Македонија
(Видео) Талески: ВМРО-ДПМНЕ да го поддржи договорот со Фронтекс во Собранието

Договорот со Фронтекс што нашата држава го потпиша на официјален македонски јазик е голем успех за македонската држава и дипломатија. Со тоа пропаднаа во вода сите лаги и хистерии што опозицијата, а пред сè, пратениците на ВМРО-ДПМНЕ и Левицата, ги ширеа овде во Собранието, но и надвор од него. Паднаа во вода лагите дека македонскиот јазик ќе бил загрозен, немало да биде признаен од ЕУ дека ќе се именувал како бугарски дијалект, изјави на денешната прес-конференција, Миле Талески, пратеник на СДСМ.
Тој наведе дека поминаа повеќе од шест месеци од потпишувањето на договорот со Фронтекс, а ВМРО-ДПММНЕ и Левицата не собраа храброст да се извинат за тоа што грубо ја лажеа јавноста. Денеска, пред нас пратениците, на дневен ред е ратификацијата на договорот со Фронтекс. Кога веќе ја испуштија можноста да им се извинат на граѓаните за сите лаги во врска со македонскиот јазик и идентитет, пратениците имаат шанса денеска тоа да го сторат преку гласање ЗА ратификација на договорот.
Договорот со Фронтекс е еден од најсилните докази дека македонскиот јазик е признаен од ЕУ и тоа со чиста формулација, без додавки и фусноти, како што тоа беше случај пред десеттина години, рече Талески.
Талески истакна дека пратеничката група на СДСМ, како и парламентарното мнозинство, ќе гласа ЗА ратификација на договорот.
Тој потсети дека потпишувањето на договорот е придобивка од европскиот предлог и заклучоците во однос на него, кои беа изгласани од парламентарното мнозинство додека опозицијата тропаше, свиреше со вувузели, се закануваше и организира насилни протести.
Како одговорни пратеници продолжуваме со реализација на мерките и политиките што го забрзуваат евроинтегративниот процес и обезбедуваат европеизација на нашата држава, изјави Талески.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Христијаните утре го одбележуваат Велики петок, денот кога Исус бил распнат

Утре христијаните ќе го одбележат Велики петок, денот на Христовото страдање, кога Исус беше осуден и распнат на крст, жртвувајќи се за сите луѓе и спасението на светот.
Велики петок е најтажниот ден за Христијаните кога се сеќаваат на настаните што му претходеле на Христовото распнување.
Ден на голема жалост, но и вовед и подготовка за Велигден, кој е најголемиот христијански празник.
Тој ден православните верници строго постат, повеќето денот го поминуваат само со сув леб и вода.
Велики петок е денот кога Римјаните го осудија Исус Христос на смрт, на поттик на еврејските свештеници и фарисеи.
Во знак на тага и жалост, црковните ѕвона не бијат на Велики петок почнувајќи од бдение на Велики четврток. На Велики петок наутро се читаат „Царските часови“.
Боење јајца за Велигден е еден од најстарите христијански обичаи и го симболизира денот кога Марија Магдалена дошла во Рим да го проповеда евангелието. Таа стигнала и до царот Тибериј, на кого му донела на подарок кошница со јајца.
Царот не верувал во Христовото воскресение и рекол дека тоа ќе биде како белите јајца во кошница да ја менуваат бојата. Марија Магдалена рекла: „Христос воскресна и сите јајца во корпата станаа црвени“.
Црвената боја е симбол на радост и воскресение, а првото црвено јајце се чува до следниот Велигден како „чувар“, заштитник на семејството.
Македонија
Папазов од притвор оди во куќен притвор – за седуммина осомничени за пожарот во Кочани мерката е заменета

Поранешниот градоначлник на Кочани, Љупчо Папазов, кој си поднесе оставка од функцијата по трагедијата во дискотеката „Пулс“, оди во куќен притвор, каде што се и неговите претходници на градоначалничката функција, Ратко Димитриевски и Николчо Илијев.
Судот во Кочани на својата веб-страница денес информираше за донесените мерки за осомничените во истрагата, со што на седумина осомничени, мерката притвор им е заменета со куќен притвор.
„По изјавена жалба од осомничените преку нивните бранители изречената мерка притвор беше замената со мерка куќен притвор за тројца осомничени, а во понатамошниот тек од постапката по даден предлог на ОЈО Кочани за замена на мерката притвор со мерка куќен притвор за 4-четири осомничени беше определена мерка куќен притвор“, пишува во соопштението на судот.
Ексминистерот за економија, Крешник Бектеши останува во притвор, додека неговите претходници, ексминистрите за економија, Ваљон Сарачини и Беким Незири, се во куќен притвор. За Дритон Кучи се изречени се мерки на претпазливост.
Пожарот во „Пулс“ ги однесе животите на 62 лица, од кои повеќето млади.
Прочитај и: Почина уште еден повреден во пожарот во Кочани, кој се лекуваше во Белград
Осомничениот полицаец за пожарот во Кочани по кој се трагаше сам се пријавил во Обвинителството
Македонија
(Видео) Тошковски од Приштина: Системот One Stop Shop ќе се имплементира на граничниот премин Јажинце

Министерот за внатрешни работи Панче Тошковски денес беше во работна посета на Приштина на покана на неговиот косовски колега, министерот Џелал Свечла.
Средбата беше за евалуација на имплементацијата на One Stop Shop системот кој официјално беше пуштен минатата недела на граничниот премин „Блаце-Елез Хан“ како и за усогласување на идните чекори за дополнително зајакнување на прекуграничното поврзување.
„Следната фаза на оваа соработка е имплементација на системот и на граничниот премин „Јажинце-Глобочица“ кој треба да се реализира во следниот период. One Stop Shop системот за патниците значи една проверка наместо две, пократко чекање и подобро искуство, а за службите – поефикасна работа, подобра координација и посилна борба против незаконски активности а за нашите две држави тоа е ново поглавје на поврзаност со побрз транспорт, повеќе трговија, туризам и пријателство“, потенцираше министерот Тошковски.
На средбата се разгледа и тековната соработка на двете министерства и полиции и можноста за нејзино унапредување во делот на размената на информации и борба со криминалот кој не познава граници.