Регион
Новиот бугарски министер за одбрана најави воена помош за Украина
Бугарскиот парламент во вторникот ја одобри новата влада предводена од Николај Денков, а функцијата министер за одбрана ја презеде воениот експерт Тодор Тагарев, кој го водеше Министерството за одбрана во март-мај 2013 година, пренесува БТА.
Тагарев во своето обраќање ја објави својата намера да обезбеди воена помош за Украина. Во говорот по парламентарното гласање тој рече дека неговото министерство има намера да продолжи со напорите за зајакнување на одбранбената способност на земјата.
Дефинирајќи ги главните цели на својата идна работа како министер за одбрана, Тагарев рече дека Бугарија и нејзината армија мора да придонесат за осигурување безбедност и стабилност во регионот на Црното Море и Југоисточна Европа.
„Втората точка е придонесот на нашата армија за безбедноста на Црното Море… Ќе имаме безбедност кога последниот окупатор ќе ја напушти границата на Украина и кога ќе се блокираат агресивните намери на Кремљ. Само на тој начин може да се гарантираат нашиот регион и нашата иднина“, рече Тагарев.
„Мора да го направиме она што е потребно и да ги зајакнеме нашите одбранбени способности и да ѝ дадеме помош на Украина за да може да ја продолжи контраофанзивата, која очигледно почна, и да ги ослободи своите територии“, додаде тој.
Тагарев рече дека помошта нема да ѝ наштети на одбранбената способност на Бугарија.
Бугарија е една од ретките членки на Европската Унија што не обезбеди воена помош за Украина по инвазијата од страна на Русија во февруари 2022 година.
Бугарските пратеници гласаа за испраќање оружје во ноември, но претходната влада никогаш официјално не продолжи со испраќање помош. Сепак, повеќе медиумски извештаи укажаа дека Бугарија испратила оружје во Украина преку трети земји.
Русија почна специјална воена операција во Украина на 24 февруари 2022 година како одговор на повиците на народните републики Донецк и Луганск за заштита од украинските трупи.
Руското Министерство за одбрана соопшти дека операцијата, чија цел е украинската воена инфраструктура, има цел да ја демилитаризира и денацифицира Украина и целосно да го ослободи Донбас.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Додик: Според демократските принципи, резолуцијата за Сребреница пропадна
Претседателот на Република Српска Милорад Додик изјави дека, што се однесува до демократскиот свет и она што нè учат, резолуцијата за Сребреница денеска не доби мнозинство во Генералното собрание на ОН и таа пропадна.
„На гласањето видовме дека за резолуцијата гласаа 84 земји, што не е ниту огромно мнозинство“, нагласи Додик.
Повтори дека Владата на Република Српска го покренала прашањето за мирно одвојување од Федерацијата Босна и Херцеговина, бидејќи, како што истакна, нема причина после ова да останат и да живеат заедно во Босна и Херцеговина.
Регион
Вучиќ: Резолуцијата ќе донесе поделби не само во нашиот регион туку и во ОН
Српскиот претседател Александар Вучиќ на Генералното собрание на ОН во Њујорк изјави дека усвоената резолуција за Сребреница ќе предизвика поделби не само во регионот, туку и во Обединетите нации.
„Никогаш не се случило во Генералното собрание на ОН гласањето за прашањето за геноцидот да не се изгласа едногласно, ова се случува за прв пат затоа што некои луѓе сакаа да ја искористат својата голема политичка моќ и да ја политизираат оваа важна тема и тоа го направија. не е важно колку долго предупредувавме дека целиот процес треба да биде транспарентен и инклузивен, но тие не не послушаа“, рече Вучиќ.
Тој посочи дека за резолуцијата гласале 84 земји, додека останатите присутни не гласале за резолуцијата и дека таков чин нема да успее во ниту еден национален парламент.
„Ова е единственото место во светот каде што е усвоен ваков документ. Луѓето од некои земји ја истакнаа важноста на амандманот како нивен значаен придонес, но тоа беше само значаен придонес за поголема конфузија. Тие го направија тоа само за да го спасат образот“, рече Вучиќ.
Регион
Генералното собрание на ОН ја усвои Резолуцијата за геноцидот во Сребреница
Генералното собрание на Обединетите нации денеска одржа седница на која се расправаше за резолуцијата за геноцидот во Сребреница, која беше усвоена со 84 гласа „за“.
Од друга страна, 19 земји гласаа против, а 68 земји беа воздржани.
Најважните делови од резолуцијата се содржани во седум точки.
Генералното собрание донесе одлука да го прогласи 11 јули за Меѓународен ден на сеќавање и комеморација на геноцидот во Сребреница во 1995 година.
Безрезервно го осудува секое негирање на геноцидот во Сребреница и ги повикува земјите-членки да ги зачуваат утврдените факти, вклучително и преку образовните системи преку развивање соодветни програми, исто така со цел да се запамети, да се спречи негирање и искривување на геноцидот.
Иницијативата за усвојување на Резолуцијата за Сребреница ја покренаа Босна и Херцеговина, Германија и Руанда. Во меѓувреме, како резултат на значителна дипломатска активност, на земјите им се приклучија Албанија, Австрија, Бангладеш, Белгија, Босна и Херцеговина, Бугарија, Канада, Чиле, Хрватска, Данска, Естонија, Финска, Франција, Германија, Ирска, Италија, Јордан, Лихтенштајн, Литванија, Луксембург, Малезија, Холандија, Нов Зеланд, Северна Македонија, Полска, Руанда, Словенија, Шведска, Турција, Велика Британија и Соединетите Американски Држави.