Македонија
Османи-Гервала-Шварц: Дијалогот предводен од ЕУ придонесува за регионалната стабилност
Билатералните перспективи, улогата на Мисијата на ОБСЕ во Косово и дијалогот предводен од ЕУ беа централните теми на кои разговараа Претседавачот со ОБСЕ и министер за надворешни Бујар Османи и министерката за надворешни работи, Доника Гервала-Шварц за време на нивната денешна средба во Приштина.
Османи истакна дека Северна Македонија и Косово имаат одлични билатерални односи, чиј континуитет треба да се надгради, потенцирајќи дека инвестицијата во добрососедство, особено во нашиот регион, е влог во иднината.
„Ја искористивме оваа можност дополнително да ги разгледаме нашите билатерални перспективи и да разговараме за улогата на Мисијата на ОБСЕ во Косово. Ќе продолжиме да го поттикнуваме позитивниот политички дијалог и позитивната клима“, рече Османи.
За време на средбата, Османи и Гервала-Шварц се осврнаа и на надворешно-политичките приоритети и се согласија дека побрзата интеграција во ЕУ значи и подобар изглед за регионалната стабилност и просперитет.
Во фокусот на разговорите беше и дијалогот посредуван од ЕУ, кој ОБСЕ силно го поддржува.
„Драго ни е што бевме домаќин на важната средба во Охрид што дополнително го отвори патот за нормализирање на односите. Силно го поддржуваме овој процес, кој не само што ги штити интересите на сите заедници, туку и придонесува за севкупна регионална стабилност“, истакна Османи.
Во текот на средбата Претседавачот со ОБСЕ Османи истакна дека заштитата и унапредувањето на правата на сите заедници се клучни за зајакнувањето на меѓуетничките односи. Тој ја искористи можноста да ги поздрави позитивните достигнувања кои Мисијата на ОБСЕ во Косово ги реализира, посебно во областа на човековите права, демократизацијата и јавната безбедност.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: Правилото победник со победник е прекршено, Владата ја формира мнозинството во парламентот
Жалам што сеуште раководството на ДУИ живее во некои времиња кој се минато во Македонија. Македонија е држава на сите граѓани во нејзе, ниту е федерација, ниту е би, три, четири национална држава. Македонија според Уставот е држава на сите граѓани, според демократијата оној кој има 61 пратеник ја формира идната влада во Македонија или ја формира владата, изјави претседателот на ВМРО-ДПМНЕ Христијан Мицкоски одговарајќи на новинарско прашање.
„Јас не знам како тие пресметале дека се претставници на мнозинското не македонско население во Македонија. Мислам дека сите ние сме граѓани на Македонија, Македонци и ценам дека политиката не треба да се гледа како условно кажано шведска маса, па ДУИ малце ќе земе сега од СДСМ, малку од ВМРО, малку од некоја друга политичка партија“, истакна Мицкоски.
Како што додаде, ДУИ беше шест и половина години со СДСМ во владата, а СДСМ се поразени во првиот круг претседателски избори и очекува да бидат поразени и после парламентарните избори.
„Очекувам ДУИ да биде опозиција за неколку недели од денес“, истакна Мицкоски.
Тој повторно нагласи дека демократијата се темели на принцип врз основа на тоа кој има мнозинството во парламентот ја прави Владата.
„Демократијата се темели на принципот кој има мнозинство во парламентот и ја прави владата, не знам за кој мајски договор зборува ДУИ, не знам за кое правило победник со победник. Имаше едно правило во минатото победник со победник кој е резултат од минатото, тој договор и тоа правило за жал самите тие го прекршија уште во 2017 година и повторно би потсетил дека политиката не треба да ја гледаме како шведска маса па малку со едните, другите, третите. Доколку ВМРО-ДПМНЕ освои мнозинство како што се очекува немаме ниту елементарна доверба да соработуваме со ДУИ, така што тие мора да одат во опозиција“, дециден е Мицкоски.
Македонија
Крмов: Покачување на пензиите, намалување на годините за пензионирање – 60 години за жени, 62 за мажи
На денешниот протест на пензионерите во Штип, даде поддршка и Носителот на ИЕ3, пратеникот Борислав Крмов.
Крмов првенствено ја посочи незавидната ситуација во која се наоѓаат македонските пензионери.
,,Имаме тука ситуација да таа додатна помош од социјалата којашто ја добиваат, сега, всушност, им е скратена. Власта се фали дека наводно им помогнала.
Пензионерите јасно и гласно кажаа: значи, покачување линеарно на сите од 3500 денари до 5000 денари! Минимална пензија од 18.000, дури и 20.000 денари. Они живеат со 12.000 ден. И сега на тие 12.000 земале по 2000 – 3000 ден. од социјалата како допуна, како помош и сега тоа е скратено на пола! Замислете, тие пензионери со тие примања немаат ни за храна! Нив, нивните деца им плаќаат сметки и храна, за да преживеат.
Јас и како пратеник во ИЕ3 имав апсолутна поддршка за пензионерите за сите нивни барања”.
Левица во својата програма има мерки за подобрување на квалитетот на живот на пензионерите.
,,Според Програмата на Левица, минималната пензија е две – третини од просечната плата; државни пензионерски домови за пензионерите и намалување на годините за пензионирање 60 години – за жени и 62 години – за мажи”, потенцираше пратеникот Крмов.
Македонија
Костадиновска-Стојчевска: Џезот е дел од македонската музичка традиција, џезерите се наша гордост
Министерката за култура, Бисера Костадиновска-Стојчевска го честита Светскиот ден на џезот, со почит и благодарност кон основоположниците на овој жанр, на сегашната генерација џезери и на сите љубители на џез-музиката.
„Џезот е составен дел од нашата музичка традиција, а нашите музичари се гордост по која сме препознаени и кои со својот креативен израз ја афирмираат нашата земја на регионалната и светската сцена“, истакнува Костадиновска-Стојчевска.
Таа додава дека наша заедничка цел е да ги зачуваме талентираните џез-музичари дома, да им овозможиме траен и одржлив ангажман, да им создадеме услови за нивна промоција и за негување на џез-културата низ целата држава.
„Затоа, чест ми е што со наша искрена поддршка, џез-музичарите, со своето активно дејствување и уметничка страст, се изборија за основање на Национален џез-оркестар“, вели министерката за култура, потенцирајќи дека бројната публика на нивните концерти, но и на традиционалната прослава по повод Светскиот ден на џезот, потврдува дека македонската култура е интегрален дел од интернационалното џез-семејство, кое ја слави моќта на слободниот израз, различностите, отвореноста и мултикултурализмот.