Свет
Нов закон на Путин: 5 години затвор за ширење „лажни вести“ за руските платеници
Рускиот претседател Владимир Путин денеска потпиша закон со кој се воведуваат долги затворски казни за „дискредитација“ и ширење „лажни информации“ за која било воена организација, вклучително и озлогласената платеничка единица Вагнер група, која се бори за Русија во Украина, пишува „Москва тајмс“.
Речиси сите антивоени гласови во Русија беа замолчени откако беа забранети „дискрредитирањето“ и ширењето „намерно лажни“ информации за руските вооружени сили, набргу откако земјата ја нападна Украина во февруари 2022 година.
Новиот закон, за кој лобираше основачот на групата Вагнер, Евгениј Пригожин, го прогласи за кривично дело јавното критикување или ширењето на таканаречените „лажни информации“ за доброволните сили, како и за приватните платенички единици.
На прекршителите им се заканува казна затвор до пет години или парична казна до 300.000 рубљи (во моментов околу 3.600 евра) за „јавни акции насочени кон дискредитација на волонтерски формации, организации или поединци“ кои и помагаат на руската војска, доколку акцијата биде извршена во рок од една година на првиот престап.
Ширењето на она што властите го сметаат за „лажни информации“ за волонтери ќе се казнува со затвор до пет години или парична казна до 1,5 милиони рубљи (околу 18.000 евра).
„Секој кој денеска го ризикува својот живот за да ја гарантира безбедноста на земјата и нејзините граѓани, е заштитен од лаги и провокации“, рече претседателот на Државната дума, Вјачеслав Володин, за законот непосредно по гласањето во долниот дом на рускиот парламент во вторникот,пренесе Индекс.хр.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Претседателот на Колумбија: Ги раскинуваме дипломатските односи со Израел
Колумбискиот претседател Густаво Петро изјави дека ќе ги прекине дипломатските односи со Израел поради војната во Газа.
Петро претходно силно го критикуваше израелскиот премиер Бенјамин Нетанјаху и повика Колумбија да се приклучи на тужбата за геноцид на Јужна Африка против Израел пред Меѓународниот суд на правдата.
„Овде пред вас, владата на промени, претседателот на републиката, најавува дека утре ќе ги прекине дипломатските односи со државата Израел, затоа што има влада, затоа што има претседател геноциден“, рече Петро на собир по повод Меѓународниот ден на трудот.
Светот не може да биде слеп пред настаните во Газа, додаде тој.
Во шестмесечната воена операција на Тел Авив загинаа 34.488 Палестинци, а ранети се 77.643, според здравствените власти во Газа. Војната ги расели повеќето од 2,3 милиони жители на Појасот Газа и го уништи најголемиот дел од крајбрежната енклава.
Најавата на Петро за прекин на дипломатските односи со Израел доаѓа во екот на се почестите шпекулации дека Израел наскоро ќе го нападне градот Рафах во јужниот дел на Газа, каде што се засолниле повеќе од милион Палестинци раселени од своите домови.
Регион
Tлото на Балканот се тресе: По Хрватска, земјотреси и во Албанија и Грција
Два земјотреси, во растојание од една минута – во 19.19 и 19.20 часот – вечерва се регистрирани на територијата на Албанија.
Земјотресите се со интензитет од 2,1 степен според Рихеровата скала.
Епицентарот на првиот земјотрес бил на седум километри од Елбасан, додека вториот на 62 километри од Тирана.
Според информациите на ЕМСЦ, неколку минути претходно, земјотрес од 2,5 степени имало и во јужниот дел од Грција, а уште два од 2 и 2,3 степени се регистрирани предмалку на Крит.
Претходно денес, Хрватска ја погоди силен земјотрес од 4,7 степени, а беше почувствуван и во Босна и Херцеговина. По овој потрес, следеа неколку помали.
Свет
Хамас: Одговор за предлогот за примирје и ослободување на заложниците веројатно утре
Водачите на Хамас вечерва рекоа дека го проучуваат предлогот за примирје и ослободување на заложниците што им го претставија египетските посредници и велат дека се надеваат оти ќе го испратат својот одговор до утре, се вели во соопштението на палестинската милитантна група испратена до „Асошиејтед прес“.
Тековната рунда разговори за примирје меѓу Израел и Хамас изгледаат сериозни, но страните се во несогласување за едно клучно прашање – дали војната треба да заврши како дел од договорот, објави „Тајмс оф Израел“.
„Многу веројатно утре, односно четврток, ако даде Господ, посредниците ќе добијат одговор“, соопшти Хамас.
Преговорите меѓу Хамас и Израел, преку посредници како САД, Катар и Египет, траат со недели, а по Париз се водат нови рунди разговори во Каиро.