Свет
Руските мировници ја прекинаа размената на оган на ерменско-азербејџанската граница
![руски војници граница](https://makfax.com.mk/wp-content/uploads/2023/04/руски-миротворци.jpg)
Руските мировници презедоа итни мерки за смирување на тензиите на ерменско-азербејџанската граница, каде што во вторникот имаше размена на оган во близина на селото Тег, изјави портпаролката на руското Министерство за надворешни работи, Марија Захарова, за ТАСС.
„На 11 април имаше вооружен инцидент кај селото Тег на линијата на прекин на воените дејства на ерменско-азербејџанската граница. За жал, достапните информации велат дека има жртви. Руските мировници, кои беа во областа, веднаш стапија во контакт со ерменските и азербејџанските официјални претставници и презедоа мерки за деескалација“, вели Захарова.
Таа посочи дека инцидентот уште еднаш ја потврдува потребата од воздржаност од страна на Баку и Ереван, како и строго почитување на трилатералните договори склучени од лидерите на Русија, Азербејџан и на Ерменија.
Министерствата за одбрана на Ерменија и на Азербејџан пријавија вкупно седум загинати меѓу припадниците на своите трупи во обновениот вооружен судир, пренсува Радио Слободна Европа.
Министерството за одбрана на Ерменија извести во вторникот дека четворица ерменски војници биле убиени, а шестмина биле ранети како резултат на азербејџанската провокација, додека Министерствота за одбрана на Азербејџан извести за тројца загинати во редовите на неговата армија.
Ереван и Баку повторно меѓусебно си ја префрлаат вината за предизвикување на најновиот вооружен судир.
Ерменското Министерство за одбрана соопшти дека азербејџанските војници распоредени во полињата во близина на ерменското село Тег, во рамките на ерменската суверена територија што ја зазеле две недели претходно, отвориле оган кон ерменските војници кои вршеле инженерска работа таму.
Како што се наведува, борбите во јужната провинција Сјуник почнале попладднето и траеле најмалку еден и пол час во текот на кои Азербејџан наводно ги гранатирал ерменските позиции.
Министерството за одбрана на Азербејџан претходно ги обвини ерменските сили за провокација како резултат на која биле убиени и повредени неколку азербејџански војници.
Обновените борби следуваа по инцидентот во понеделникот во кој ерменските безбедносни сили привеле еден Азербејџанец, а трагале по друг за кој исто така се смета дека влегол во Ерменија од непознати причини.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Свет
Северна Кореја гради ѕид на границата со Југот
![](https://makfax.com.mk/wp-content/uploads/2024/06/Screenshot-2024-06-21-073207.jpg)
Северна Кореја гради ѕид на неколку локации во близина на границата со Јужна Кореја, откриваат сателитски снимки анализирани од Би-би-си. Дополнително, исчистено е земјиште во Демилитаризираната зона (ДМЗ), што според експертите може да биде прекршување на долгогодишното примирје со Јужна Кореја.
ДМЗ, инаку, е тампон зона широка четири километри меѓу двете Кореи, кои технички се уште се во војна бидејќи никогаш не потпишаа мировен договор. Зоната е поделена на два дела, а секоја земја ја контролира својата страна.
Експертите ја коментираат изградбата на ѕидот за Би-би-си како „невообичаена активност“ која доаѓа во време на зголемени тензии меѓу двете земји.
„Во овој момент, можеме само да шпекулираме дека Северна Кореја сака да го зајакне своето воено присуство и утврдувања долж границата“, вели Шрејас Реди, дописник на специјализираната страница НК Њуз со седиште во Сеул.
Би-би-си нарача сателитски снимки од граничниот дел од седум километри, како дел од проектот кој ги разгледува промените што Северна Кореја ги направи во областа.
Снимката покажува најмалку три дела каде што се поставени бариери во близина на демилитаризираната зона, покривајќи вкупно еден километар од источниот крај на границата. Можно е и понатамошна изградба на бариери. Меѓутоа, поради недостигот на претходни слики со висока резолуција од областа, не се знае точно кога започнала изградбата. Сепак, такви структури нема на снимките од ноември 2023 година.
„Моја проценка е дека ова е првпат да градат бариера во однос на одвојувањето на местата едни од други“, изјави за Би-би-си, Ук Јанг, воен и одбранбен аналитичар во Институтот за политички студии Асан во Сеул.
„Во 1990-тите, Северна Кореја подигна противтенковски ѕидови за да го одврати напредувањето на тенковите во случај на војна. Но, неодамна Северна Кореја подигнува ѕидови високи два до три метри“, рече Јанг.
„Обликот на ѕидовите сугерира дека тие не се само бариери за тенковите, туку се наменети да ја поделат областа“, додаде Јанг, кој ги прегледал сателитските снимки. Најновите сателитски снимки на источниот крај на границата покажуваат нешто што изгледа како новосоздаден пристапен пат.
Официјален началник на здружениот генералштаб на Јужна Кореја во неодамнешно интервју изјави дека војската идентификувала тековни активности поврзани со „зајакнување на тактичките патишта, поставување мини и расчистување на пустош“.
„Расчистувањето на копното може да биде наменето и за воени и за невоени аспекти“, рече Кил Џо Бан, професор по меѓународна безбедност на Универзитетот во Кореја.
Свет
(Видео) Нетанјаху објави снимка во која ги критикува САД; Белата куќа: Длабоко сме разочарани
![](https://makfax.com.mk/wp-content/uploads/2024/06/netanjahu.jpg)
Белата Куќа изрази длабоко разочарување поради критиките на израелскиот премиер Бенјамин Нетанјаху кон САД, во услови на тензии меѓу двата сојузници околу војната на Израел во Газа.
Одговорот на Белата куќа дојде по состанокот меѓу советникот за национална безбедност Џејк Саливан и двајца од главните соработници на Нетанјаху на разговори за конфликтот во Газа.
Give us the tools and we'll finish the job. pic.twitter.com/eQHpyd9q0X
— Benjamin Netanyahu – בנימין נתניהו (@netanyahu) June 18, 2024
Во вторникот, Нетанјаху објави видео на англиски јазик во кое раскажува разговор со шефот на американската дипломатија, Ентони Блинкен, кој, според израелскиот премиер, му дал збор дека администрацијата на претседателот Бајден работи на отстранување на ограничувањата на испорака на оружје за Израел. Но, највисокиот американски дипломат одби да го потврди ова.
Продолжувајќи да ја истакнува содржината на неговиот разговор со Блинкен, Нетанјаху додаде дека го нарекол незамисливо одбивањето на испораките на оружје и муниција за Израел во последните месеци.
Портпаролот за национална безбедност на Белата куќа Џон Кирби се осврна на овие коментари на брифинг со новинарите, велејќи дека САД го изразиле своето незадоволство од Израел.
„Мислам дека многу јасно и недвосмислено им го пренесовме на нашите израелски колеги нашето длабоко разочарување од изјавите дадени во тоа видео, како и нашата загриженост за точноста на изјавите“, рече Кирби.
„Наводите дека сме престанале да му помагаме на Израел во однос на нивните одбранбени потреби се целосно лажни“, рече тој.
Свет
САД: Изјавите на Путин за испраќање оружје во Северна Кореја се многу загрижувачки
![](https://makfax.com.mk/wp-content/uploads/2024/06/Putin-kim.jpg)
Изјавите на рускиот претседател Владимир Путин дека Москва би можела да и испорача оружје на Северна Кореја по потпишувањето на одбранбениот пакт со Пјонгјанг се многу загрижувачки, изјави Метју Милер, портпарол на американскиот Стејт департмент.
По посетата на Северна Кореја оваа недела, рускиот претседател посочи дека снабдувањето на земјата со оружје ќе биде одговор на западните земји да ја вооружат Украина.
Тој исто така предупреди дека Јужна Кореја, инаку американски сојузник, ќе направи голема грешка доколку одлучи да испрати оружје во Украина. Во тој случај, реакцијата на Москва би била „многу болна“ за Сеул, додаде Путин.
„Таквите зборови се многу загрижувачки“, рече Милер на брифинг со новинарите на прашањето за изјавите на Путин за можна испорака на оружје за Северна Кореја.
„Ова, се разбира, ќе го дестабилизира Корејскиот полуостров и, во зависност од видот на оружјето, ќе ги прекрши и резолуциите на Советот за безбедност на ОН, кои беа поддржани и од Русија“, рече тој.
Пактот потпишан во средата од Владимир Путин и севернокорејскиот лидер Ким Џонг-ун ги обврзува двете страни да обезбедат итна воена помош во случај на вооружена агресија врз една од нив.
Портпаролот на Белата куќа за национална безбедност Џон Кирби рече дека споменатиот пакт, иако загрижувачки, не е изненадување. Тој ја смета потребата на Русија за такво партнерство како показател за очај.
„Ние веќе неколку месеци зборуваме за ова и предупредуваме за зголемената одбранбена соработка меѓу двете земји, преку низа разузнавачки податоци што ги објавивме“, рече тој.