Министерот за внатрешни работи, денеска, се обрати на научен собир на тема „Не користи мобилен телефон додека возиш“, во партнерска организација на Републичкиот совет за безбедност во сообраќајот, Факултетот за безбедност и Министерството за внатрешни работи, што се одржа во амфитеатарот на Факултетот за безбедност во Скопје.
Министерот Спасовски во своето излагање потенцира дека секоја техничко-технолошка новина во себе носи важни дилеми, кои бараат соодветни правила на приспособување, особено ако практичните искуства покажуваат конкретни проблеми при користењето.

„Фактот дека според Светската здравствена организација одвлеченото внимание на возачот поради користење мобилен телефон се јавува како причина во безмалку една четвртина од сите сообраќајни незгоди, јасно ни укажува дека одредени модерни технолошки алатки едноставно не може да се користат секаде и во секоја пригода. Евидентно е дека се соочуваме со еден нов и потенцијално многу опасен феномен, кој во согласност со статистиките и аналитички согледувања има капацитет на крајно сериозна закана, чија цена се човечки несреќи и трагедии“, ја дефинира министерот Спасовски опасноста од користењето на мобилните телефони.

Министерот Спасовски истакна дека препознавајќи ја таа опасност, повеќе години сите релевантни институции од областа на сообраќајот не само што законски го нормираа како казниво поведение користењето на мобилните телефони при возењето туку интензивно се вклучија во превентивно дејствување и заеднички работеа на подигнување на јавната свест – дека на користењето на мобилните телефони не му е местото во сообраќајот, без разлика дали станува збор за управување моторно возило, минување на сообраќајниците или велосипедска рекреација, притоа не исклучувајќи ниеден учесник во сообраќајот.

„Сообраќајниот прекршок ‘зборување на мобилен телефон’ во последниот период бележи пораст, па во 2021 година биле процесирани дури 1.617 вакви прекршоци. Оваа година, од нејзиниот почеток, заклучно со крајот на септември, санкционирани се 2.128 возачи за користење мобилен телефон при возење. Како што претходно истакнав, порастот на бројката е резултат на рапидно зголемената активност на полицијата во санкционирањето непочитувања на сообраќајните правила и прописи“, ги презентира министерот Спасовски официјалните статистики од аспект на полициска работа. Претседателката на Републичкиот совет за безбедност во сообраќајот, Гордана Кожуваровска, потенцира дека, според истражување на РСБСП, на светско ниво 45 % од возачите користат мобилен телефон додека возат, а во Република Северна Македонија тој процент е дури 60 % од возачите.

„Употребата на мобилен телефон додека се управува со моторно возило е ризично, опасно, но и спротивно на Законот за безбедност на сообраќајот на патиштата. Не постои разговор на мобилниот телефон чија важност може да се спореди со пристигнувањето на посакуваната дестинација безбедно и во добро здравје“, сублимира Кожуваровска.

„Мобилните телефони во комбинација со управување со моторно возило може да бидат смртоносни алатки за тебе или за другиот учесник во сообраќајот. Застани, размисли, не брзај, внимавај! Опасностите се на секој агол, статистиките се поразителни! Кога возиш, остави ги за подоцна сите разговори на мобилниот телефон. Заштити се себе си и другите учесници во сообраќајот!“, акцентира деканот на Факултетот за безбедност, Никола Дујовски, сложувајќи се со другите ученици на научниот собир дека ваквите стручни настани и вклучувањето повеќе институции и на стручните. но и на образовните, односно академски средини, може дополнително да придонесат за разбирањето и решавањето на ваквите негативни феномени.