Македонија
Стојаноски: Мнозинството да се изјасни за нашите предлози за справување со енергетската криза

Поминаа повеќе од месец дена од предлозите на Христијан Мицкоски и десетина дена од предлозите на пратеничката група со мерки за полесно справување со економската и енергетската криза на домаќинствата и стопанството. Владата, а и колегите од мнозинството предводено од ДУИ и СДСМ молчат како да не постојат иако еден дел ги прифатија. Ова го истакна на прес-конференција Бојан Стојаноски, пратеник на Пратеничката група на ВМРО-ДПМНЕ.
Стојаноски рече дека Владата го прифатила предлогот на Христијан Мицкоски снабдувањето на училиштата, здравствените установи и јавните водостопански претпријатија да плаќаат фиксна цена на електрична енергија неколкукратно пониска од пазарната цена. Владата прифатила да му помогне на дел од стопанството и со тоа прехранбената индустрија ќе добие фиксна цена на електрична енергија која е пониска од цената на слободниот пазар.
„Пред 10-тина денови Пратеничката група на ВМРО – ДПМНЕ и Коалицијата за Обнова на Македонија презентираше нов пакет на предлог мерки во интерес на граѓаните, а колегите сè уште немаат став по истите. Побаравме секој викенд до крајот на кризната состојба да е викенд без ДДВ за прехранбените производи. Побаравме да се врати мерката субвенциониран студентски оброк, но со износ од 160 денари дневно. Побаравме да се намалат акцизите на дизелот и бензинот. Побаравме да се одложи прогресивното оданочување за дополнителна една година. Побаравме да се даде финансиска поддршка на сите граѓаните на кои им е потребна, а не само на неколку илјади. За денес е закажана комисијата за финансирање и буџет на која единствена точка на дневен ред е Законот за финансиска поддршка на граѓаните. Пратеничката група на ВМРО – ДПМНЕ и Коалицијата за обнова на Македонија поднесе 6 амандмани со кои бараме да се прошири опфатот на финансиската поддршка и за заборавените категории на граѓани“, изјави Стојановски.
ВМРО-ДПМНЕ со амандманите предлага финансиска поддршка од 3.000 денари да има за сите самохрани родители, а не само за оние чии деца се на возраст до 7 години и се приматели на гарантирана минимална помош.
„Бараме по 3.000 денари месечна финансиска поддршка за сите средношколци, деца без родители и родителска грижа, по 3.000 денари и за невработените лица кои се активни баратели на работа, како и за корисниците на гарантирана минимална помош. Дополнително сметаме дека поддршката за пензионерите е недоволна и не ги опфаќа сите и токму затоа бараме сите пензионери со примања до 18.000 денари да добијат месечна финансиска поддршка од 3.000 денари, тие што имаат до 30.000 денари да добијат 2.000 денари месечно, а останатите по 1.000 денари месечно.
За крај во услови на инфлација од 20%, а потрошувачка кошничка над 50 илјади денари која на месечно ниво се зголемува за најмалку 1.000 денари, Предлог-буџет за 2023 година од 5,3 милијарди евра, помош од 750 денари за лицата корисници на правото на надомест за телесна оштетеност е навреда. Најмалку што може да сторат колегите од мнозинството е заеднички да ја дуплираме помошта на 1.500 денари месечно за периодот до 30 април 2023 година.
Ова се амандманите на пратениците од ВМРО – ДПМНЕ и Коалицијата за Обнова на Македонија за денешната комисија. Пратениците од мнозинството да се изјаснат дали ќе бидат слепи послушници на власта или ќе работат во корист на граѓаните и Владата ќе мора да им даде финансиска поддршка на средношколците, децата без родители и родителска грижа, сите самохрани родители, сите пензионери, невработените лица кои се активни баратели на работа и корисниците на гарантирана минимална помош“, додаде Стојаноски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сиљановска-Давкова: Ромите не заслужуваат маргинализација и дискриминација, туку отворена поддршка и рамноправност во сите права

Претседателката Гордана Сиљановска-Давкова се обрати на второто издание на годишниот настан „Разговори за еднаквост“ којшто годинава Комисијата за спречување и заштита од дискриминација го организираше на тема „Право на домување на Ромите“.
Во своето обраќање Сиљановска-Давкова истакна дека не треба да се зборува само за статистика или политики, туку да се чуе за нееднаквоста, за животните искуства на Ромите, како најранлива категорија наши граѓани, кои се соочени со системска и со структурна дискриминација врзана за законско непоседување сопствен дом или стан, „осуденост“ на живот во непостојано, несигурно или супстандардно живеалиште на периферијата, без пристап или отежнат пристап до вода за пиење, без услови за лична хигиена, во недостиг на животен простор, односно катче за секој член на најчесто многудетното семејство.
Како претседателка која ги претставува сите граѓани, таа посочи дека има политичка, правна, етичка и морална обврска да не дозволи ниту една заедница да се чувствува запоставена, изоставена, маргинализирана, дискриминирана.
Според неа, потребна е не само институционална, туку и индивидуална човечка борба за надминување на предрасудите, на стереотипите и докажана грижа за најранливите, односно обид за согледување на Ромите низ ромски очи, заради уривање на (не)видливите ѕидови зад коишто е изолирана и маргинализирана ромската заедница. Потребни се чекори за вклучување на Ромите во општествениот и политичкиот живот.
,,Потребна е инклузивна, наместо ексклузивна политика на домување во чие креирање ќе учествуваат и Ромите” – рече претседателката.
Во општините со доминантно ромско население, според претседателката, мора да се применуваат исти урбани стандарди, вклучувајќи ги и оние на домување како и во другите општини.
Сиљановска-Давкова посочи дека на нашите сограѓани Роми секогаш им вели дека не се дојденци во оваа земја, туку таа е и нивен дом. Порача дека тие не заслужуваат маргинализација и дискриминација, туку отворена поддршка и рамноправност во сите права, вклучувајќи го и правото на пристоен дом.
Настанот на којшто се обратија и шефот на делегацијата на Европската Унија, амбасадорот Михалис Рокас, заменик министерот за локална самоуправа, Ерџан Селими, претседателот на Комисијата за спречување и заштита од дискриминација, Лимко Бејзароски и лидерката на компонентата 4 од проектот „Поддршка на ЕУ за владеење на правото“, Барбара Лигл е финансиран од ЕУ и имплементиран од Лудвиг Болцман Геселшафт – Институт за фундаментални и човекови права (LBI-GMR), австриско владино тело кое функционира како институт за истражување, обука и консултации.
Македонија
Хеликоптер на МВР исфрли повеќе од 30 тони вода во реонот на Дојран

Денеска во попладневните часови хеликоптерот бел 412 беше повикан за гасење пожар во реонот на Дојран, соопшти МВР.
Притоа во 22 налети биле исфрлени преку 30 тони вода.
„Поради ноќните услови хеликоптерот се повлече во базата“, информираа од ова министерство.
Македонија
Морбидни обивнувања на Мицкоски и измислени приказни за пожарите, велат од СДСМ

Нема крај на морбидното однесување на ВМРО-ДПМНЕ и Христијан Мцикоски. Во услови на огнена стихија и прогласена вонредна состојба на територија на целата држава, партијата на власт наместо да бара решенија, бара изговори за катастрофата, реагираат од СДСМ.
„Минатата година со ВМРО-ДПМНЕ на власт изгореа помеѓу 10% и 15% од целокупната територија на земјата. И тогаш наместо одговорност, Мицкоски бараше виновници додека ветуваше дека ЌЕ биде подобро следната година.
Точно една година подоцна, во моментов гори тоа што остана од шумите и зелените површини низ земјава да догори.
Нема нова опрема – промовираа стари реновирани хермелини и БТР кои ги нема никаде на терен бидејќи веќе се во сервис.
Нема нови авиони, поточно, воопшто нема авиони.
Нема пилоти, иако ветуваа дека за една година ќе обучат и вработат доволно нови пилоти.
Нема нови пожарникари, а сега за 24.000 денари бараат привремени пожарникари кои би требало за минимална плата да го ризикуваат сопствениот живот. Цела година немаат абер да почнат да работат“.
Населението, додаваат од опозициската партија, само се спасува, кравите бегаат и не ја пасат тревата, пожарите беснеат, само Мицкоски не е крив.
„Мицкоски е одлепен од реалноста. Веќе има една жртва од пожарите, а наместо збор на утеха или превземање на мерки, Мицкоски повторно забегува во некрофилска реторика и бара виновници, бркајќи духови“, оценуваат од СДСМ.