Македонија
Договорени активности за уште поголема афирмација и развој на македонистиката во Полска

Веќе од следната година ќе започнат нови заеднички проекти за уште поголема афирмација на македонскиот јазик, литература и култура во Полска. Цврста е взаемната решеност за поголеми вложувања во развојот на македонистиката на Шлезискиот универзитет во Катовице. Заеднички ќе се работи на остварување веќе конкретни планови за натамошно зголемување на интересот за македонистиката на Факултетот за хуманистика во Сосновјец. Традицијата од 35 години изучување на македонскиот јазик на овој реномиран универзитет обврзува заеднички да се создадат и нови перспективи за полската македонистика.
Ова меѓу другото беше договорено и истакнато на работниот состанок на директорката на Меѓународниот семинар за македонски јазик, литература и култура при Универзитетот „Св. Кирил и Методиј“ во Скопје (МСМЈЛК при УКИМ), проф. д-р Весна Мојсова-Чепишевска со делегација на Факултетот за хуманистика при Шлезискиот универзитет, предводена од директорката на тамошниот Институт за русистика и славистика, проф. д-р Мирослава Михалска-Суханек. На состанокот учествуваа и проф. д-р Роберт Боњковски од Одделот за јужнословенски јазици при Институтот за славистика и доц. д-р Уршула Михалик од Институтот за англистика од Факултетот за хуманистика во Сосновјец, како и проф. д-р Лидија Танушевска и лекторката по полски јазик, Наталија Лукомска од Катедрата за славистика на Филолошкиот факултет „Блаже Конески“ при УКИМ.
Во разговорот на професорите од двете земји беа разменети идеи и беа договорени конкретни активности за натамошно развивање на македонистиката на Шлезискиот универзитет и воопшто во Полска. Особено значајно е што беа договорени активности за поттикнување поголем број нови студенти на Шлезискиот универзитет да се посветат на изучувањето на македонскиот јазик уште во првиот циклус студии, за што клучен ќе е придонесот и на Лекторатот по македонски јазик, кој е темел на изучувањето на македонистиката на Универзитетот. Како што посочија соговорниците, со договорените активности ќе се оствари влог во нови генерации афирматори на македонистиката во Полска, кои во следните децении преку наставата, научната работа и книжевниот превод ќе ги промовираат македонскиот јазик, литература и култура во полската културна средина.
Но, како што беше истанато, исто толку важно е што на Факултетот за хуманистика во Сосновјец има и докторанти по македонски јазик и што полски студенти, македонскиот јазик, мошне интензивно го изучуваат и на вториот циклус, магистерски студии, а како резултат на проектот за модерни славистички студии во кој се вклучени двата универзитета, веќе може да се очекува уште поголем интерес за македонистиката и на овие повисоки академски рамништа. Заради тоа, на состанокот беа прецизирани и активности за заеднички залагања со кои ќе се создадат и нови перспективи за студентите на Шлезискиот универзитет кои македонскиот јазик го изучуваат на повисоко академско рамниште уште повеќе да се вложат во натамошната афирмација на македонистиката во Полска.
Меѓу другото, на состанокот се разговараше и за унапредувањето на наставата по македонски јазик, литература и култура на Шлезискиот универзитет, при што беше посочено дека клучни се учебниците и воопшто материјалите кои ги овозможува МСМЈЛК при УКИМ.
Во текот на следниот семестар од оваа академска година, достојно ќе биде одбележан значајниот јубилеј 35 години македонистика на Шлезискиот универзитет во Катовице. Како што беше истакнато и на состанокот, важно е што одбележувањето на јубилејот ќе се оствари не само со пригодна свеченост, туку и со низа активности кои ќе придонесат за нови научни потфати на полските слависти и македонисти посветени на македонскиот јазик, литература и култура, значајни за натамошниот развој на полската македонистика. Професорите од двете земји разговараа за голем дел од активностите кои по повод јубилејот ќе се остварат на Шлезискиот универзитет, во содејство со МСМЈЛК при УКИМ.
На Шлезискиот универзитет, македонистиката е присутна од академската 1987/88 година, кога започнува со работа Лекторатот по македонски јазик. На Факултетот за хуманистика при Универзитетот има неколку реномирани професори кои се големи посветенци и познавачи на македонистиката, кои и ја држат наставата по македонска литература и по превод од и на македонски јазик. На состанокот беше нагласено дека договорените проекти кои ќе започнат да се остваруваат следната година и воопшто планираните заеднички активности ќе бидат влог и во перспективите на следбениците на овие професори – идните културни амбасадори на нашата земја во Полска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ: Меѓусебната заштита на Коцевски со СДС и ДУИ е причина за 2% доверба во судството

СДС ги штитат корумпираните обвинители и судии бидејќи им овозможуваат закрила на нивните функционери, велат од ВМРО-ДПМНЕ.
„Клиентелизмот на Коцевски е гаранција за заштита и неказнивост на функционерите од СДС и ДУИ.
Поддршката што Коцевски ја доби од Филипче е меѓусебна заштита која ја гуши правдата во државата. Бидејќи доколку падне Коцевски, ќе се отворат врати за истраги како против Филипче така и за останатите функционери од СДС и ДУИ.
СДС со негласањето на интерпелацијата целосно се разголи, и на виделина пред јавноста излезе спрегата помеѓу СДС, ДУИ и Коцевски.
Очигледно е дека СДС и ДУИ стојат зад заштитата на Коцевски, кој за возврат не презема ништо за наводните злоупотреби и сомнежи за висоока корупција како и сомнителни тендери поврзани со Филипче, Заев и Ахмети.
Со одбивањето да ја поддржат интерпелацијата, СДС и ДУИ јасно покажаа кој го поставал Коцевски и кој го одржува на функцијата, јавниот обвинител Коцевски.
Се додека Коцевски е на позицијата, довербата во правосудството ќе биде помала од 2%, а одговорност за криминалите поврзани со СДС и ДУИ нема да има.
Доколку постои грам морална одговорност кај Коцевски, треба да ја препознае пораката од јавноста и да си поднесе оставка.
На Македонија и се неопходни темелни реформи во судството, правосудство растеретено од политички влијанија каде судиите и обвинителите ќе носат одлука врз основа на законите и Уставот а не под влијание на партиските интереси на СДС и ДУИ.
Во Македонија неопходно е правдата да завладее, неопходни се коренити реформи и трансформација на судскиот систем“, пишува во соопштението на ВМРО-ДПМНЕ.
Македонија
Времето денеска сончево со мала до умерена облачност, попладне локален пороен дожд и грмежи

Времето денеска ќе биде сончево со мала до умерена локална облачност.
Ќе дува слаб до умерен ветер претежно од југоисточен правец.
Попладне ќе има изолиран развој на нестабилна облачност со локален пороен дожд и грмежи.
Минималните температури ќе се движат од 12 до 20, а максималните од 26 до 36 степени целзиусови.
Во Скопје, сончево со мала до умерена облачност. Ќе дува слаб ветер од југоисточен правец. Минималната температура ќе биде 17, а максималната дневна ќе достигне 36 степени.
Македонија
Бендевска: Да го продолжиме заветот од Илинден и пораката од АСНОМ

По повод 2 Август – Денот на Републиката, во име на претседателот на Собранието на Република Северна Македонија, Африм Гаши, потпретседателката на Собранието на Република Северна Македонија, Весна Бендевска, заедно со собраниска делегација во состав: Бране Петрушевски, Никола Коњановски, Даниела Николова и Даниел Стојчевски, одбележа 81 година од Првото заседание на АСНОМ, во Меморијалниот центар АСНОМ во Пелинце.
„На хероите на двата Илиндена кои се жртвуваа за денес да можеме да бидеме свои на своето, да им ветиме уште еднаш дека денешните генерации нема да го заборават заветот што ни го оставија. Да ги насочиме нашите погледи, стремежи и напори од заедничкото минато, кон заедничката сегашност и иднина. Да го продолжиме заветот од Илинден и пораката од АСНОМ“ – порача потпретседателката Бендевска.