дожд

Времето денеска ќе биде сончево со мала до умерена облачност. Попладне ќе има услови за локален развој на нестабилна облачност со пороен дожд и грмежи. Ќе дува слаб ветер од променлив правец. Минималната температура ќе биде во интервал од 12 до 20, а максималната ќе достигне од 26 до 35 степени.
Во Скопје, сончево со мала до умерена облачност. Ќе дува слаб ветер од северен правец. Минималната температура ќе се спушти до 17, а максималната ќе достигне до 34 степени.
Од денеска следува период на стабилно и сончево време со мала до умерена локална облачност. Дневните температури ќе бидат без значителни промени.
Македонија
Мурал од балкански рис исцртан на фасадата на Театар Комедија

Со мурал од балкански рис и мала прослава, Македонското еколошко друштво вчера го прослави Светскиот ден на рисот.
„Конечно најдовме дом за муралот, најдовме и артист кој го нацрта, и најдовме човек кој има визија и кој е отворен за соработка, а тоа е директорот на Театар Комедија – Дарко Спасов. Целта ни е со овој мурал да ја подигнеме јавната свест, не само на рурално туку и на урбано ниво. Кога работите ќе згуснат ни треба секаква поддршка, од секоја популација“, изјави раководителот на Програмата за закрепнување на балканскиот рис, Диме Меловски.
Тој се заблагодари на поддршката од Театар Комедија и директорот Дарко Спасов.
„Велат исти птици во исто јато летаат“, вели директорот Спасов, кој го изрази своето задоволство од соработката со Македонското еколошко друштво.
Освен муралот на фасадата на Театар Комедија, пред објектот поставена е и инфо табла со основните податоци за рисот, како и QR код кој води до новата интернет страница посветена на балканскиот рис: balkanlynx.com.
По поздравните обраќања, присутните членови и соработници на МЕД, се упатија кон Бистро Комедија каде што во неформална атмосфера имаа прилика да поразговараат за досегашните постигнувања, но и да разменат идеи и предлози за идни активности.