Свет
На 109 роденден најстарата жена во Ирска ги сподели своите тајни за уживање во животот
Најстарата жена од Ирска го одбележа својот 109-ти роденден споделувајќи два совети како да уживате во долг живот: не губете време и живејте го во целост, објави „Гардијан“.
Мејрин Хјуз го следи сопствениот совет со гледање птици, читање весници и романи, решавање крстозбори, слушање музика, свирење Скрабл – и уживајќи во вревата на секој нов роденден. „Едноставно сакам да живеам“, им рече таа на новинарите во понеделникот.
Хјуз е родена на 22 мај 1914 година, два месеци пред избувнувањето на Првата светска војна, и се сеќава на нејзината мајка како се грижела за луѓето за време на пандемијата на грип во 1918 година.
Таа прослави 109 годни со пријателите со качување во стар автобус за обиколка на паркот Феникс во Даблин, со попладневен чај, пред да се врати во својот дом за стари лица во блискиот Чапелизод.
На прашањето на „Irish Times“ за тајната на долгиот живот, таа одговори: „Живеј го животот во целост. Мислам дека е важно да не губиме време“.
Хјуз е родена во Белфаст, израснала во Даблин и Киларни, округот Кери. Таа се сеќава на Блек и Танс – озлогласена британска воена сила во англо-ирската војна – и раѓањето на независна ирска држава во 1921 година.
Хјуз студирала наука на Универзитетскиот колеџ Корк што е необичен избор за жените во тоа време. Дипломирала во 1935 година.
Работела како хемичар во медицинската лабораторија на универзитетот и во 50-тите се преселила со нејзиниот сопруг во Даблин, каде што работела како наставник. Двојката немала деца.
Таа се присети дека видела како нејзиниот дом за стари лица е изграден пред 50 години, кога била со нејзината мајка.
Полициски бенд и госпел хор се приклучија на прославата. Облечена во блејзер и розова марама, Хјуз ги слушаше сограѓаните и вработените како ја пеат нејзината омилена песна, традиционалната ирска балада.
Имаше задоволство во едноставните работи, рече таа. „Ми се допаѓа тишината и птиците што ги имаме овде. Тие се прекрасни околу реката“.
Најстарата позната личност на светот е Марија Брањас Морера, која живее во Шпанија. Таа има 116 години.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
(Видео) Нереални снимки од Босна и Херцеговина, местото се претвори во река, отсечено е од светот
По обилните дождови во Босна и Херцеговина, многу градови беа погодени од поплави, одрони и свлечишта, меѓу кои и Бутуровиќ Поле.
Досега во поплавите во Босна и Херцеговина загинаа 18 лица.
Според достапните информации, ова место е практично отсечено од останатиот дел од земјата и светот.
Снимките со дрон, снимени од Ален Беглук, го откриваат целиот размер на катастрофата што го погоди Бутуровиќ Поле.
Регион
(Видео) Спасувачка операција во БиХ по поплавите: трудница во тешка состојба, 10-годишно момче со тешки скршеници со хеликоптер е префрлено во Мостар
Доктор Ламија Дурановиќ, директор на кантоналната болница „Д-р Сафет Мујиќ“ во Мостар, потврди дека во првиот бран на евакуација од Јабланица помош им била укажана на четири лица, од кои две биле пренесени со хеликоптер.
-Се работи за трудница во осмиот месец од бременоста, која беше евакуирана од екипите на Планинарската спасувачка служба, а која за жал го загуби бебето. За жал моментално е во животна опасност. Не можам да дадам прогнози, бидејќи се работи со повеќекратни повреди опасни по живот – изјави Дурановиќ за Avaz.ba.
Со неа, додаде таа е донесен и нејзиниот сопруг, а неговиот живот не е во опасност.
-Потоа со хеликоптер е пренесено 10-годишно момче, кое има скршеници и во моментов не е ни во животна опасност, како и маж, кој засега е стабилен – изјавила таа.
Таа нагласи дека целосно се ослободени сите капацитети на оваа болница за потребите на прием и згрижување на повредените жители на Јабланица.
– Вработените нема да ги напуштат работните места до дополнително известување, а сите што беа ослободени ги повлековме од дежурство – рече таа.
Засега немаат информации од терен колку евентуално повредени може да очекуваат во наредните часови.
– Целосно сме подготвени и во контакт сме и со нашите колеги во СКБ Мостар – изјави Дурановиќ.
Инаку транспортот и евакуацијата на повредените од Јабланица се одвива во исклучително тешки услови.
Според досегашните информации, припадници на ГСС на носилки ги носат повредените до изворот Комадино, а потоа со помош на чамци се транспортираат до мостот Бегиќ и Беговиќ.
Инаку според медиумите во регионот најмалку 14 лица загинале во поплавите и свлечиштата што ја погодија населбата Јабланица на југот на Босна и Херцеговина.
Јабланица сè уште е целосно отсечена од остатокот на БиХ. Министерот за одбрана на БиХ, Зукан Хелез, претходно изјави дека има неофицијални информации за најмалку 20 жртви во Јабланица.
Регион
Најмалку 14 загинати во Јабланица, објавена првата официјална информација за жртвите од поплавите во БиХ
Дарко Јукан, раководител на Секторот за односи со јавноста, потврди дека во Јабланица загинале најмалку 14 лица.
Тој објави дека се пронајдени 14 тела и дека има многу жртви, а најкритична е состојбата во областа Долна Јабланица, на патот од Мостар кон Сараево, по обилните врнежи во текот на ноќта, што предизвика одрони и свлечишта на југот на Босна и Херцеговина.
Јабланица сè уште е целосно отсечена од остатокот на БиХ. Министерот за одбрана на БиХ, Зукан Хелез, претходно изјави дека има неофицијални информации за најмалку 20 жртви во Јабланица.
Тој изјави дека се ангажирани припадници на вооружените сили на Босна и Херцеговина, полицијата и меѓународните сили, кои се на обука и дека има проблеми со прекин на комуникациите.
„Ќе побараме помош од меѓународната заедница и од другите земји“, додаде тој за „Ал џезира“.
Вооружените сили на Босна и Херцеговина ќе бидат ангажирани со полн капацитет да му помогнат на населението во поплавените подрачја, изјави министерот Хелез за „Аваз“.
„Трудницата, чие дете ѝ почина во утробата, е евакуирана од подрачјата погодени од поплавите на југот на Босна и Херцеговина и е оперирана во Мостар“, изјави Ламија Дурановиќ, директор на кантоналната болница „Д-р Сафет Муиќ“, за Радио Слободна Европа.