Свет
Американски ветерани со закани спречени да присуствуваат на парадата во Москва
Американската влада застрашувала неколку американски ветерани од Втората светска војна, кои сакале да отпатуваат во Москва на парадата на Денот на победата, изјави во понеделникот рускиот амбасадор во Вашингтон, Анатолиј Антонов, пренесува ТАСС.
Според Антонов, американските власти втора година по ред ги блокираат соништата на американските ветерани да се обединат со своите руски соборци, а дури им се заканиле и со одземање на пасошите ако отпатуваат во Русија.
„Сакаме американските војници да знаат дека Русија е горда на нивниот придонес во заедничката победа. Непријателската политика на САД нема да го поткопа духот на соборците за време на големата патриотска војна. Сметаме дека е наша должност да ја браниме вистината за овие херои“, истакна амбасадорот.
Антонов исто така укажа на зголемената русофобија во САД, која, според него, била поттикната и охрабрувана од Вашингтон. Тој ги обвини и американските медиуми дека целосно ја игнорираат годишнината од нацистичкиот пораз за да избегнат да му дадат каква било заслуга на СССР.
„Се прават дрски обиди да се фалсификуваат фактите за Втората светска војна, се игнорира одлучувачкиот придонес на Црвената армија за поразот на фашизмот, а Советскиот Сојуз е исклучен од листата на победници. Во исто време, незаслужено се пропагира улогата на САД и на Обединетото Кралство“, рече амбасадорот.
Антонов го нарече срам и исмејување на историјата и на здравиот разум фактот дека во Европа го слават украинскиот претседател Володимир Зеленски, дури и кога владата во Киев ги велича нацистичките соработници, како Степан Бандера и неговото движење.
„Ги повикуваме американските власти да се премислат и да престанат да им угодуваат на нацистите“, истакна Антонов. „Мора да бидеме искрени со паднатите херои. Престанете да ја искривоколчувате историјата. Поттикнувањето на неонацизмот и русофобијата е неприфатливо“.
Рускиот амбасадор исто така посочи дека непознати вандали во текот на викендот искршиле православни надгробни споменици на гробиштата „Рок Крик“ во Вашингтон.
Според локалниот руски парохиски свештеник, напаѓачите ја осквернавиле и капелата обезличувајќи ги иконите на свети Јован Шангајски и на свети Франциско.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Најмалку 14 загинати во Јабланица, објавена првата официјална информација за жртвите од поплавите во БиХ
Дарко Јукан, раководител на Секторот за односи со јавноста, потврди дека во Јабланица загинале најмалку 14 лица.
Тој објави дека се пронајдени 14 тела и дека има многу жртви, а најкритична е состојбата во областа Долна Јабланица, на патот од Мостар кон Сараево, по обилните врнежи во текот на ноќта, што предизвика одрони и свлечишта на југот на Босна и Херцеговина.
Јабланица сè уште е целосно отсечена од остатокот на БиХ. Министерот за одбрана на БиХ, Зукан Хелез, претходно изјави дека има неофицијални информации за најмалку 20 жртви во Јабланица.
Тој изјави дека се ангажирани припадници на вооружените сили на Босна и Херцеговина, полицијата и меѓународните сили, кои се на обука и дека има проблеми со прекин на комуникациите.
„Ќе побараме помош од меѓународната заедница и од другите земји“, додаде тој за „Ал џезира“.
Вооружените сили на Босна и Херцеговина ќе бидат ангажирани со полн капацитет да му помогнат на населението во поплавените подрачја, изјави министерот Хелез за „Аваз“.
„Трудницата, чие дете ѝ почина во утробата, е евакуирана од подрачјата погодени од поплавите на југот на Босна и Херцеговина и е оперирана во Мостар“, изјави Ламија Дурановиќ, директор на кантоналната болница „Д-р Сафет Муиќ“, за Радио Слободна Европа.
Свет
Руската амбасада предупредува: Америка го отвора патот за нуклеарен конфликт
Со охрабрување на Украина да ја таргетира Русија со американско оружје, САД го отвораат патот за нуклеарен конфликт, изјави рускиот амбасадор во Вашингтон, Анатолиј Антонов.
„Принуден сум уште еднаш да ве потсетам за можната одлука на Соединетите Американски Држави да ги поттикнат Украинците да користат американски системи со долг дострел за гаѓање длабоко во руска територија. Ова е сериозен чекор не само кон ескалација туку и кон патот што администрацијата го трасира за нуклеарен конфликт“, изјави Антонов за „Прв канал“.
Тој посочи дека мора да се направи сè за да се избегне нуклеарен конфликт бидејќи во таков конфликт нема да има победници.
„За ваквата одлука одговорни се центрите за одлучување, кои исто така се наоѓаат тука“, заклучи дипломатот.
Медиумите потсетуваат дека рускиот претседател Владимир Путин претходно предупреди дека Русија го задржува правото да користи нуклеарно оружје во случај на агресија врз неа, меѓу другото, ако непријателот користи конвенционално оружје – ако тоа претставува закана за виталните интереси на државата.
Регион
Исчезна пат поради порои во Босна и Херцеговина, пруга виси во воздух
Во близина на изворот Комадино, недалеку од Јабланица во Босна и Херцеговина, патот е целосно исчезнат поради пороите и одроните што го зафатија теренот. На фотографијата може да се види и како железничката пруга виси во воздухот бидејќи водата ја однела почвата под неа.
Малку претходно Планинарската служба за спасување (ГСС) Јабланица ги повика жителите да се обратат за помош и пожарникарите со заеднички сили се обидат да ги спасат загрозените од поплавите предизвикани од обилните врнежи во текот на ноќта. Потврдено е дека Јабланица е целосно блокирана.
„Полицијата нè извести дека е блокирана и пругата. Во моментот не можете да влезете или да излезете од Јабланица. Фиксните телефони работат, но мобилните немаат сигнал“, велат од ГСС.
Поради големите поплави и одрони, загрозено е голем дел од населението, а според достапните информации, има голем број повредени и исчезнати лица.