Македонија
Македонскиот дипломатски синдикат го поздрави отповикувањето на амбасадорот Тодоровски од Прага
Македонскиот дипломатски синдикат го поздравува потегот на претседателот Стево Пендаровски и министерот за надворешни работи, Бујар Османи, за предвремено отповикување на амбасадорот Тодоровски од Прага.
Од тука велат дека отповикувањето е задоцнето и донесено со големи калкулации имајќи го предвид неговото политичко и непрофесионално дејствување како претседател на синдикална организација, како и фактот дека именуваниот и претходно е предвремено отповикан за слични нерегуларности.
„Добро што најпосле свеста за нужноста од прочистувањето на македонската дипломатија почнува да резултира со конкретна акција. Акцијата требаше да биде изведена многу потранспарентно и објавена изворно и навремено, а не изнудено со повеќемесечно задоцнување, дури откога е направен изборот на кандидат за нов амбасадор при веќе постоен амбасадор во Прага, кој е само на половина од својот мандат“, велат од Македонскиот дипломатски синдикат.
Имајќи ги предвид причините за отповикувањето, велат од Синдикатот, ќе констатираме дека непочитувањето на Виенската дипломатска конвенција претставува сериозен проблем за секоја дипломатска служба и дека со такви ситуации Министерството треба да се справува брзо и ефикасно, без никакви калкулации.
Го охрабруваат министерот Османи со иста енергија и со ист аршин, како што велат, да продолжи да се справува со секаква недисциплина, неодговорност, малверзации, неспособност и недостигот на исполнителност и на други наши амбасадори за кои има сознанија за вакви и посериозни прекршувања.
„Министерот Османи и неговиот претходник Димитров немаа желба да соработуваат со Македонскиот дипломатски синдикат, уште помалку да ги слушнат нашите сугестии во однос на лошата кадровска политика во највисокиот ешалон на дипломатијата. Поради тоа, порачуваме дека како Синдикат ќе вложиме голем напор со следниот министер за надворешни работи да воспоставиме силна двонасочна соработка, која ќе биде заснована, пред сè, на професионални стандарди и нема да имаме толеранција за неквалитет, индолентност или неспособност на нашите најважни дипломатски претставници во светот, амбасадори“, додаваат од Синдикатот.
Минатата недела Османи рече дека амбасадорот Сашо Тодоровски бил вратен од Прага поради низа утврдени неправилности.
Како причина за отповикувањето беа наведени нерегуларности во функционирањето, лажно претставување на сопругата како културен аташе во Прага, а не биле почитувани ниту инструкциите од страна на МНР.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Без струја делови од Гази Баба и Карпош
Регионалниот центар за управување со кризи на Град Скопје, по добиеното известување од ЕВН, соопшти дека поради планирани зафати во електро дистрибутивната мрежа денеска, без напојување со електрична енергија ќе останат:
од 08:30 до 13:00 часот, корисниците од дел од ул. Финска, поточно подулиците со бр. 15 и бр. 20 во нас. Инџиково. (Општината Гази Баба)
од 09:00 до 13:00 часот, корисниците од дел од ул. Нерешка во нас. Жданец. (Општината Карпош)
Македонија
Променливо облачно со слаб до умерен ветер од јужен правец, попладне со повремени локални врнежи од дожд
Времето денеска ќе биде променливо облачно со слаб до умерен ветер од јужен правец, поизразен долж Повардарието.
Попладне и кон крајот на денот ќе има повремени локални врнежи од дожд, наместа поројни, проследени со појава на грмежи. Минималната температураќе биде во интервал од 8 до 14, а максималната ќе достигне од 18 до 24 степени.
Во Скопје времето ќе биде променливо облачно со слаб до умерен ветер од јужен правец. Попладне и кон крајот на денот во делови од котлината ќе има повремен пороен дожд и појава на ретки грмежи. Минималната температура ќе се спушти до 13, а максималната ќе достигне до 23 степени.
И во петок ќе се задржи променливо облачно време со врнежи од дожд, кои наместа ќе бидат пообилни и поројни, проследени со појава на грмежи. Во деновите од викендот времето ќе биде сончево со мала до умерена облачност и со услови за слаб локален дожд во планинските региони. Дневната температура ќе биде во постепен пораст.
Македонија
Лога по одлуката за „Балансерот“: Северна Македонија се лизга по пат кој е докажано фатален за неа
Според поранешниот министер за прaвда и потпретседател на Алијанса за Албанците, Кренар Лога, сите иницијативи што се однесуваат на прашањата за праведно и соодветно застапување, употребата на албанскиот јазик и другите етнички прашања во корист на немакедонските заедници ќе имаат иста судбина како прашањето за изводите од матична книга на родени, односно поништувањето на уредбата на министерот за правда и укинување на соодветните членови од законот.
Треба да се истакне, напоменува Лога, дека гласањето пред една година беше чисто етничко и мајоризирачко; такво беше и денес (6 македонски гласови наспроти 3 албански и турски).
„Своеремено, македонската политичка елита го користеше Собранието на Македонија за да ги мајоризира Албанците. Сега, откако тоа им е оневозможено во Собранието, тие ја префрлија оваа практика во Уставниот суд.
Додека во Уставниот суд не постои двојно гласање за законите со Бадентер, односно механизам за заштита на другите етнички заедници, ароганцијата на македонската политичка елита ќе се појави повторно, исто како во 1991 или 1997 година.
За жал, Северна Македонија се лизга по пат кој е докажано фатален за неа. Денес, нашата држава ги дели патиштата: или ќе оди кон Европа, или кон „Српски свет“; или ќе остане Северна Македонија и европска, или македонската олигархијата ќе направи дел од неа да стане „Јужна Бановина“, вели Лога.