Премиерот Димитар Ковачевски заедно со заменик-претседателот на Владата за економски прашања, Фатмир Битиќи, денеска го посети производствениот погон на фабриката за полиетиленски и полипропиленски цевки и црева, „Конти хидропласт“ во општина Гевгелија.

За време на посетата, премиерот Ковачевски разговараше со менаџерскиот тим и со вработените во компанијата во врска со успешните владини антикризни мерки за стопанството и можностите за нивно искористување.

„Огромни се честа и задоволството што денеска овде во Гевгелија имав можност да ја посетам една од најреномираните фабрики за производство на полиетиленски и полипропиленски цевки и црева не само во земјата туку и пошироко. Компанијата ‘Конти хидропласт’ во својата речиси 50-годишна традиција на постоење, од примарно мало производство, до денеска се развила во модерна фабрика лидер, извозно ориентирана, со 95 % производство што завршува на странските пазари. Како што бев информиран од страна на менаџерскиот тим на оваа компанија, нивната главна мисија е да ги следат и да ги имплементираат најновите производствени технологии и стандарди со кои ја збогатуваат понудата на квалитетни производи, но и креираат општествено одговорни политики во делот на заштитата на животната средина и заштитата на здравјето на вработените“, рече Ковачевски.

Премиерот посочи дека „фабриката ‘Конти хидропласт’ во 2019 година доби помош од државата за инвестиции, во висина над 313 милиони денари, а реализирале двојно повеќе за три години, односно инвестирале 529 милиони денари. Оваа инвестиција е со петгодишен договор и се реализира според Законот за финансиската поддршка за компаниите. На овој начин градиме систем што ги поттикнува успешните компании, кои придонесуваат во сопствениот развој, вработуваа кадри и вложуваат во човечкиот капитал поттикнувајќи го истовремено и развојот на државата“.

„Свесен сум дека економската и енергетската криза направија невидени потреси на европскиот континент, но со навремени одлуки и донесени таргетирани антикризни мерки засега успешно ја менаџираме оваа кризна состојба. Како што ветив, така и донесовме политики во интерес и на граѓаните и на компаниите. Како Влада ги поддржуваме малите и средните претпријатија, а со директна државна финансиска помош и со низата мерки тоа го правиме и за граѓаните. Дури и во услови на историски најголемата криза обезбедуваме добро платени работни места, создадовме услови за нови инвестиции, ги враќаме парите кај граѓаните и обезбедуваме ликвидност на компаниите кога е најмногу потребно, но и електрична енергија по поевтина цена за производителите на основните прехранбени производи“, рече тој.

Ковачевски напомена дека „поевтина струја е обезбедена и за јавните претпријатија од областа на водоснабдување и одведување на отпадните води. Тие ќе плаќаат цена од 95 евра за мегават-час. Во целата држава основните и средните јавни училишта ќе добијат поевтина електрична енергија – 95 евра за мегават-час“.

„Истовремено, со 80 проценти ја субвенционираме струјата за домаќинствата и за малите потрошувачи, а во буџетот континуирано обезбедуваме и средства за зголемувањето на минималната и просечната плата и пензиите, како и за грижа за најранливите категории граѓани“, рече тој.