Македонија
Кисела Вода и „Биотек” им доделија здравствени ваучери на децата со попреченост
Со слоганот „Ретко е да си редок“, Општина Кисела Вода заедно со компанијата „Биотек“ го одбележа денешниот 28 март, Светскиот ден на лицата со ретки болести.
По тој повод, на децата со посебни потреби, во двете сензорни соби, што општината заедно со оваа компанија ги изгради минатата година, им беа доделени 25 ваучери во вредност од 6.000 денари, кои им овозможуваат педијатриски невролошки преглед, комплетна крвна слика и ЕЕГ по индикација.
„Симболично, денес, на Светскиот ден на лицата со ретки болести, кој во нашата општина е еден од многуте денови кога се подигнува свесноста за луѓето со ретки болести, компанијата ‘Биотек’ и Општината на дечињата со попреченост им доделија ваучери за невролошки преглед, а специјалистот што го врши прегледот ќе одреди доколку некое дете има потреба од ЕЕГ и ќе се изврши снимање, што би овозможило навремена дијагностика и ран третман. Дополнително, вредносниот ваучер опфаќа и целосна крвна слика. Сакаме да ѝ се заблагодариме на ‘Биотек’ како компанија што во повеќе наврати ја покажува својата општествена одговорност и со која веќе отворивме две сензорни соби, што ја поддржува и следи идејата на Општина Кисела Вода за овозможување целосен развоен потенцијал на овие дечиња. Се надеваме дека соработката во вакви и слични проекти ќе продолжи и понатаму, а ние како локална самоуправа ќе продолжиме и со самостојни инвестиции во насока на унапредување на условите за децата со попреченост и нивна социјализација. Секое дете заслужува еднакви можности за добра здравствена грижа и соодветен раст и развој“, велат од Општина Кисела Вода.
„На светскиот ден на ретки болести се приклучуваме кон кампањата за будење на свесноста за брз пристап до здравствена стручна нега и грижа, рана дијагностика на аутизам, други разни невролошки состојби и синдроми поврзани со епилепсии, но и без, атипичен развој кај децата што немаат аутизам, но се со разни посебни потреби. Ја потенцираме важноста за рушење на стигмата и изолацијата со која овие деца и нивните родители секојдневно се среќаваат при остварување на своите права. Да се обезбеди брз и ран пристап до стручна грижа и нега кај педијатар за развојно невролошко следење, ултразвучно следење на развојот на мозокот и рана ЕЕГ-дијагностика, а што е фундамент во раната дијагностика на невролошките состојби и синдроми, како што се аутизмот, АДХД, епилепсиите и епилептичните синдроми и раните структурни и наследни болести на мозокот. Со рана навремена дијагностика пред навршувањето на првата година кај детето овозможуваме шанса за добар терапевтски третман, добар невролошки развој и брзо вклучување и адаптирање кон образовните институции, како и оспособување на единката за самостојно функционирање“, изјави д-р Катерина Василева-Димовска, специјалист педијатар, која ја вршеше тријажата на дечињата.
„Групацијата Биотек продолжува со своите хуманитарни акции наменети за децата со специјални потреби. Оваа година, по повод денот на ретките болести, на децата на кои минатите години им дониравме сензорни соби и други помагала, со нашиот нов член на групацијата, Поликлиниката ‘Биотек’, ќе им подариме 24 ваучери за невролошки прегледи. Децата се нашата иднина. Ние се трудиме да ја помогнеме нивната иднина. Драго ми е што со раководството на Општина Кисела Вода делиме заеднички приоритети и преку заемната соработка овозможуваме афирмација на вистинските вредности. Денешниот настан е еден одличен пример за она што погоре го спомнавме“, истакна директорката на „Биотек“, Анкица Синадинова-Базерко.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
На граничните премини од македонска страна нема подолги задржувања
АМСМ информира дека на граничните премини од македонска страна, нема подолги задржувања за влез и излез од државата.
Како што стои во соопштението, сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е умерен.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Купови со отпад на паркингот кај гробиштата во Бутел
Повторно купови со отпад на паркингот кај гробиштата во Бутел.
Поранешниот директор на АД „Пошта“, Јани Макрадули на својот Фејсбук профил објави фотографија од состојбата на гробиштата. Како што вели, ова е тажна слика за еден град кој системски се уништува.
Македонија
Земјава нема развиен концепт за менаџирање со дијабетесот, вели Велев
Во организација на Сојузот на здруженија на дијабетичари и Здружението на лица со дијабетес „Алегрија“, денеска во Градскиот парк во Скопје под мотото „Сѐ за нас – за нас“, се одржа едукативен настан за подигнување на свесноста за тоа како живеат лицата со дијабет.
Претседателот на Здружението на лица со дијабетес „Алегрија“, Диме Велев, рече дека со реализацијата на проектот се укажува дека лицата со дијабетес се нормални луѓе кои што се дел од заедницата и се придонесува кон уривање на стереотипите кои постојат за лицата со дијабетес.
„Почнавме реализација на проект за подигнување на свеста за користење на новите во технологии во менаџирање со дијабетесот, пред сѐ „CGM“ системите или системи за континуирано мерење на гликоза, за новите технологии во делот на апарати со дигитална размена на податоци, како и за рушење на стереотипите за тоа дека лицата со дијабетес се нешто посебни, тие се многу нормални луѓе кои што се во заедницата“, рече Велев.
Посочи дека целта на целиот проект е да се убедат властите дека луѓето кои што користат „CGM“ системи се работноспособни и присутни во заедницата, како и да се освестат за потребите на луѓето дека имаат многу кратко време за навремена реакција. Вели земјава нема примена на доволно развиен концепт на менаџирање со дијабетес.
„Сѐ уште имаме пречки, затоа што ние немаме доволно луѓе кои што се поставени на „CGM“ системи, во Македонија немаме примена на доволно развиен концепт на менаџирање со дијабетес. Кога сето тоа ќе се воведе, ќе се изгради сета таа нова дијабетес култура, дека е многу нормално да се користи, дека е многу поквалитетно да се користи, тогаш нема да има потреба од нови правила за некое право на човек со дијабетес после пет минути да отиде настрана да касне нешто или да се освежи и да се врати на работа или на училиште“, рече Велев.
Преку интерактивен собир, денеска лицата со дијабетес ТИП 1, особено младата популација до 25 години, имаше можност да се потсети на основните постулати при секојдневното живеење со дијабетес.
На настанот беа поставени штандови со глукомери и ленти за мерење на нивото на шеќер во крвта, како и штандови со корпи и обучени лица на кои граѓаните имаа можност да видат колку јаглехидрати содржи секое овошје или зеленчук.