Свет
Тајван купува 400 противбродски ракети „харпун“ од САД за да ја одврати кинеската инвазија
САД ќе му обезбедат на Тајван 400 мобилни противбродски ракети „харпун“, кои се лансираат од копно, во вредност од 1,17 милијарда долари за да може да одврати потенцијална кинеска инвазија од море, пренесува „Блумберг“ цитирајќи го претседателот на Американско-тајванскиот деловен совет, Руперт Хемонд-Чејмберс, и други познавачи на ситуацијата.
На 7 април американската морнарица му додели на „Боинг“ договор за снабдување со 400 ракети „харпун“ и соодветна опрема за поддршка за неименуван примач со речиси 630 милиони долари резервирани за воена продажба во странство, според американското Министерство за одбрана.
Со договорот ќе се комплетира продажбата тешка 2,37 милијарди долари на 100 системи за крајбрежна одбрана „харпун“ (HCDS), 400 проектили „харпун блок 2“ и 25 радарски камиони, кој беше одобрен од американскиот Стејт департмент во октомври 2020 година.
Во март 2022 година морнарицата го додели договорот за 100-те фрлачи и 25 радари, но не и за ракетите.
На американското Министерство за одбрана му беа потребни речиси две и пол години да додели договор за производство и испорака на ракетите „харпун“ за Тајван, а вкупниот износ на заостанатото оружје за Тајван е речиси 19 милијарди долари.
Претходно во април, американските медиуми објавија дека американскиот секретар за одбрана, Лојд Остин, разгледува повеќе од 80 внатрешни препораки од тимот на Пентагон задолжен да го забрза процесот на продажба на странска војска, а една од основните причини за реформите е заостанатото оружје за Тајван.
Иако Вашингтон одамна одржува политика на стратешка двосмисленост кон Тајван – намерно оставајќи го нејасно дали ќе го брани Тајпеј во случај на напад – претседателот Џо Бајден во повеќе пригоди изјави дека американските сили, всушност, ќе му помогнат на Тајван.
Претставници на неговата администрација, од друга страна, се дистанцираа од некои од тие коментари инсистирајќи дека американската политика сепак не е променета.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Дрвја и кал во БиХ, местата зафатени од поплавите се непрепознатливи
По поплавите што вчера ја зафатија БиХ, најтешка е состојбата во општина Јабланица, каде што најголем број урнати згради и објекти се под вода, а истото е и во Трусина и Бутуровиќ Поље, јави телевизијата БХТ1.
Новинарка на телевизијата, која известува од терен, изјави дека овие места се непрепознатливи.
-Можеме да видиме само дрвја и вода, кал, се’ лебди на површината на водата, можеме да видиме загрижени жители, изјави таа и додаде дека веќе се започнати хуманитарни акции за помош на загрозените.
Според последните неофицијални податоци само на територијата на Јабланица како исчезнати се водат 48 лица, додека официјалните податоци велат дека по поројните поплави и свлечиштата кај Јабланица, Кониќ, Крешево и Кисељак, потврдена е смртта на 19 лица, а дека по многу други уште се трага.
Населението во погодените подрачја има потреба од итна помош, а најитни се конзервираната храна и вода во шишиња.
Патната комуникација е отежната, а на места и целосно прекината.
Во страшните поплави кои зафатија делови од Босна и Херцеговина, една од жртвите е и 29-годишна трудница од Јабланица. Брачна двојка е пронајдена гушната во одроните во Доња Јабланица, а според првичните информации почина и уште еден брачен пар од овој крај.
Регион
Страшни детали од поплавите во Босна и Херцеговина, загина трудница, а брачен пар се најдени гушнати
Во страшните поплави кои зафатија делови од Босна и Херцеговина, една од жртвите е и 29-годишна трудница од Јабланица. Брачна двојка е пронајдена гушната во одроните во Доња Јабланица, а според првичните информации почина и уште еден брачен пар од овој крај. Најмалку 21 лице го загуби животот во поплавите во БиХ, од кои 16 се сметаат за исчезнати.
„Најмалку 16 лица од областа на северна Херцеговина во моментов се водат како исчезнати, откако беше потврдено дека исто толку луѓе загинале само на подрачјето на Јабланица“, изјави премиерот на Федерацијата на БиХ, Нермин Никшиќ.
Затрупани се многу куќи, а утринава пристигна и дополнителна механизација.
Во тек е состанок на кризниот штаб за координација на спасувачките активности, а по него треба да се дознаат подетални информации за состојбата на теренот.
Најтешка е состојбата во Долна Јабланица каде се сомнева дека каменолом ја предизвикал трагедијата во населбата која е целосно затрупана со отпад од гранит.с
Свет
Се повеќе мали деца се дебели, предупредува ФАО
Организацијата за храна и земјоделство на Обединетите нации (ФАО) предупреди дека прекумерната тежина кај деца под пет години, анемијата кај жените на возраст од 15 до 49 години и дебелината кај возрасните се во пораст во голем број земји.
Западен Балкан со 10,3 отсто и Кавказскиот регион со 9,1 отсто имаат највисока стапка на прекумерна тежина кај децата до пет години, додека стапката на дебелина кај возрасните исто така се зголемува.
Вредностите на анемијата кај жените на возраст од 15 до 49 години ја надминуваат глобалната проценка од 29,9 отсто во Киргистан со 35,8 отсто, Таџикистан 35,2 отсто и Азербејџан 35,1 отсто.
За да се справат со овие предизвици, сите актери во Европа и Централна Азија треба да се фокусираат на квалитетот на исхраната, осигурувајќи дека сите граѓани имаат пристап до разновидна и урамнотежена исхрана.
Никој не треба да се остави зад себе. Ова мора да биде поддржано со едукативни и кампањи за подигање на јавната свест кои поттикнуваат поздрав и поодржлив избор на храна, се додава во соопштението.