Коалицијата ВЛЕН ќе предложи свој кандидат за градоначалник на Скопје, кажа денес првиот вицепремиер и министер за животна средина Изет Меџити. Во коалицијата се уште траат анализите за настап на претстојните локални избори, а засега извесно е само дека ќе го поддржат независниот кандидат за градоначалник на Струга, Менди Ќура.

„Ќе имаме кандидат за Град Скопје. Кој ќе биде и за Чаир и Скопје и за сите општини предложен од ВЛЕН, ќе биде извесно многу скоро.  Досега ВЛЕН има определено да даде поддршка на независниот кандидат Менди Ќура, за Струга. При крај сме со сите општини со анализите, разговорите, мислам дека наредната недела ќе ги објавиме сите“, рече денес Меџити.

Како што е пракса во плурализмот, односно од деведесеттите навака, Меџити вели дека и за овие локални избори владините партнери ќе си помагаат исто како што си помага опозицијата.

Кандидатот од ВЛЕН за градоначалник на Град Скопје ќе се бори со актуелниот градоначалник на Кисела Вода, Орце Ѓоргиевски кој е кандидат од ВМРО-ДПМНЕ и поранешната министерка за животна средина Каја Шукова, кандидатка на СДСМ.

На денешната собраниска седница се обрати пратеникот од редовите на ВМРО-ДПМНЕ, Сергеј Попов, кој истакна дека младите луѓе во Македонија добија партнер во државата, а воедно и дека од септември секој студент, кој е запишан на додипломски студии, ќе добие вредносен ваучер од 250 евра за електронски уред.

„Констатирам дека кога е ВМРО-ДПМНЕ во прашање и младите во Република Македонија, зборот е збор и затоа денес се гордеам што сум овластен предлагач на Законот за вредносните ваучери, со кој секој студент запишан на додипломски студии на возраст до 29 години од септември ќе добие вредносен ваучер од 250 евра за да набави електронско помагало во форма на лаптоп, таблет или персонален компјутер“, вели Попов.

Пратеникот Попов посочи дека младите се во фокусот на оваа Влада, дека сѐ што е ветено е испорачано како со проширувањето на опсегот за студентски оброк така и со вредносните ваучери за студентите, односно ветувањата што ВМРО-ДПМНЕ ги дава се остваруваат за разлика од седумгодишното владеење на минатата власт.

„Ветувањата што ВМРО-ДПМНЕ ги дава пред младите луѓе не се декларативни. Младите луѓе во Република Македонија добија партнер од страна на Владата, младите повторно имаат мајка Македонија, а не маќеа, како што беше седум години. Секогаш ќе настојувам мојата партија да ги застапува младинските интереси вистински и во пракса, а не само декларативно преку видеоспотови и празни флоскули. Со Законот за вредносните ваучери 250 евра за секој студент во државата многу бргу ќе биде реалност, а во иднина и многу други работи со оваа Влада и ова владејачко мнозинство ќе стануваат реалност“, рече Попов.

СДС да се навикне дека функционирањето на институциите не е притисок и дека никој не е над законот, секој кој се огрешил ќе одговара, реагира ВМРО-ДПМНЕ на прес-конференцијата на Александар Саша Димитријевиќ од СДСМ кој обвини дека пријавата за градоначалникот на Крива Паланка е срамен притисок и црна кампања на власта против успешните градоначалници на СДСМ.

„СДС треба да се навикне дека законот важи и треба да важи еднакво за сите.Помина времето на селективност и заштита на партиските лица и функционери на СДС.

Времето кога прекршувањето на законите од страна на државните функционери беше правило и тие поминуваа неказнето, заврши со заминувањето на СДС во опозиција.

Монтираните процеси, реваншизмот и прогонот кон неистомислениците се одлика што го одбележа седумгодишниот период на владеење на СДС.

Редовното функционирање и инспекциите на институциите во општините и општинските претпријатија, не е и не може да се смета за притисок.

Тоа е редовна пракса и обврска на инспекциските служби и таа се спроведува во сите општини, без исклучок.

Институциите се независни, работат согласно закон и постапуваат во согласност со доказите и фактичката состојба.

Наместо сега да плачи на прес-конференции, СДС и нејзините, и така малку функционери што ги има, да почнат да ги почитуваат законите и да работат во интерес на граѓаните“, пишува во реакцијата.