Македонија
Кој е убиениот македонски државјанин во Приштина: Два идентитета, криминално досие, ИСИС

Лице со два идентитети, имал македонско државјанство и криминално досие во Македонија. Ова се неколкуте познати и потврдени информации за лицето убиено во Косово, Блерим Даци, кој имал и втор идентитет Блерим Шабани. Неофицијално, станува збор и за повратник од терористичката организација Исламска држава (ИСИС). Живеел во Македонија, против него имало постапка од скопското Обвинителство, а добил и притвор.
Убиениот им е познат на македонските правосудни органи. Скопското Обвинителство во 2022 година побарало притвор бидејќи кај него било пронајдено оружје, кое нелегално го поседувал. Поради ова, бил побаран притвор од Кривичен суд, но судиите одредиле куќен притвор.
Обвинителот се жалел, а мерката била преиначена. Блерим Даци требало да биде спроведен во затворот „Скопје“ во Шутка. Но кога полицијата отишла да го приведе и спроведе – тој веќе бил во бегство. Оттогаш, му се губи секаква трага. Неговото убиство им откри на македонските институции дека тој бил засолнет во Косово.
Дел од медиумите објавија дека Даци се поврзува со двојното убиство во „Шиша бар“. Ова се неофицијални информации, кои ниту една институција во Македонија не ги коментира бидејќи случајот е во фаза на истрага и споделувањето на информации може да ја компромитира постапката.
Единствената сличност помеѓу убиството во Приштина и убиството во „Шиша бар“ е дел од начинот на кој е извршено. И во двата има ликвидација, по која, има запалени автомобили. Во Скопје, по убиството, автомобил беше запален во Радишани. Слично било и во Приштина.
„На еден километар од местото на настанот е пронајдено запалено возило со германски таблички, за кое постои сомневање дека со него осомничените побегнале од местото на настанот“, наведува косовската полиција.
Во возилото во Скопје, не беше пронајден никаков траг од оружје со кое беа убиени Јетон Кривањева (Жила) и Енис Исени (Љаци). Во Приштина, во запаленото возило, имало два „калашникови“. Се верува дека со нив бил убиен Даци.
Македонските институции се во комуникација со косовските. Засега нема многу официјални информации за настанот, а ниту приведени лица.
„Нашите институции комуницираа со косовските власти и го потврдија тој податок кој беше објавен за наш граѓанин кој беше застрелан во Косово, но повеќе детали ќе ви обезбедат останатите институции. Ние како МНР го направивме првиот контакт и ја потврдивме веста“, рече Османи.
Синоќа околу 20 часот, косовските медиуми пренесоа дека во Приштина е убиен државјанин на Македонија, додавајќи дека осомничените сè уште не се идентификувани.
Според косовската полиција, на околу еден километар од местото на инцидентот, пронајден е опожарен автомобил со германски регистарски таблички, со кој се сомнева дека осомничените избегале од местото.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) ВМРО-ДПМНЕ ги објави имињата на уште осум кандидати за градоначалници

Извршниот комитет на ВМРО-ДПМНЕ, вечерва во Штип определи уште осум кандидати за градоначалници за претстојните локални избори.
ВМРО-ДПМНЕ донесе одлука да му предложи на Централниот комитет.
1. Македонски Брод – Жарко Ристески.
2. Могила – Драганчо Саботковски
3. Пробиштип – Тони Тоневски
4.Богданци – Марјан Пеев
5. Демир Капија – Наталија Димитриева
6. Росоман – Ѓорги Крстевски
7. Новаци – Стевче Стевановски
8. Дебарца – Златко Силјановски
Пратеникот Антонијо Милошоски по состанокот изјави дека овие 8 кандидати за градоначалници се одговорни, исполнителни личности кои што својата активност ја докажале не само во рамките на коалицијата на ВМРО-ДПМНЕ туку имаат углед и во самите општини. Ним ќе им биде препорачано во следниот период, да си отворат што поголема комуникација со локалните граѓани во општините за да може да поработат директно на терен за составување на програмата која што е потребна за локални избори.
Централниот штаб ќе биде на располагање заедно со еден тим кој што ќе биде формиран за локалните избори, да им помогне за одредени проекти, кој што се од поголемо капитално значење за Македонски брод, Могила, Новаци, Пробиштип, Богданци, Демир Капија, Росоман и Дебарца.
„Цениме дека со овие 8 вечерва објавени кандидати за градоначалници и претходните 25, ВМРО-ДПМНЕ со самодоверба чекори кон локалните избори бидејќи сме единствената партија која што во моментов има обзнането имиња на 33 кандидати за градоначалници за кои што сметаме дека се на добар пат и да ја добијат довербата на граѓаните“, рече Милошоски.
За оние кои што се актуелни градоначалници, партијата смета дека дека со досегашната работа, ќе имаат добар кредит да ја добијат и понатамошната доверба.
Македонија
СДСМ: Јавното обвинителство се обиде да ја релативизира одговорноста на актуелните функционери

Според СДСМ, со денешната прес-конференција, Јавното обвинителство уште еднаш потврдило дека постои сериозен обид да се минимизира и релативизира одговорноста на носителите на актуелни функции и институции поврзани со трагедијата во Кочани.
Од опозициската партија велат дека наместо да се лоцира институционалната одговорност и да се повикаат на одговорност директорите на Државниот пазарен инспекторат, УЈП и други релевантни органи кои имаа обврска да постапуваат, фокусот се префрла на индивидуални случаи и на маргинални групи, избегнувајќи ја суштината – зошто и како фирма увезувала и со месеци продавала опасна пиротехника без дозвола, и кој тоа го дозволил.
Дополнително, како што се додава, наместо да се отворат посебни истраги за секој аспект од случајот – за незаконскиот увоз, за институционалниот надзор, за реакцијата на полицијата и за конкретните пропусти на диското, Обвинителството сѐ спакува во еден предмет, со што ризикува да се развлекува постапката со години, па дури и децении. Со ваков пристап, правдата станува недостижна – а тоа е неприфатливо.
„Сериозно прашање е и одлуката приведените полицајци и полициски функционери, кои биле одговорни кобната вечер, да се пуштат на слобода со мерки за претпазливост. Особено загрижува фактот дека двајца од нив биле пресретнати на пат кон граница со Бугарија, што отвора сомнеж за можно бегство и криење на вината.
СДСМ уште еднаш потенцира – без целосна и непристрасна истрага, без одговорност за институциите и носителите на функции кои затаиле, нема да има вистинска правда за жртвите и нивните семејства.
Граѓаните гледаат. И со право очекуваат правда“, се додава во партиското соопштение.
Македонија
(Видео) Во Гази Баба се гради огромна дива депонија без никакви дозволи, објави Арсовска

Во општина Гази Баба, фирма затекната од инспекторат на град Скопје при вршење нелегални активности, правење огромна дива депонија со градежен и опасен отпад и бесправна експлоатација на земјиште, без лиценци, елаборати, дозволи и одобренија, што претставува сериозна опасност по здравјето на граѓаните и животната средина, објави градоначалничката на Град Скопје, Данела Арсовска.
„Апелираме до Министерството за внатрешни работи да постапи, бидејќи неказнивоста и непостапувањето предизвикува сторителите на вакви дела да мислат дека се недопирливи пред законот. Фирмата која прави дива депонија и каде се експлоатира, го има поткопано 110kV кабловски и воздушен далновод кој го напојува со електрична енергија градот Скопје. На ова земјиште сопственост на Република Македонија се прави сериозна штета на главниот далновод, известени се сите надлежни институции за кои очекуваме да не се кријат и да постапуваат“, вели Арсовска.