Македонија
(Видео) Имаме огромен потенцијал за вработување на младите, им кажа Ковачевски на американските студенти

Промоција на демократските вредности, различните култури и потенцијали на Северна Македонија, размена на искуства и можност за заеднички проекти беше темата на која денеска претседателот на Владата, Димитар Ковачевски дискутираше со магистранти и докторанти на универзитетите Харвард и Масачусетс Институтот за технологија во САД.
Посетата на студентите е поддржана од земјите на Отворен Балкан, во рамките на таканаречената студиска посета „Балкан Трек“, а освен државава, тие ги посетуваат и Србија и Албанија во периодот од 18 до 26 мај.
На средбата, премиерот Ковачевски потенцираше дека нашата држава, како и регионот има огромни потенцијали за можности за вработување посебно за младите, во меѓувреме нудејќи можности за инклузивен, транспарентен развој и вработување врз основа на квалитет и знаење со што се стимулираат и директните инвестиции.
Република Северна Македонија, како што истакна премиерот, се докажа како кредибилен партнер на ЕУ и НАТО, придонесувајќи кон зајакнување на регионалната соработка и градењето на светскиот мир.
Како земја членка на НАТО, потенцираше премиерот, Северна Македонија е посветена на регионална соработка, а заштитата на сигурноста и стабилноста на Западен Балкан за нашата држава е приоритет.
Говорејќи за евроинтеграцискиот процес на земјава, премиерот Ковачевски оцени дека иницијативите, како Отворен Балкан, имаат огромен потенцијал во подобрување на економската состојба на Западен Балкан и дека очекува посилна регионална соработка како гарант за мирот и стабилноста во Западен Балкан.
При тоа, тој нагласи дека за Северна Македонија, духот на добрососедството и зајакнатата регионална соработка се еден од столбовите на надворешната политика, која почива на принципите на дијалог и компромиси.
Студентите, на средбата се интересираа за економскиот раст на Северна Македонија, како и борбата со дезинформациите и евроинтеграцискиот процес.
Во рамките на „Балкан Трек“, студентите кои доаѓаат од 17 земји, се среќаваат со највисоки државни претставници на институциите во земјите од Отворен Балкан, а имаат и средби со млади лидери, истовремено запознавајќи се со туристичката, културна и гастрономска промоција на земјите.
Патувањето на студентите е поддржано од иницијативата Отворен Балкан. Исто така, во рамки на посетата, посебен акцент се става на младите од Северна Македонија и во тој контекст се организира вмрежување меѓу 50-те најперспективни млади од Северна Македонија и студентите од Харвард и Масачусетс Институтот за технологија.
На средбата присуствуваа и заменик претседателот на Владата задолжен за европски прашања, Бојан Маричиќ, како и советничката за дигитализација, Маја Ангеловска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За три дена, 109 повредени од Кочани доставиле барања и предлози на телефонската линија на Владата

109 граѓани за три дена од пуштање на телефонската линија за повредените лица и нивните семејства, која е во директна комуникација со Канцеларијата на Ппретседателот на Владата, ја искористиле можноста и доставиле свои барања и предлози, соопштија од Владата.
Од таму велат дека тоа покажува дека оваа телефонска линија дава резултат и дека Владата е отворена за секаква сугестија и идеја.
„Како Влада преку низа на мерки помагаме за помош на повредените и нивните семејства. Ова е заедничка борба и нема да отстапиме од неа, бидејќи секој граѓанин има право на соодветна здравствена заштита и медицинска нега, токму поради тоа како Влада донесовме одлука за рехабилитација во Пониква на повредените лица кои се во стабилна здравствена состојба, но им е потребна дополнителна медицинска услуга. Тим на лекари од 10 јуни до 20 август во рехабилитацискиот центар Пониква на сите лица ќе им пружат дополнителна медицинска грижа, но и психолошка поддршка“, велат од Владата.
Од таму ги повикуваат и ги охрабруваат сите повредени лица кои се засегнати да се јават на телефонскиот број 070/355-526 и да ги изразат своите барања и потреби.
Македонија
Сончево време, попладне локален дожд

Времето денеска ќе биде сончево со мала до умерена облачност. Попладне ќе има услови за локален развој на нестабилна облачност со пороен дожд и грмежи. Ќе дува слаб ветер од променлив правец. Минималната температура ќе биде во интервал од 12 до 20, а максималната ќе достигне од 26 до 35 степени.
Во Скопје, сончево со мала до умерена облачност. Ќе дува слаб ветер од северен правец. Минималната температура ќе се спушти до 17, а максималната ќе достигне до 34 степени.
Од денеска следува период на стабилно и сончево време со мала до умерена локална облачност. Дневните температури ќе бидат без значителни промени.
Македонија
Мурал од балкански рис исцртан на фасадата на Театар Комедија

Со мурал од балкански рис и мала прослава, Македонското еколошко друштво вчера го прослави Светскиот ден на рисот.
„Конечно најдовме дом за муралот, најдовме и артист кој го нацрта, и најдовме човек кој има визија и кој е отворен за соработка, а тоа е директорот на Театар Комедија – Дарко Спасов. Целта ни е со овој мурал да ја подигнеме јавната свест, не само на рурално туку и на урбано ниво. Кога работите ќе згуснат ни треба секаква поддршка, од секоја популација“, изјави раководителот на Програмата за закрепнување на балканскиот рис, Диме Меловски.
Тој се заблагодари на поддршката од Театар Комедија и директорот Дарко Спасов.
„Велат исти птици во исто јато летаат“, вели директорот Спасов, кој го изрази своето задоволство од соработката со Македонското еколошко друштво.
Освен муралот на фасадата на Театар Комедија, пред објектот поставена е и инфо табла со основните податоци за рисот, како и QR код кој води до новата интернет страница посветена на балканскиот рис: balkanlynx.com.
По поздравните обраќања, присутните членови и соработници на МЕД, се упатија кон Бистро Комедија каде што во неформална атмосфера имаа прилика да поразговараат за досегашните постигнувања, но и да разменат идеи и предлози за идни активности.