„Министерката за одбрана, Славјанка Петровска, крие луксузен имот. Како што кажав во дуелот со министерката во средата, таа во својот анкетен лист до ДКСК пријавила само долгови, два кредита и една кредитна картичка, но не и луксузна хациенда во Радишани. Во дуелот ја прашав Петровска дали крие имот во Скопско по што таа негира и рече дека сè што поседува е во нејзиниот анкетен лист, односно дека не поседува имот. Петровска е фатена во лага како крие имот“. Ова, меѓу другото, денеска на прес-конференција го објави Драган Ковачки, пратеник и член на ИК на ВМРО-ДПМНЕ.

Ковачки посочи дека „Славјанка Петровска поседува огромна хациенда со базен во Радишани. Во таа хациенда има голем базен, целиот имот е ограден со голема двометарска ограда, што може да се види од следните фотографии“.

„Овој имот на Петровска е евидентиран и во Агенцијата за катастар на недвижностите, забележан во евидентен лист во катастарската општина Радишани. И се наоѓа на улицата Радишанска. Жителите од тој дел на улицата Радишанска, според Избирачкиот список, гласаат во избирачкото место 2948/1, кое се наоѓа во ОУ ‘Ацо Шопов’. Тоа е истото избирачко место на кое гласа и Славјанка Петровска по што може да се заклучи дека адресата на луксузната хациенда на Славјанка Петровска е и адреса на живеење што таа ја има во личната карта“, рече Ковачки.

Пратеникот од ВМРО-ДПМНЕ напомена дека „ги повикуваме надлежните институции да постапат, а Славјанка Петровска, наместо на ВМРО-ДПМНЕ, како што вети, оваа луксузна хациенда да ја донира на здруженијата на бранителите од 2001 година“.