Свет
ОН: Нема интерес за сериозни преговори меѓу завојуваните страни во Судан
![](https://makfax.com.mk/wp-content/uploads/2023/04/Судан.jpg)
Нема знаци дека завојуваните страни во Судан се подготвени сериозно да преговараат за ставање крај на борбите, изјави претставникот на ОН во земјата за време на нестабилниот 72-часовен прекин на огнот во текот на кој беа пријавени вооружени судири на стратешки локации во Картум и на други места, пренесува „Ал џезира“.
На вчерашниот состанокот на Советот за безбедност на ОН во Њујорк, претставникот на ОН во Судан, Волкер Пертес, изјави дека двете страни во конфликтот веруваат оти може да освојуваат победа.
„Сè уште нема недвосмислен знак дека едните и другите се подготвени сериозно да преговараат, што сугерира дека и двете страни мислат оти е можно да се извојува воена победа над другиот. Тоа е погрешна процена“, смета Пертес.
Тој се вклучил на состанокот преку видеолинк од Порт Судан, во источниот дел на земјата, каде што ОН и други организации преместија дел од својот персонал.
Коментирајќи го привременото и нестабилно примирје меѓу Вооружените сили на Судан (САФ) и паравоените Сили за брза поддршка (РСФ), кое стапи во сила во вторникот, Пертес рече дека иако засега тоа се одржува во некои делови, борбите во клучните области продолжиле.
Пертес исто така го осуди непочитувањето на законите и нормите на војната од страна на борците што го претворија Картум во воена зона оставајќи зад себе стотици мртви, илјадници ранети и уништена цивилна инфраструктура, вклучително и болници.
„Двете завојувани страни не ги почитуваат законите и нормите на војната напаѓајќи ги густо населените области без грижа за цивилите, болниците, па дури и за возилата за транспорт на ранетите и болните. Борбите создаваат хуманитарна катастрофа, а цивилите го носат најголемиот товар“, рече претставникот на ОН.
Станбените области во Картум се претворени во боишта, на кои нападите со огнено оружје и тенкови, воздушните напади и артилериското гранатирање убиле најмалку 459 луѓе, а повеќе од 4.000 се ранети.
Во прекин се струјата и водата, а има и ограничена дистрибуција на храна во земјата, во која една третина од 46 милиони жители се зависни од помошта во храна.
ОН планираат да основаат центар во Порт Судан за да продолжат да работат во земјата во која, дури и пред избувнувањето на конфликтот, речиси 16 милиони луѓе имаа потреба од хуманитарна помош.
Генералниот секретар на ОН, Антонио Гутереш, ги опиша насилството и хаосот во Судан како трагични.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Регион
Експлозија во Загреб, разбојници разнеле банкомат
![](https://makfax.com.mk/wp-content/uploads/2024/07/hgfh-1.jpg)
Непознати разбојници разнеле банкомат во загрепски Бузин. Полицијата го блокирала патот.
– Утрово поминував покрај бензинската пумпа и видов дежурна полиција во близина на банкоматот. Некој го разнел во текот на ноќта – изјавил за 24сата.хр жител на Загреб.
Станува збор за банкомат кој се наоѓа во непосредна близина на бензинската пумпа на аголот на авенијата Вечеслава Хољевац и улицата Бани.
Полицијата веднаш излегла на терен со четири возила.
Отпадоци имало насекаде, а засега нема информации колку пари успеале да украдат.
Свет
Орбан му одговори на Мишел: Кога станува збор за односите со Русија и Украина, Унгарија дејствува во свое име, а не во име на ЕУ
![](https://makfax.com.mk/wp-content/uploads/2024/02/677z381_677z381_677z381_677z381_677z381_677z381_677z381_orban-prag.jpg)
Унгарија разбира дека со организацијата на преговорите меѓу Русија и Украина ќе се занимаваат големите земји, но би сакала да ги охрабри страните во конфликтот да склучат мир, изјави унгарскиот премиер Виктор Орбан во радио програмата „Кошут“.
„Будимпешта знае каде припаѓа и кое е нејзиното значење, како и дека големите сили ќе се занимаваат со големи преговори“, посочи Орбан.
Истовремено, тој повтори дека Унгарија би сакала да ги охрабри страните да започнат преговори. Премиерот објасни дека токму таква цел имал на ум кога го посетил Киев на 2 јули, по 12 години, каде што се сретнал со украинскиот претседател Володимир Зеленски.
„Уште еднаш, морам да прецизирам дека унгарското претседавање со Советот на Европската унија не дава мандат за преговори во име на ЕУ, туку Будимпешта настапува во свое име. Она што можеме да го направиме е да разјасниме која страна на што е подготвена, а откако ќе дознаеме, лидерите на ЕУ веќе можат да донесат одлука, а по одлуката ќе може да се започнат преговори, што, за жал, се чини дека е далеку е засега“, нагласи Орбан.
Запрашан кои ќе бидат неговите следни чекори по неговата посета на Киев на 2 јули, Орбан рече: „Бидејќи овие чекори се од многу чувствителна природа, ќе може да се зборува за нив дури откако ќе се спроведат“.
Претходно, шефот на Европскиот совет во заминување, Шарл Мишел, на мрежата Х напиша дека ротирачкото унгарско претседателство со Советот на ЕУ нема мандат да контактира со Русија во име на Европската унија, коментирајќи ги мировните иницијативи на унгарскиот премиер, Виктор Орбан и информации за неговата можна посета на Москва.
Претходно, прес-секретарот на рускиот лидер Дмитриј Песков, коментирајќи ги медиумските написи за евентуална посета на Орбан на Русија, одби да ја потврди или негира оваа претпоставка, пренесува Спутник.
Регион
Група туристи од Црна Гора заглавени на аеродромот во Сицилија: Се активира вулканот Етна, издадено црвено ниво на предупредување
![](https://makfax.com.mk/wp-content/uploads/2024/07/gfgd.jpg)
Група туристи од Црна Гора не се вратија од Сицилија како што беше планирано, бидејќи летовите беа прекинати во четвртокот поради активирање на еден од најголемите кратери на вулканот Етна.
Граѓанин на Црна Гора, кој бил на краток одмор на Сицилија, се пријавил на подгоричкиот портал ЦдМ и пријавил дека спиеле на аеродром и чекаат информација кога повторно ќе бидат возможни летовите. За новиот лет, рече тој, ќе треба да купат нови билети.
Според него, Рајнер нема летови до недела, а Визер утре има лет за Тирана.
Италијанската цивилна заштита објави црвено ниво на предупредување и предалармна оперативна фаза за вулканот поради ерупцијата на Етна, пишува Палермо Република, пренесува порталот Подгорица.