Македонија
Маричиќ и Британецот, Стјуарт Пич разговараа за уставните измени и преговорите за членство во ЕУ
Вицепремиерот задолжен за европски прашања Бојан Маричиќ се сретна со Лорд Стјуарт Пич, специјалниот претставник на Обединетото Кралство за Западен Балкан, на која разговараа за динамиката на евроинтегративниот процес, развојот на политичките настани во Северна Македонија и за состојбите во регионот.
Соговорниците на средбата констатираа дека континуитетот на преговорите на Северна Македонија со ЕУ е клучен и за стабилноста на целиот регион.
„Северна Македонија има можност брзо да напредува во процесот на преговори со ЕУ. Во овој момент од уставните измени ќе зависи не само европската иднина и позиционирањето на државата во односите со ЕУ, туку и мирот и безбедноста на целиот регион“, се дел од пораките на средбата на вицепремиерот Маричиќ со Пич, информираат од Секретаријатот за европски прашања.
Лорд Стјуарт Пич, придружуван од амбасадорот Метју Лосон, на средбата ја потврди безусловната поддршка која Северна Македонија ја има од Обединетото Кралство на европскиот пат и во спроведувањето на реформите.
Во контекст на регионалната стабилност и напредокот на Западен Балкан кон ЕУ, соговорниците разговараа и за средбата на највисоко ниво меѓу претставниците на Белград и Приштина, во Охрид, поздравувајќи го дијалогот, што според нив е од голема геостратешка важност која бара конструктивен ангажман на двете страни.
Вицепремиерот и главен преговарач со ЕУ Маричиќ на средбата посочи дека Северна Македонија има демократски капацитет, е одговорна и сериозна држава за членство во ЕУ, која и понатаму ќе биде посветена на регионалните инцијативи, како и на зачувување на мирот, стабилноста и просперитет на регионот, бидејќи како што укажал Маричиќ, „тоа е во наш интерес и во интерес на Европа“.
На средбата, на која присуствуваше и државната секретарка во Секретаријатот за европски прашања, Дрита Абдиу-Халили, беше потврдена целосната подготвеност за унапредување на соработката и континуирана комуникација за надминување на предизвиците.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Претседателката Сиљановска Давкова се сретна со генералниот секретар на Советот на Европа, Алан Берсе
Претседателката Гордана Сиљановска Давкова во рамки учеството на 79. Генерално Собрание на Обединетите Нации во Њујорк, оствари средба со генералниот секретар на Советот на Европа, Алан Берсе.
На средбата беа разменети мислења за целите и приоритетите насочени кон демократизацијата на македонското општество, човековите права и владеењето на правото. Реафирмирајќи ја посветеноста за натамошна конструктивна соработка со Советот на Европа, претседателката Сиљановска Давкова изрази задоволство од континураната поддршка за нашето целосно усогласување со европските стандарди и вредности.
Претседателката Сиљановска Давкова ја нагласи важноста од кредибилно постапување на Европската Унија во однос на интеграцијата на земјите од Западен Балкан кога напредокот на поединечните кандидати е евидентно заслужен. Таа се осврна и на неопходното обезбедување усогласеност со обврските што земјите-членки ги презеле, вклучително и правилното спроведување на пресудите на Судот во Стразбур.
Соговорниците разговараа и за актуелните безбедносни состојби во Европа, со акцент на војната во Украина, како и за потребата од посветеност и заеднички пристап кон сегашните и идните предизвици какви што се влијанието на новите технологии и климатските промени врз човечките ресурси.
На средбата претседателката Сиљановска Давкова упати честитки до новоизбраниот генерален секретар на Советот на Европа, Алан Берсе, изразувајќи искрени желби за успешно исполнување на важната мисија и продолжување на плодната соработка со македонските институции.
Македонија
(Видео) Битиќи: Над 75% од граѓаните се за членство во ЕУ, власта да каже која е алтернативата
Во сите анкети над 75% од граѓаните велат дека се за членство во ЕУ. Политичарите имаат обврска да носат одлуки, за да одговорат на нивното очекување. Владата треба да каже кој е нивниот план. Очигледно гледаме сценарио во кое за жал продолжува стариот манипулативен приод на оваа гарнитура, да изманипулираме што можеме за избори а после кога ќе ја добиеме власта ништо од тоа не важи, рече пратеникот на СДСМ, Фатмир Битиќи во одговор на новинарско прашање.
На власта беше да ги подобри условите како што ветуваше, додаде тој.
-И сегашната партија ВМРО-ДПМНЕ нема добиено повеќе од 25% од вкупниот број граѓани на изборите Легитимитетот на изборите не мора да значи дека се носат добри одлуки. Но и да прифатиме дека е тоа така, нивно беше да ги сменат условите. Да го сменат и Францускиот предлог, да ја сменат и преговарачката рамка, и да го вратат името. Очигледно гледаме сценарио во кое за жал продолжува стариот манипулативен приод на оваа гарнитура, да изманипулираме што можеме за избори а после кога ќе ја добиеме власта ништо од тоа не важи, додаде Битиќи.
Која е алтернативата? Власта треба да каже како понатаму после одвојувањето на европскиот пат, рече Битиќи.
-Наредната недела изминуваат 100-те дена и убаво на следните пратенички прашања Владата да дојде со план каде ќе се движи Македонија во наредните години, кога е очигледно одвојувањето на европскиот пат од другите земји.
Македонија
ВМРО-ДПМНЕ: СДС и ДУИ со практикувањето на корупција и криминал, ставија печат на тонењето на Македонија на патот кон ЕУ
Владата предводена од СДС и ДУИ седум години од владеењето имаше само една цел, а тоа е како да полнат џебовите на поединци, наместо да работат на исполнување на европските вредности, велат од ВМРО-ДПМНЕ.
„Владата на СДС и ДУИ, со практикувањето само на корупција и криминал, ја врати Македонија многу назад на планот на европските интеграции.
Резултат на седумгодишното владеење на СДС и ДУИ е Македонија да остане на дното на патот кон ЕУ, односно и Албанија да оди напред. Лицата Зоран Заев, Венко Филипче и Артан Груби се креатори на црното сценарио за Македонија. Што направија тие за патот на Македонија кон ЕУ?
Прво, лажеа дека Македонија почнала преговори. Второ, практикуваа само корупција и криминал што е сосема спротивно на залагањата на ЕУ. Со ова Заев, Филипче и Груби ставија печат не само на стагнирање, туку и на назадувањето на Македонија, наместо на напредок кон ЕУ.
Тие ставија печат на рекордно ниското ниво на доверба во правосудството, уништено здравство, ученици без учебници, низок стандард на живот и слично. Заев, Филипче и Груби се единствените виновници за изгубените седум години на Македонија на патот кон ЕУ.
Заев, Филипче Груби се единствените виновници што стигнавме до тоа Албанија да е пред нас. ВМРО-ДПМНЕ работи исклучиво врз вистински вредности кои се во интерес на сите граѓани и Македонија“, пишува во партиското соопштение.