Мировните преговори за Украина, кои беа закажани за денеска во Лондон, а требаше да ги води британскиот министер за надворешни работи Дејвид Лами, се одложени, соопшти британското Министерство за надворешни работи.

Во соопштението се наведува дека состанокот за мировните преговори за Украина со министрите за надворешни работи закажан за денеска (среда) е одложен.

Во исто време, се додава дека разговорите на официјално ниво ќе продолжат зад затворени врати, без присуство на медиумите, пренесува The Guardian.

Дипломати од Велика Британија, Франција, Германија, Украина и САД денеска требаше да одржат нова рунда разговори во Лондон со цел постигнување прекин на огнот во тригодишната војна меѓу Украина и Русија. Меѓутоа, откако украинскиот претседател Володимир Зеленски го отфрли предлогот на САД за признавање на анектираниот Крим како дел од Русија, министерот за надворешни работи на САД го откажа своето патување во Лондон.

По него учеството на денешната рунда дијалог го откажаа и други врвни дипломати кои во Лондон испратија пониски функционери.

Претходната рунда мировни преговори за Украина се одржа во Париз, а на неа присуствуваа претставници на САД, Франција, Велика Британија, Германија и Украина.

Телото на папата Франциско утринава беше преместено во базиликата Свети Петар за католиците да можат да му оддадат последна почит пред погребот, кој ќе се одржи во 10 часот во сабота.

Неговото тело беше пренесено во отворен ковчег од капелата во ватиканската резиденција каде што живееше, во базиликата Свети Петар, во голема поворка со кардинали придружени со латинско пеење. Ковчегот беше придружуван од папски војници познати како Швајцарска гарда.

На погребот се очекува да присуствуваат најмалку 200.000 луѓе, изјави за весникот „Кориере дела сера“ Фабио Чичилијано, шеф на италијанската агенција за цивилна заштита.

Американскиот претседател, Доналд Трамп, кој во неколку наврати се судри со папата околу имиграцијата, ќе дојде со сопругата Меланија. Хрватскиот претседател Зоран Милановиќ го потврди своето пристигнување, како и лидерите од Италија, Франција, Германија, Велика Британија, Украина, претставници од институциите на ЕУ и родната Аргентина на Франциско.

Конклавата, на која ќе се избере нов папа, не се очекува да започне пред 6 мај. Нема јасен фаворит за наследник на Франциско, иако британските обложувалници ги издвојуваат Луис Антонио Тагле, реформатор од Филипините и Пјетро Паролин од Италија како први фаворити.

Првата снимка доаѓа од капелата во Домот Света Марта, каде кардиналите се собрани во молитва.

„Го придружуваме Франциско на ова последно патување“, се вели во преносот, „со сите добри дела што ги направи за доброто на Црквата“.

По префрлањето на телото на починатиот папа од неговата резиденција во базиликата Свети Петар во Ватикан, телото буквално ќе им биде изложено на верниците.

Поворката започнува од капелата на Домот. Во него учествуваат кардинали и патријарси, а потоа кардиналот одаран и господарот на литургиските празнувања.

Носителите ќе го пренесат телото на починатиот папа Франциско, а ќе ги следат неговите секретари, членовите на семејството и персоналот.

Поворката ќе помине низ Via della Sacrestia, потоа преку плоштадот на римските првомаченици и сводот на камбаните за да влезе на плоштадот Свети Петар. Откако ќе поминат низ секторот Свети Петар, ќе се упатат кон централниот дел на плоштадот, ќе се искачат на централната зграда и потоа преку централниот портал ќе влезат во базиликата Свети Петар, каде што минувајќи низ главниот кораб ќе стигнат до гробот на Свети Петар.

Верниците ќе имаат можност да му оддадат почит на Папата во деновите пред погребот во сабота.

Базиликата ќе биде отворена во следните периоди:
Среда, 23 април – од 11:00 до 12:00 часот по локално време

Четврток, 24 април – 07:00 до 24:00 часот

Петок, 25 април – од 07:00 до 19:00 часот