Регион
Курти: На Косово нема српски општини
Косовскиот премиер Албин Курти денеска изјави дека на Косово нема српски општини и дека договорот за формирање Заедница на српски општини го прекршил претседателот на Србија, Александар Вучиќ.
„Има општини каде Србите се мнозинство, но нема албански, српски или турски општини. Општините се општини на граѓаните. Значи, општините немаат национална припадност“, изјави за новинарите Курти, пренесува „Радио Ким“.
Тој додаде дека Уставот на Република Косово не дозволува здружување врз основа на етничка припадност.
„Здружение на општини или разни други организации може да имате само по различна основа, било да е тоа економска, економска, социјална, здравствена или образовна, но не и на етничка основа. 33-те договори што беа потпишани во Брисел пред да дојдам на власт се распоредени хоризонтално, немаат хиерархија. Не можете да кажете дека овој договор е поважен од другите. Сите тие договори се еднакви и тие ќе бидат третирани во нашите преговори, кои во основа го имаат овој последен предлог на Европската Унија, кој доби поддршка особено од Франција, Германија и САД. Значи, сите тие претходни договори се во тој предлог. Сега не можете да земете еден од вашите договори и да кажете дека тоа е единствениот договор што е важен. Има 33 договори“, рече тој.
Косовскиот премиер додаде дека „кога ќе дојде време“ и врз основа на овој предлог од Европската унија „ќе ги разгледа сите тие договори“.
„Нема договор што може да биде предуслов и нема договор што може да влезе во центарот на иден договор. Целосната нормализација на односите меѓу Косово и Србија мора да има взаемно признавање во центарот“, смета Курти.
Според него, претседателот на Србија „го прекршил својот најценет договор“.
„Не заборавајте дека на 10 декември минатата година тој договор за Заедница на општините беше потпишан на 19 април 2013 година од поранешните премиери Хашим Тачи и Ивица Дачиќ, а претседателот на Србија го прекрши кога испрати писмо до пет земји од ЕУ кои не го признаваат Косово. Претседателот на Србија потпиша писмо против барањето на Косово за членство во Европската унија. Со тоа го прекрши својот најценет договор, бидејќи во точката 14 од тој договор се вели дека Косово и Србија нема да си создаваат пречки меѓусебно во однос на патот кон европската интеграција“, рече Курти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Делегацијата на ЕУ во БиХ ги осуди инцидентите на концертот на Томпсон: „Покажете почит кон жртвите“
Делегацијата на Европската Унија во Босна и Херцеговина ги осуди инцидентите на концертите на Марко Перковиќ Томпсон во Широки Бријег минатата недела, кога дел од публиката извикуваше усташки слогани и поздравуваше со крената десна рака.
„Фотографиите и видеата од неодамнешниот концерт во Широки Бријег ги покажуваат учесниците како извикуваат слогани и нагласуваат карактеристики поврзани со фашистички идеологии. Глорификацијата и релативизацијата на фашистичките идеологии немаат место во демократското општество и нè потсетуваат на најтемните периоди од европската историја“, се вели во соопштението, пренесува „Тпортал.хр“.
Во исто време, ЕУ ги повика сите да покажат почит кон жртвите на злосторствата извршени за време на Втората светска војна, а „надлежните органи да ги истражат инцидентите во согласност со домашното законодавство“, се вели во соопштението.
Извикувањето на усташкиот слоган „Подготвени за дом“ и поздравувањето со крената десна рака на концертите на Томпсон одржани на 13 и 14 февруари во вторник беа осудени од ОБСЕ и мисијата на Обединетите нации во Босна и Херцеговина.
Тие, исто така, ги повикаа властите во БиХ да спроведат истрага и да ги санкционираат сите оние што се однесуваат на овој начин.
Регион
(Видео) Објавени снимки од последните денови пред трагедијата поврзана со култ во Бугарија
Бугарската полиција и обвинителството денес презентираа детални информации за трагичниот случај со шест жртви во областа Петрохан – Околчица поврзани со култ.
Беше потврдена и образложена информацијата дека за мртвите мажи, пронајдени на 2 февруари кај хижата „Петрохан“, станува збор за самоубиство, а за телата пронајдени подоцна во кампер под врвот „Околчица“ – за убиство проследено со самоубиство, јави „Њуз.бг“.
На брифингот беа претставени снимки од шест камери, кои органите на прогонот ги споделија со медиумите. Станува збор за видеа од 31 јануари, 1 и 2 февруари 2026 година. Снимките се од надворешниот дел на панинарската куќа и приодот – од синџир во регионот, патот и крстосницата во близина, рампата, паркингот и задната порта на објектот.
Стана јасно дека дел од камерите снимале само при детектирано движење. На една од снимките се слушаат истрели во самата колиба, при што се гледа и пожарот во објектот. На 2 февруари веќе нема траги од луѓе и возила во периметарот на колибата.
На некои од снимките се гледа и секојдневието на ренџерите, како и пристигнувањето или заминувањето на џиповите што ги користеле. Кадрите прикажуваат и ритуал, во кој учесниците клекнуваат и се поклонуваат до земја, упатувајќи благодарности и молитви.
Регион
Вучиќ се сретна со Макрон: Разменивме мислења за улогата на Србија и Франција во новиот свет што се создава
Претседателот на Србија Александар Вучиќ денеска, за време на посетата на Индија, се сретна со францускиот претседател Емануел Макрон.
„На другиот крај на светот, во Њу Делхи, со пријателот Емануел Макрон секогаш срдечно и во добро расположение, особено по исклучителната вечера што ни ја приредија љубезните домаќини“, напиша Вучиќ на Инстаграм и додаде:
„Иако немаше време за сериозни и тешки теми, искористивме неколку моменти да размениме мислења за самитот во Индија и за местото и улогата на Србија и Франција во новиот свет на чие создавање сме сведоци.“
View this post on Instagram
Во текот на денот, претседателот Вучиќ имал почесно место на вечерата во Њу Делхи што ја организирал индискиот премиер Нарендра Моди. На свечената вечера за светските лидери, Вучиќ седел покрај францускиот претседател Емануел Макрон.

