Одделението за внатрешни работи Радовиш до Основното јавно обвинителство Струмица поднесе кривична пријава против Г. К. (65), К. С. (66), Р. С. (53) и С. П. (37), сите од Радовиш, поради постоење сомнение дека Г. К., К. С. и Р. С. сториле кривични дела злоупотреба на службената положба и овластувањето по член 353 и злоупотреба на постапка за јавен повик, доделување договор за јавна набавка или јавно-приватно партнерство по член 275-в од Кривичниот закон, а С. П. поради тоа што со своето стручно знаење им помогнал, со што и самиот сторил кривично дело по член 24, а во врска со член 275-в став 3 од Кривичниот закон.

Осомничените Г. К., К. С. и Р. С., како вработени во Општина Радовиш, во 2020 година презеле дејства во рамките на нивните надлежности по што бил склучен договор базиран на невистинита документација за воспоставување јавно-приватно партнерство за реконструкција на јавното осветление во општина Радовиш преку воведување мерки за енергетска ефикасност, а С. П. како надворешно лице со стручни совети им помогнал во манипулирање на податоците во физибилити-студијата, изготвена за тој договор.

Врз основа на вака склучениот договор, Општина Радовиш е обврзана за осум години да исплати сума во износ од 104.667.215 денари (без ДДВ).