Македонија
Маричиќ: Потребен е национален консензус, процесот на преговори не трпи импровизација
Заменик претседателот на Владата задолжен за европски прашања, Бојан Маричиќ, денеска на тркалезната амбасадорска маса на тема: „Западен Балкан помеѓу Истокот и Западот-Северна Македонија земја членка во ЕУ до 2030 година?“, организирана од Советот на амбасадори во Скопје, изјави дека процесот на преговори со ЕУ не трпи импровизација и нема да може да се изведеме импровизираме, затоа е потребен национален консензус.
– Основното прашање е дали ќе постигнеме консензус за крупните прашања со соседите и дали ќе постигнеме консензус за поинаков начин на водење на политика, економија и институции. Овој процес нема да ни дозволи да импровизираме, сите наши слабости ќе излезат на површина. Прашањето е само каков одговор ние ќе дадеме на нашите слабости и како ние ќе се поставиме како држава кон нашите слабости, рече Маричиќ.
Прашањето е дали сакаме да се откажеме од монополите или не, дали сакаме навистина пазарна економија или не, дали сакаме отворени институции или не, дали сакаме губење на одредени ексклузивитети, дали сакаме прекинување на партиската преференци, но и на личните релации, непотизмот и други форми на доминација во институциите коишто не им се допаѓаат на повеќето граѓани.
Маричиќ побара реален консензус со одговор од сите политички чинители на прашањето: Дали сакаме Северна Македонија да стане членка на Европската Унија, не под условите под кои ние сме си замислиле, туку под условите коишто реално се на маса, бидејќи тоа важело за секоја држава во минатото.
– Вистинскиот национален консензус за ЕУ, кој за жал кај нас сè уште не е постигнат од сите политички актери, затоа што досега во најголем дел од времето бил само декларативен. Многу е едноставно сите да бидеме за Европска унија, но сега навистина е потребно да се покаже дека сите сме за Европската Унија.
Главниот преговарач со ЕУ тврди дека Северна Македонија освен ЕУ нема друга вистинска алтернатива и направи компарација со Хрватска, Словенија, Бугарија, Романија, и други држави членки на ЕУ било држава, како изгледале пред членството во ЕУ, а како изгледаат денес.
– Ниту една од нив не назадувала по ниту едно прашање. Сите имаат сериозен економски развој, сите имаат свои проблеми. Се разбира, нема ни нашите проблеми да исчезнат преку ноќ кога ќе станеме членка на ЕУ. Но, сите имаат рамка за развој коишто ги носи напред и којашто им овозможува напредок, и институционален, и економски, посочи Маричиќ.
Маричиќ во своето обраќање истакна дека европскиот концепт носи стабилност, просперитет и извесност, и тоа е концепт кој го сакаат граѓаните, наведувајќи дека поддршката за ЕУ не опаѓа заради тоа што граѓаните не сакаат да бидат во Европската Унија, туку дека опаѓа од други две причини.
– Прво заради недоволната динамика и разочараноста од динамиката на внатрешните реформи и движење, од една страна. Но, од друга страна и за недостижност на реалното членство заради недостатокот на перспектива понудена од Европската Унија, значи тоа се две страни на приказната. Затоа што не веруваат дека може да станеме членка во догледно време, заради ситуацијата во Европската Унија и заради тоа што трансформацијата, транзицијата, како сакате наречете, трае очигледно предолго, смета вицепремиерот.
Според Маричиќ важно е сите политички фактори да одговорат на прашањето дали сакаме после повеќе од триесет години независност да го промениме начинот на водење на политика, економија, дипломатија, институции.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сиљановска доби честитка од кралот Чарлс
Претседателката Гордана Сиљановска Давкова денеска го прими амбасадорот на Обединетото Кралство на Велика Британија и Северна Ирска, Метју Лосон.
На средбата беа разменети мислења за севкупните билатерални односи меѓу двете држави, при што претседателката Сиљановска Давкова истакна дека нашата држава придава особено значење на развојот на пријателските односи и соработката со Обединетото Кралство, вклучувајќи го сојузништвото во НАТО алијансата. Претседателката Сиљановска Давкова посочи на нејзината подготвеност за натамошно унапредување на билатералната соработка со Обединетото Кралство во сите сфери од заемен интерес.
Претседателката Сиљановска Давкова истакна дека како држава особено ја цениме британската поддршка во исполнувањето на стратешката цел – членство во Европската Унија, која продолжи и по Брегзит.
Амбасадорот Лосон на претседателката Сиљановска Давкова и предаде честитка од Кралот Чарлс Трети по повод нејзиното стапување на функцијата, во која упатува најискрени честитки за нејзиниот избор.
„Уверен сум дека ќе го вложите целиот Ваш капацитет за време на Вашиот мандат како Претседател за справување со големите предизвици на нашето време, почнувајќи од справувањето со климатските промени до продлабочувањето на евроатлантската интеграција на Северна Македонија. Многу сум задоволен што нашите две земји имаат воспоставено цврсти трговски и безбедносни односи. Оттука, се надевам дека за време на Вашиот мандат како Претседател односите, кои се веќе толку блиски, уште повеќе ќе се продлабочат“, се вели во честитката од Кралот Чарлс Трети.
Македонија
Сиљановска Давкова се сретна со украинската амбасадорка Дир
Претседателката Гордана Сиљановска Давкова денеска ја прими амбасадорката на Украина, Лариса Дир.
На средбата, беше изразено задоволство од традиционалните пријателски односи, засновани на заемна почит и меѓусебно разбирање. Претседателката Сиљановска Давкова ја нагласи нејзината заложба за продлабочување на соработката во сите области од заеднички интерес, реафирмирајќи ја поддршката за Украина против руската агресија, со која се поткопува европската глобална безбедност и стабилност.
Двете соговорнички разменија мислења и за стратешките определби и перспективите на двете земји, истакнувајќи ја потребата од натамошна заемна помош, споделување искуства и експертиза. Претседателката Сиљановска Давкова ја нагласи македонската поддршка за Украина на нејзиниот пат кон Европската Унија и НАТО.
Амбасадорката Дир, упатувајќи честитки за изборот на претседателката Сиљановска Давкова ѝ посака успешно извршување на функцијата.
Македонија
Системот за видеонадзор на сообраќајниците „Безбеден град“ е поставен во Скопје, Куманово и Тетово
Министерот за внатрешни работи Панче Тошковски денес оствари работна средба на Единицата за оперативно-технички работи при Бирото за јавна безбедност во чија надлежност е системот за видеонадзор на сообраќајниците познат како “Безбеден град“.
Во рамки на посетата министерот беше запознаен со работата на оваа организациска единица, тековните активности и проблеми од делокругот на нивната работа.
„Во тој контекст беше истакнато дека во моментот ваков систем е поставен само во Скопје, Куманово и Тетово, има недостаток на покриеност на многу значајни крстосници, а голем дел од камерите и опремата која се користи во овој систем е технички застарена, а дел и неисправна. Исто така бев информиран за наградбата на системот која е во тек, а која опфаќа замена на постојните камери со нови и проширување на системот со нови камери на точки кои досега не беа покриени. Водено, во фаза на тестирање е системот за автоматско евидентирање на сообраќајни прекршоци за чие целосно ставање во функција потребно е да се направат и соодветни законски измени“, издвои министерот Тошковски од средбата и додаде:
Во иднина треба во континуитет да се инвестира во овој дел, да се прошири и во другите градови низ државата, како и да се распредели дополнителен кадар со цел оваа организациска единица да работи непречено во текот на 24 часа, бидејќи е од круцијално значење за обезбедување на поволна безбедносна состојба.