Македонија
Спасовски во Белград со српскиот колега Гашиќ потпиша протокол за начинот на извршување проверки на граничниот премин Лојане – Миратовац
Денеска во Белград, Република Србија, министерот за внатрешни работи, Оливер Спасовски, оствари билатерална средба со својот српски колега, министерот за внатрешни работи на Република Србија, Братислав Гашиќ, а по повод потпишување на протоколот за начинот на извршување гранични проверки на заедничкиот граничен премин Лојане – Миратовац.
Истакнувајќи го напредокот на меѓусебна соработка меѓу двете министерства, како и пријателските добрососедски односи и партнерство, министерот Спасовски ја потенцира интензивната соработка помеѓу двете министерства за внатрешни работи.
„Во однос на билатералната стратешка и оперативна соработка помеѓу двете министерства за внатрешни работи, можам да констатирам дека таа се реализира доста интензивно како преку продуктивната договорна соработка така и преку непосредни контакти на двете полициски служби, решавање заеднички случаи, мешани патроли, вршење гранични проверки и воопшто преку спроведување заемна партнерска полициска соработка придонесувајќи на тој начин за зачувување на безбедноста и стабилноста во двете држави и во регионот“, рече министерот Спасовски.
Во однос на безбедносната состојба на државните граници, министерот Спасовски информира дека таа е стабилна и без позначителни промени во однос на изминатиот период, а во таа насока во текот на 2022 година забележан е тренд на зголемување за 31,22 % на обидите за илегални преминувања со спречени 27.391 обид, а истиот тренд продолжи и во јануари годинава.
„Во оваа пригода би сакал да изразам голема благодарност за постојаниот придонес на МВР на Република Србија со испраќањето полициски службеници, кои учествуваат во заедничката операција за засилен надзор на јужната граница, што значително придонесува во зајакнување на капацитетите во борбата против илегалната миграција, што е од непроценлива важност за нашата земја со оглед на притисокот со кој се соочуваме на јужната граница. Можам да пренесам само пофални зборови за соработката со српските колеги, кои се присутни на нашата јужна граница и кои преку своето искуство, знаење и утврдени практики на работење придонесуваат кон развивање на капацитетите на македонската гранична полиција“, истакна министерот Спасовски.
На крајот од средбата министерот Спасовски се заблагодари за топлиот пречек истакнувајќи го значењето од денешното потпишување на протоколот за начинот на извршување гранични проверки на заедничкиот граничен премин Лојане – Миратовац, со уверување за продлабочување на соработката.
„Иако македонските и српските гранични служби традиционално веќе подолго време заеднички соработуваат, со овој протокол ќе придонесеме во подетаљно уредување на начинот на извршување на граничните проверки на овој заеднички граничен премин. Уште еднаш во мое лично име и во име на мојата делегација се заблагодарувам на укажаната чест за средба со Вас и нашето заедничко потпишување на протоколот“, истакна министерот Спасовски.
Министерот за внатрешни работи на Република Србија, Братислав Гашиќ, ја истакна традиционално добрата соработка помеѓу двете министерства за внатрешни работи, со уверување дека тој тренд ќе продолжи. Тој ја потенцира важноста од соработка во борбата против организираниот криминал и нагласи дека за нејзина успешност неопходни се брза размена на информации и заедничка соработка помеѓу двете полиции.
Министрите Гашиќ и Спасовски истакнаа дека граничните служби на двете земји традиционално добро соработуваат и дека потпишаниот протокол ќе придонесе за детаљно уредување на начинот на извршување на граничните проверки на овој заеднички премин, а соработката ќе ја зајакне и направи поефикасна.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Муцунски на министерскиот состанок за надворешни работи во рамки на Берлинскиот процес
На покана на германската министерка за надворешни работи, Аналена Баербок, министерот за надворешни работи и надворешна трговија, Тимчо Муцунски, учествуваше на министерскиот состанок во рамки на Берлинскиот процес.
Во своето обраќање, Муцунски се заблагодари на министерката Баербок и на германското раководство за нивната решителност за унапредување на иднината на земјите од Западен Балкан кон Европската Унија и констатираше дека денес Берлинскиот процес сега е платформа која претставува составен дел од обновената посветеност на ЕУ за политиката на проширување и го одразува стратешкиот интерес на унијата да го интегрира Западен Балкан во своето семејство.
Муцунски потенцираше дека неопходно е да го удвоиме напори со цел да ги поттикнеме реформите и да ја забрзаме постепената интеграција, а нашите граѓани да можат да ги почувствуваат придобивките од членството во Европската Унија за време на процесот на пристапување, притоа нагласи дека во таа насока треба да се искористи рамката на Берлинскиот процес за да ја покажеме посветеноста за постигнување одржлив развој и поблиски врски на Западниот Балкан со Европската Унија.
Исто така, министерот Муцунски напомена дека Република Северна Македонија даде свој придонес во севкупните достигнувања на Берлиснкиот процес, притоа издвојувајќи ги одржувањето на првиот Дигитален самит за Западен Балкан во Скопје во 2018 година и усвојувањето на Заедничкиот регионален пазар и на Зелената агенда за Западен Балкан, за време на Заедничкото претседавање на Берлинскиот процес заедно со Бугарија во 2020 година.
Македонија
Мицкоски во Гази Баба: За 100 дена ги покачивме пензиите, продолжуваме да работиме посветено
„Навистина чувството е би рекол прекрасно колку во суштина ова покажува дека нашиот народ е скромен, нашиот народ е благодарен, нашиот народ е работлив, вреден и колку малку треба за човек да биде среќен. Јас сум благодарен што можам да го видам тоа денес на вашите лица и тоа за нас преставува инспирација да продолжиме да работиме уште понапорно за во периодот кој што следи да овозможиме уште поголеми пензии, да овозможиме уште поголема перспектива за вашите внуци, синови, ќерки да ги гледате вашите внучиња тука во Македонија затоа што нема поголема мака од тоа кога мајка, баба, се дели од своето чедо кое што поради бесперспективност, разочарување ја напушта својата држава, својата татковина, рече претседателот на Владата, Христијан Мицкоски на денешната средба со пензионерите во Општина Гази Баба.
Мицкоски истакна дека Владата продолжува да работи посветено за сите граѓани.
„Продолжуваме и понатаму, тоа беше едно обично само предизборно ветување; многумина не прашуваа од каде ќе најдете пари, како ќе најдете пари- успеавме да најдеме пари, а пари најдовме на начин на којшто ние не сакавме да ги крадеме граѓаните, не сакавме да ве крадеме вас туку сакавме да работиме чесно, достоинствено и на тој начин да имаме поголем прилив во буџетот и со тој поголем прилив во буџетот да овозможиме вие да уживате во тоа што сте го заслужиле работејќи макотрпно целиот ваш работен век. И зашто требаше да поминат 100 дена? Затоа што овие 100 дена кога го правевме планот беа претпоставени дека ќе бидат доволни да можеме да акумулираме доволно заштеда да овозможиме да имаме најпрвин половина од онаа сума којашто ја ветивме, а потоа за уште 6 месеци со новиот буџет и втората половина што во рок од 9 месеци не од година го испорачаме тоа ветување коешто сме го дале“, рече тој.
Мицкоски потсети и што наследиле од претходната власт потенцирајќи дека тоа што го ветиле сакале да го испорачаат. И полека но сигурно, со многу трпение, со многу мудрост, ум и стратегија тоа да го реализира.
„Состојбата беше многу сложена, многу тешка, првиот ден кога дојдовме на работа, 24ти Јуни, сметката на владата беше – 200 милиони евра. Ниту една не затекнала такво цунами како што оваа Влада затекнала. Работевме многу, макотрпно, чесно и можам да кажам дека полека но сигурно приходите во буџетот се зголемуваат затоа што веќе народот никој не го краде, никој нема право да го краде, туку треба да работи за народот, да биде слуга на народот. УЈП ги зголемуваше своите приходи, Царината ги зголемуваше своите приходи, и на тој начин има повеќе за вас, повеќе за граѓаните. Тоа е она за коешто се заветивме како Влада и тоа е она што ќе го работиме. Но има и други работи коишто ги направивме, коишто вие можеби во меѓувреме не ги гледавте и не сакавме многу да зборуваме. Повеќе да работиме, помалку да зборуваме“, истакна премиерот.
„Пред да се направи ребалансот на буџетот во кој што беа предвидени овие зголемувања и покачувања на пензиите, тој кажа дека претходната Влада заборавила во првата верзија од буџетот кој што беше тековен да предвиди ни повеќе ни помалку 5 милијарди денари. Тоа е 80 милиони евра за тековните, и не станува збор за покачените, за тековните недостасувале 5 милијарди денари. Така што со ребалансот не само што ги обезбедиле овие зголемувања коишто се мали , недоволно, но доволно за човек денеска да се почувствува малку горд.
Ги обезбедивме и оние 5 милијарди да исплата на досегашните висини на пензиите. Понатаму, не сакам да заборавите и една друга работа која со министерот за здравство ја промовиравме а тоа е дека после една деценија вклучивме нови 9 генерички лекови на позитивната листа, листа на којашто вие нема да плаќате партиципација ќе ви бидат бесплатни. Со тоа се заштедуваат милиони, милиони пари од граѓаните“, истакна Мицкоски.
Премиерот кажа дека се продолжува со надградба на ова листа и понатаму се продолжува да се штеди за граѓаните. Граѓаните коишто ги користат тие лекови ќе бидат со помали трошоци, со поголема заштеда и ќе може да добиваат лекови со поголем квалитет.
„Понатаму исто сакам да кажам дека успеавме со мерките коишто ги воведовме, за прв пат после две години инфлацијата да ја спуштиме на ниво за 2, 2 % , најниска во август во регионот и најниска во Европа. Не напаѓаа, платите не растеле. Видовте државниот завод за статистика во месец Јули излезе со податоци дека не само што растат платите туку дека растат споредбено со минатите години но тога цените и инфлацијата беа 25 % сега се само 2,2%. И тоа не е доволно, ќе биде уште пониско со новите мерки помалку трошоци, повеќе за вас“, потенцира премиерот.
Тој кажа дека сето тоа што го работеле во изминатиот период, целта била само да се направиме нешто повеќе за граѓаните. За граѓаните истакна тој затоа што тие ја дале довербата на 8ми Мај, за да речиси за 5 месеци најмалку што може да се направи, и тоа што е ветено е и испорачано.
„За овие 100 дена некој ќе ми го постави прашањето: Дали сте задоволни? Секогаш може повеќе. Но, сум задоволен. Задоволен сум затоа што го оставивме срцето на терен, затоа што се боревме храбро, затоа што работевме чесно, вредно и макотрпно и затоа што во првите 100 дена најголем број од големите ветувања ние ги испорачавме, Во месеците и годините коишто следат имаме многу позитивни изненадувања, уште многу ваков тип на испораки, уште многу насмеани лица бидејќи тука ќе завршам како и што започнав, вашата насмевка е наша инспирација. Вашата насмевка е наша награда за сето тоа што го правевме досега, а јас ве уверувам и ви давам збор дека ќе продолжиме истото да го правиме за вас бидејќи вие тоа го заслужувате. Да сте ми живи и здрави, Бог да ни ја благослови Македонија и да се гледаме за убави работи“, заклучи премиерот.
Македонија
Сиљановска Давкова со гувернерките на централните банки од регионот: жените на челни позиции во финансискиот сектор носат голема одговорност
Претседателката Гордана Сиљановска Давкова денеска ги прими гувернерката на Народната банка, Анита Ангеловска-Бежоска и гувернерките на централните банки од регионот: Ирена Радовиќ на Црна Гора и Јасмина Селимовиќ на Босна и Херцеговина, кои учествуваа на конференцијата „Централните банки и централнобанкарското работење во комплексно опкружување: Покажување посветеност и одржување на кредибилитетот“, што во организација на Народната банка на Република Северна Македонија и Комитетот за преобразување на Бретон Вудс, се одржа денеска во Скопје.
На средбата се разговараше за улогата на жените на раководни позиции и перспективите за ефективно управување и носење одлуки, поттикнувајќи ги иновациите и продуктивноста, а особено нивниот пристап кон социјалните прашања, преку политиките коишто застапуваат еднаквост и образование.
Соговорничките посочија дека зголемувањето на учеството на жените на раководни позиции не е само прашање на правичност, туку и стратегиска предност за создавање поурамнотежени и напредни економии и дека женското лидерство е од клучно значење за поттикнување инклузивен економски раст и општествен развој.
Претседателката Сиљановска Давкова, нагласувајќи дека жените на челни позиции во финансискиот сектор носат голема одговорност, порача дека тие претставуваат пример и инспирација за сите други жени кои го бараат своето место во општеството да ја постигнат својата професионална цел и кариера.