Свет
Путин и Ванг Ји: Односите меѓу Русија и Кина се развиваат според планот
Русија ја чека посетата на кинескиот претседател, што ќе даде дополнителен поттик за развојот на односите меѓу двете земји, изјави рускиот претседател Владимир Путин на средбата со директорот на кинеското централно Министерство за надворешни работи, Ванг Ји.
Секако, го чекаме претседателот на Народна Република Кина да ја посети Русија. За тоа се договоривме порано. Разбираме дека има внатрешнополитичка агенда. Но, тргнуваме од фактот дека сите прашања поврзани со оваа агенда се решени, рече Путин.
Путин истакна дека страните тргнуваат од спроведување на своите планови преку лични средби, што ќе даде дополнителен поттик за развојот на односите меѓу Русија и Кина.
На самиот почеток на средбата рускиот лидер истакна дека односите меѓу Русија и Кина се развиваат според планот и дека двете земји достигнуваат нови пресвртници.
„Сакам да нагласам дека руско-кинеските односи се одвиваат според планираното во претходните години. Достигнуваме нови пресвртници“, рече Путин.
Путин додаде дека соработката меѓу Русија и Кина е од големо значење за стабилизација на меѓународната ситуација.
Кинескиот дипломат Ванг Ји му рекол на Путин дека другите земји не може да влијаат на односите меѓу Пекинг и Москва.
„Подготвени сме да го продлабочиме нашето стратешко партнерство“, рече Ванг.
Ванг му ги пренел на Путин поздравите на кинескиот претседател, кој му посакал сè најдобро.
Тој истакна дека другите земји не може да вршат притисок врз односите меѓу Русија и Кина.
„Нашите односи не се насочени против трети земји“, рече кинескиот дипломат, пренесе „Блиц.рс“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Прослава на улиците на Техеран поради нападот врз Израел
Стотици Иранци излегоа на улиците на Техеран за да го прослават нападот во кој беа истрелани речиси 200 проектили кон Израел.
Свет
Советникoт за национална безбедност на САД: Нападот беше поразен и неефикасен
Американскиот советник за национална безбедност, Џејк Саливан, одржа прес-конференција во Белата куќа.
Тој потврди дека Соединетите Држави соработуваат со Израел за да го проценат влијанието на нападот и повтори дека во овој момент се знае дека никој не е убиен.
„Накратко, овој напад се чини дека е поразен и неефикасен“, нагласи тој.
Како што нагласи, нападот претставува значајна ескалација од страна на Иран.
„Подеднакво е значајно што успеавме да зачекориме напред со Израел и да создадеме ситуација во која никој не е убиен во Израел колку што знаеме во моментов“, додаде тој.
Потврди дека Белата куќа јасно ставила до знаење дека ќе има последици за овој напад.
Претставник на американското Министерство за одбрана изјави дека разурнувачите на американската морнарица во Средоземното Море пресретнале ирански балистички ракети за време на нападот врз Израел.
Американски разурнувачи учествуваа и во пресретнувањето на ирански балистички ракети и беспилотни летала на 13 април, соборувајќи неколку проектили лансирани кон Израел.
Свет
Мексико официјално ја доби својата прва жена претседател во историјата
Поранешната градоначалничка на Мексико Сити, Клаудија Шејнбаум, денеска официјално стана првата жена претседател на Мексико од независноста на земјата во 1821 година, наследувајќи го популарниот Андрес Мануел Лопез Обрадор на таа позиција.
Шејнбаум, климатски научник со еврејско потекло, положи заклетва пред претставници и сенатори во Мексиканскиот конгрес.
Во јуни таа победи на изборите со речиси 60 отсто од гласовите, откако излезе пред владејачката левичарска партија Движење за национална обнова (Морена) и сојузниците.
Тие имаат и удобно мнозинство во парламентот, што им овозможува да го променат Уставот без поддршка од опозицијата. На инаугурацијата пристигнаа бразилскиот претседател Луис Инасио Лула да Силва и првата дама на САД Џил Бајден.
Поранешната градоначалника на Мексико Сити ја превзема функцијата од нејзиниот ментор, Андрес Мануел Лопез Обрадор, кој ја воведе во политиката во 2000 година како заменик за еколошки прашања во градското собрание на мексиканската престолнина.
Веднаш по победата таа најави дека нејзината влада ќе биде фискално одговорна и ќе ја почитува автономијата на централната банка. Најави и дека ќе ја зајакне безбедноста на земјата, но не кажа како ќе го направи тоа по најнасилните избори во модерната мексиканска историја, пред кои беа убиени 38 кандидати.
Аналитичарите тврдат дека организираните криминални групи го зајакнале и го прошириле своето влијание за време на мандатот на Лопез Обрадор.
Ја удвои минималната плата, ја намали сиромаштијата, за време на неговиот мандат зајакна пезото, а невработеноста се намали, што го направи исклучително популарен, напиша Ројтерс.
Тој беше многу присутен во кампањата за овие избори, обидувајќи се да ги прикаже како референдум за неговото политичко наследство. Шејнбаум ги отфрли тврдењата на критичарите дека таа ќе биде негова „марионета“, иако најави дека ќе продолжи со многу од неговите политики.