Македонија
Двете кучиња се изолирани и ставени под надзор на ветеринар по трагедијата во Пинтија
Агенцијата за храна и ветеринарство (АХВ) изразува длабоко жалење за трагичниот настан во кој вчера, по напад од куче, почина осумгодишно дете од скопската населба Пинтија.
АХВ е во комуникација со надлежните од Министерството за внатрешни работи (МВР), а надлежен официјален ветеринар го испитува случајот и ќе врши процена на околностите под кои се случил инцидентот по што ќе бидат преземени сите мерки во согласност со законските овластувања и надлежности на Агенцијата.
„Лично како човек и како директор на АХВ изразувам најдлабоко жалење за трагедијата во кој згасна млад човечки живот. Од направениот увид утврдено е дека во немилиот настан учествувале две кучиња, кои имаат сопственик. Кучињата се уредно идентификувани со микрочип и тие сега се изолирани и ставени под надзор на официјален ветеринар. Дворот во кој се чуваат кучињата е соодветно заграден и на влезот е поставен предупредувачки знак ‘Пази куче’“, вели директорот на АХВ, Николче Бабовски.
Со контролата се испитува и дали сопственикот на кучињата ги почитувал одредбите од законите за ветеринарно здравство, за идентификација и регистрација на животните и за здравствената заштита и благосостојба, односно дали се почитувани условите пропишани во актуелната годишна наредба за здравствена заштита на животните, условите за држење на кучињата од страна на сопственикот итн. Во согласност со законот, надлежниот инспектор – официјален ветеринар, дава налог кучињата да се стават под официјален надзор за болеста беснило (набљудување – опсервација) од страна на доктор по ветеринарна медицина 15 дена, со 3 клинички прегледи, објаснува Бабовски, а по завршување на опсервацијата, докторот по ветеринарна медицина издава сертификат за надзор на беснило, со кој се потврдува здравствениот статус на животните во однос на болеста беснило.
„По завршување на надзорот на беснило, ќе се спроведе тест за социјализација на кучињата од страна на лица што имаат овластување од Агенцијата за храна и ветеринарство. Потоа ќе се утврдуваат мерките во зависност од констатираната фактичка состојба“, додава тој.
Во согласност со одредбите на Законот за заштита и благосостојбата на животните, во поглед на држење опасни кучиња, сопственикот или одговорното лице за опасно куче треба да обезбеди услови за држење на животното соодветно за расата, потребите и карактеристичното однесување, при што вклучително треба кучето да го чува во заграден простор или врзано и при движење кучето да го врзе на поводник и да му стави заштитна маска. Опасните кучиња при движење треба да бидат придружувани од полнолетно лице.
Сопствениците на кучиња треба на влезната врата во дворот на видливо место да постават табла со која недвосмислено се укажува на присуство на куче, без разлика дали кучето или кучињата, чиј е сопственик се, се опасни или не. За сите понатамошни дејства што ќе произлезат по основ на овој случај во согласност со надлежностите АХВ навремено ќе информира.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Бујар Османи му ја предаде функцијата на Муцунски – евроинтеграциите, партнерството со САД и инвестициите ќе бидат во фокус
Во Министерството за надворешни работи беше извршено примопредавање на функцијата – Министер за надворешни работи меѓу новоименуваниот министер Тимчо Муцунски и досегашниот министер Бујар Османи.
Османи упати честитки до Муцунски за новата должност, посакувајќи му успех во реализацијата на активностите на Министерството за надворешни работи и надворешна трговија.
Муцунски порача дека во периодот што следи акцентот ќе биде ставен на забрзување на евроинтегративниот процес на земјава, стратешкото партнерство со САД, како и привлекувањето странски инвестиции, што е на линија на приоритетите на Владата.
„Во периодот што следи акцентот ќе биде ставен на забрзување на евроинтегративниот процес на земјава, стратешкото партнерство со САД, како и привлекувањето странски инвестиции, што е на линија на приоритетите на Владата. И покрај многуте предизвици, со посветена работа и решителност ќе бидат постигнати зацртаните цели во предвидената програма за работа на Владата“, истакна Муцунски на средбата.
Македонија
Левица: Имотот на новиот премиер најдобро зборува во чија корист ќе владее Владата
Премиерот Христијан Мицкоски е оттуѓен од проблемите на обичниот Македонец, кој секојдневно преживува додека неговите владари се луксузираат. Тоа го покажува имотот што го пријавил како личен во Анкетниот лист, според кој, доколку се погледне, веднаш може да се забележи дека новиот премиер, Христијан Мицкоски, е сосема друга, непозната класа од онаа на која припаѓа огромниот дел македонски граѓани – сиромашната, велат од политичката партија Левица преку соопштение.
„Премиерот Мицкоски поседува куќа во Влае, купена за 26,8 милиони денари (450 илјади евра) – имот кој го стекнал со купопродажен договор во 2014 година, кога бил професор на Машинскиот факултет во Скопје.
Пријавил и девизен влог во евра, но без инос?! А дополнително, во Анкетниот лист има пријавено и два часовника со вкупна вредност од над 60 илјади евра, како и уметничка слика, што ја купил дури 10 илјади евра.
Според ова, и не е изненадувачки што во тазе-усвоената Програма за работа на Владата за 2024 – 2028 год. нема мерки со кои ќе се заузда капиталот и ќе се оданочат луксузите во кои „се дават“ македонските богаташи додека народот не може да подмири основни трошоци за живот. Напротив, во оваа програма на новата Влада дури и се предвидува олеснување и ослободување од даноците за богатите, за што теретот за трошокот на државниот апарат повторно паѓа на рамото на работниците.
Со Програмата на новата Влада на чело со премиерот Мицкоски, извесно е дека државата нема да биде ништо повеќе од извршен одбор на владеачката класа. Нивното мнозинство во Собранието само ќе ја преточува волјата на владеачката класа во закон, со што формалноста „еднаквост пред Уставот и законите“ останува само параван зад кој се кријат реалните и огромни класни разлики и нееднаквости меѓу луѓето.
Тоа што избраните и именувани лица како функционери имаат обврска да пријават имотна состојба, која потоа Државната комисија за спречување на корупција ја публикува јавно, до некаде и ни открива кој и во чија корист, навистина, владее со нас, па дури и ни дава потврда за социјалистичката максима дека историјата е борба на две класи – богати наспроти сиромашни!
Сето ова е уште еден показател дека насушно е потребно да се воведе нов олигархиски данок на луксуз за енормно скапите т.н. луксузни добра, кои ги поседуваат и со кои се китат богатите. А токму ваков данок е предвиден во Изборната програма на Левица“, се вели во партиското соопштение.
Македонија
Општината Ѓорче Петров одбележа 103 години од смртта на револуционерот
Општина Ѓорче Петров денеска пред споменикот на патронот Ѓорче Петров во реонскиот парк со пригодна свеченост и положување цвеќе од страна на бројни делегации, одбележа 103 години од неговата смрт.
Ѓорче Петров беше убиен во 1921 година во Софија. Општината со гордост го носи името на револуционерот и идеолог Ѓорче Петров кој поставил здрави темели на кои денеска се потпира Македонецот.
-Петров останува пример за сите нас како се сака и чува својата татковина, Република Македонија. Неговата посветеност кон македонското револуционерно дело, работа, дејност и истрајност е историја за која веќе еден век генерациите учат како е правилно – соопштија од Општина Ѓорче Петров.
Ѓорче Петров, се додава во соопштението од Општината, неизмерно ја сакал Македонија и во своите дела ја опишувал како една од најубавите земји.
-И од тие дела сме учеле сите, а учат и новите млади генерации. Да живее споменот за Ѓорче Петров – подвлекуваат во соопштението од оваа локална самоуправа.