Македонија
Османи го најави овогодинешниот Преспа форум за дијалог
Министерот за надворешни работи, Бујар Османи, денес, одржа панел дискусија со домашниот граѓански сектор, вклучително и младинските организации, со која го најави одржувањето на Преспа Форум за Дијалог 2023, којшто ќе се одржи на 15 и 16 јуни 2023 година во Струга.
„ПФД полека го наоѓа своето место на мапата препознатливи меѓународни форуми и прераснува во наш бренд. Практички гледано, ПФД е единствениот форум со сеопфатна содржина којшто се одржува во Западниот Балкан. Потврда на неговата вредност и важност се и исклучително позитивни оценки искажани од бројните највисоки учесници – од десетина претседатели на држави и премиери на влади, министри за надворешни работи, претставници на меѓународни и регионални организации и, секако, на граѓанското општество, вклучително и од странство од каде што некои истакнати тинк-тенкови искажаа интерес за воспоставување соработка со ПФД. Ваквата позитива слика ја создава и обврската, ова ново издание да биде подеднакво добро осмислено и организирано”, рече Османи.
Кусо осврнувајќи се на изминатите изданија, Османи брифираше за отпочнатите активности за реализација на овогодинешниот форум, истакнувајќи дека ПФД2023 ќе ги рефлектира петгодишнината од потпишувањето на Преспанскиот договор, актуелното претседавањето на Северна Македонија со Организацијата за безбедност и соработка на Европа – ОБСЕ, САД – Јадранската повелба (А5) и Процесот за соработка во Југоисточна Европа – ПСЈИЕ во комплексен геополитички моментум.
Министерот Османи подвлече дека ПФД 2023 ќе настојува да го промовира конструктивниот дијалог, добрососедството и соработката во насока на изнаоѓање дипломатски решенија на тековните и идните предизвици на регионален и меѓународен план а меѓу темите ќе се најдат и борбата против корупцијата, хибридните закани, миграциите, странските малигни влијанија, меѓународните рестриктивни мерки како и евроинтеграцијата на Западен Балкан.
Во однос на младите, истана дека е во план да биде одржан засебен Младински ПФД2023 на 14 јуни, а со цел младинските претставници да можат да ги споделат заклучоците од нивните дискусии на сесиите и панелите на 15 и 16 јуни.
„Преку одржувањето на ПФД настојуваме, и како држава и како регион, да дадеме придонес во унапредувањето на дијалогот, заемната доверба и соработката коишто се клучни елементи во меѓународните односи и претставуваат камен темелник за мирот и долготрајната безбедност”, нагласи Министерот.
На дискусијата беа разменети идеи и мислења во контекст на содржинскиот аспект на новото издание со квалитетен придонес од страна на граѓанското општество и младинските организации со кој ќе се збогатат подготовките за одржување на уште еден успешен ПФД.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Во Гостивар, Маврово – Ростуше, Врапчиште и Центар Жупа се одржуваат повторени избори за градоначалник
Во општините Гостивар, Маврово – Ростуше, Врапчиште и Центар Жупа денеска се одржуваат повторени избори за градоначалник, откако во првиот круг од локалните избори не беше постигната потребната излезност.
Гласањето започна во 7 часот и ќе трае до 19 часот.
Согласно Изборниот законик, за избор на градоначалник потребно е еден од кандидатите да добие мнозинство од гласовите на излезените гласачи.
Вчера гласаа болните и изнемоштените лица, како и затворениците.
Државната изборна комисија во текот на денот ќе информира за текот на гласањето и излезноста, а првичните резултати се очекуваат по доставувањето од општинските изборни комисии.
Македонија
Променливо облачно и студено време со повремен снег
Времето денеска ќе биде променливо облачно и студено, со повремени локални врнежи од снег во претпладневните часови. Попладне се очекува врнежите постепено да престанат.
Од Управата за хидрометеоролошки работи информираат дека ќе дува умерен, а долж Повардарието повремено засилен ветер од северен правец. Утринските температури ќе се движат од минус пет до два степена, додека дневните ќе достигнат од минус еден до пет степени.
Во Скопје времето ќе биде променливо облачно, претпладне со повремени врнежи од дожд и снег. Ќе дува слаб до умерен северен ветер. Минималната температура ќе се спушти до минус еден степен, а максималната ќе достигне околу три степени.
Според најавите од УХМР, од почетокот на следната седмица се очекува стабилизирање на времето. Под влијание на поле на висок воздушен притисок, ќе преовладува суво и студено време, а на одделни места утринските температури ќе се спуштат и под минус десет степени.
Македонија
ДИК: До 19:00 часот гласаа 242 од пријавените 248 болни или немоќни лица во Гостивар, Врапчиште, Маврово – Ростуше и Центар Жупа
Државната изборна комисија информира дека до 19:00 часот денеска од вкупно 94 пријавени лица за гласање во казнено-поправните установи, гласале 45 лица. Од вкупно пријавените 248 болни или немоќни лица за гласање во четирите општини, Гостивар, Врапчиште, Маврово – Ростуше и Центар Жупа до 19:00 часот правото на глас го оствариле вкупно 242 лица. Две лица гласале во Центар Жупа, 66 болни или немоќни гласале во Маврово – Ростуше, 31 лице во Врапчиште и 143 лица во Гостивар.
Гласањето за сите овие категории на гласачи се одвиваше непречено и без никакви проблеми и недоследности, велат од ДИК.
ДИК известува дека резултатите од гласањето на болните, немоќните и лицата кои се на издржување казна затвор, не се објавуваат денеска посебно.
„Секое поединечно гласачко ливче е ставено во посебен затворен плик и во гласачките кутии и тие не се отвораат денеска. Броењето на овие гласови и објавувањето на резултатите од денешното гласање се врши заедно со резултатите од целокупното гласање на изборите утре по 19:00 часот, за секое избирачко место и секоја општина каде што се гласа“, стои во соопштението на Државната изборна комисија.

