Свет
Патрушев: САД сакаат да ја ослабат Русија, но крајна цел им е Кина
Украинското раководство беше подготвено да го разреши конфликтот со Русија, но се откажа под притисокот на САД, изјави денеска секретарот на Советот за безбедност на Русија, Николај Патрушев, пренесува ТАСС.
„Да не беше притисокот на САД врз оние што ги поставија на чело на Украина, оваа ситуација немаше да се случи. Дури и самите украински лидери беа подготвени за потпишување мировен договор и ѝ дадоа на Русија писмени предлози, што ние, во принцип, ги одобривме“, рече Патрушев алудирајќи на преговорите меѓу руската и украинската делегација во Турција во март минатата година.
„Утрото ни дадоа писмени предлози (за решение на кризата) за вечерта да ни кажат: не, ги отфрламе. А тоа беше само затоа што САД ги притиснаа и им рекоа да не водат никакви преговори со нас“, додава тој.
Како што истакна Патрушев, „во овој конфликт има заинтересирани страни“, пред сè, САД и Велика Британија.
„Украинскиот народ не е заинтересиран за продолжување на конфликтот. Ни рускиот народ не е заинтересиран за тоа. Но, поради некоја причина конфликтот почна и поради некоја причина сè уште трае. Јас ќе ви кажам која земја е првенствено заинтересирана за тоа – САД, а и Англија“, заклучи Патрушев истакнувајќи дека овие земји не ги жалат луѓето што гинат во Украина.
Патрушев исто така предупреди дека иако САД сакаат да ја ослабат Русија, нивната крајна цел е Кина.
„Се разбира, САД се заинтересирани светот да не стане мултиполарен. Многу сериозен фактор во мултиполарниот свет е Кина и затоа крајната цел не е Русија. Тие сакаат да ја уништат или да ја ослабат Русија, но нивната крајна цел е, всушност, Кина. САД мислат дека ќе успеат да доминираат во светот, но таа можност не постои. Нема да успеат во тоа“, истакна Патрушев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Бројот на бегалци во Германија годинава достигна нов врв
Бројот на бегалци кои живеат во Германија годинава достигна нов врв, покажуваат денешните владини податоци, пренесува Дојче веле.
Околу 3,48 милиони бегалци со различни видови дозволи за престој живееле во Германија на крајот на јуни 2024 година, што е за приближно 60.000 повеќе отколку на крајот на 2023 година.
Една третина од овие бегалци дошле од Украина.
Бројката вклучува и некои поединци кои се обврзани да ја напуштат Германија, но остануваат во земјата под политика на толеранција која опфаќа низа ситуации, како што се болест, недостаток на документи за идентификација или луѓе чии деца имаат дозвола за престој.
Статистиката беше дадена како одговор на барањето на партијата Социјалистичка левица во парламентот и првпат беше објавена од Ној Оснабрикер Цајтунг.
Свет
Лавров: Русија не сака ескалација, но западните политичари се однесуваат како деца
Рускиот министер за надворешни работи Сергеј Лавров денеска изјави дека Русија не сака да ги ескалира тензиите со западните земји, но дека, како што наведе, „политичарите на овие земји се однесуваат како деца“.
„Не сакаме ескалација. Се чини дека западните политичари навистина имаат менталитет на дете, иако како возрасни заземаат одговорни позиции: министри, премиери, канцелари, претседатели“, рече Лавров.
Лавров нагласи дека неколку месеци во светот се разговара за тоа како Русија наводно само се заканува и зборува за „црвени линии“.
Свет
Израелска армија: Убиени околу десет високи команданти на Хезболах
Портпаролот на израелската армија, контраадмирал Даниел Хагари, изјави дека заедно со Ибрахим Акил, во денешниот израелски воздушен напад врз јужен Бејрут биле убиени околу десет високи команданти на либански Хезболах.
Хагари на прес-конференција рече дека Акил и другите членови на елитната единица Радван на Хезболах се собрале во подрумот на една зграда кога биле мета и убиени.
Весникот „Тајмс оф Израел“ наведува дека Хагари рекол дека тоа биле „командантите кои го подготвиле и го воделе планот на терористичката организација Хезболах за напад на северната територија на државата Израел.
Портпаролот на израелската војска тврди дека како дел од таа инвазија, Хезболах планирал упад на израелска територија сличен на нападот на Хамас од Газа на јужна израелска територија на 7 октомври минатата година. Тогаш започна војната меѓу Израел и таа палестинска исламистичка организација.
Во меѓувреме, израелскиот министер за одбрана Јоав Галант на платформата X објави дека ќе продолжи „секвенцата на акции во новата фаза“ од конфликтот со Хезболах додека не се постигне целта за безбедно враќање на Израелците раселени поради прекуграничниот конфликт во нивните домови.