На денешната собраниска седница, каде се дискутираше за предлог-измените на Законот за работни односи, лидерот на Левица се појави со маица со натпис „Ќе висите заедно.”

Во своето собраниско обраќање, Апасиев порача дека со овие законски измени предлагачите се обидуваат „да воведат нормално ропство под европско знаменце, со афрички стандарди“.

Според Апасиев, сега имаме ситуација во која законот ги поробува работниците, наместо да ги ослободува, за што, како што предупреди претседателот на Левица, следува кривична одговорност.

„Сакате да воведете корпоративна репресија во Републикава, односно да нѐ вратете два века назад во доменот на трудовото право. Првиот сегмент е злоупотребата на европското знаменце, односно нема потпис од министри. Вие министерке Тренчевска, иако не сте правник, добро Ве поучиле да не ставите потпис на оваа лажна изјава и да го насанкате заменик-министерот да заглави како „Миле ми текна” по судови. Ова е типична лажна изјава. Следно, лажните ЕУ регулативи, кои ги наведувате, се едни сликовници кои имаат само мапа на коридори, што е водич на трансевропска транспортна мрежа и толку. Нема ништо од трудово право во неа за да се се повикувате на неа и да го чепкате Законот за работни односи, кој кај нас е lex generalis, односно се применува на сите вработени, без оглед дали се вработени во приватен или јавен сектор. Тоа го призна и Маричиќ, меѓутоа на Маричиќ не му е тешко да признае, затоа што не стои негов потпис“, рече Апасиев.

Додаде дека власта упорно сака да нѐ направи колонија на американскиот империјализам, фаворизирајќи еден конзорциум којшто ќе ги исцица државните ресурси, но ќе ја исцица и потта на работниците.

Имено, вели Апасиев, во самата Европска унија, со Директивата број 88/2003 се вели „просечно работно време за секој седумдневен период, вклучувајќи го и прекувременото работење, не смее да надминува 48 часа неделно”, а власта се обудува да воведе 12 часовно работно време, шест дена во неделата. Според Апасиев, тоа значи дека, луѓето кои ќе работат, ќе бидат физички исцедени и тие ќе немаат време да ги обноват физичките капацитети за да продолжат нормално да живеат.

Kaко пример на држави во кои работното време е над 50 часа неделно, лидерот на Левица ги наведе Мавританија, Египет, Гамбија и Буркина Фасо.