Македонија
МТСП: Индексот на Родовата Еднаквост носи напредок во РСМ во однос на прашањето за родовата еднаквост
Министерката за труд и социјална политика Јованка Тренчевска заедно со директорот на Државен завод за статистика на Република Северна Македонија, Апостол Симовски, Амбасадорката на Шведска во Република Северна Македонија, Н.Е. Ами Ларсон Јаин, Раководителот на односи со јавност на Европскиот институт за родова еднаквост, Денис ван дер Веур и Националната координаторка на програмата за Родово одговорно буџетирање на UN Woman во Република Северна Македонија, Ивона Паунович Бишевац со нивните поздравни обраќања го отворија настанот каде беше промовиран Индексот на Родова Еднаквост во Северна Македонија (2022). Настанот е во организација на Министерството за труд и социјална политика со поддршката на канцеларијата на UN Woman во Скопје во рамките на проектот на UN Women „Промовирање на родово одговорни политики и буџети: кон транспарентно, инклузивно и отчетно управување во Република Северна Македонија“, финансиран од Швајцарија и Шведска.
„Денеска го претставуваме вториот национален извештај за родов индекс за 2022 година. На ваков начин ја создаваме можноста уште еднаш да се потврдат заложбите и посветеноста на Република Северна Македонија во унапредување на родовата еднаквост и еднаквите можности“ рече Тренчевска.
Таа посочи дека индексот ќе послужи како патоказ и место каде се наоѓаат сите податоци кои ќе придонесат во унапредување на остварувањето на родовата еднаквост.
„Родовата перспектива во последната деценија станува приоритетна област во сите сфери на општеството. И токму затоа, проектите од типот на овој – на кој блиску соработуваме со UN Women, се исклучително важни за подигнување на свеста за важноста на родовата еднаквост и за градење на мрежа и поврзување на институциите кои треба да ја имплементираат и спроведуваат оваа родова перспектива во своето секојдневно работење“ истакна директорот на државниот завод за статистика на РСМ, Апостол Симоновски.
Амбасадорката на Шведска во Република Северна Македонија, Н.Е. Ами Ларсон Јаин истакна дека родовата еднаквост не само што е важна за поединците, но исто така е важна и за економијата и просперитетот на една земја како целина. Таа посочи дека важно е да се признае дека родовата еднаквост не се однесува само на правата на жените туку дека станува збор за создавање општество кое е подобро за сите – за жените, за мажите и за нашите деца и млади.
„Шведска е горд партнер во развојот на родовата еднаквост во Северна Македонија. Горди сме што ги споделуваме нашите вредности и приоритети со институциите и партнерските организации во оваа земја и што го докажуваме напредокот и постигнатиот успех и ги поддржуваме многуте посветени и вешти актери во општините, регионите и на национално ниво каде што останува да се работи“ рече амбасадорката на Шведска Н.Е. Ами Ларсон Јаин.
Раководителот на односи за јавност на Европскиот институт за родова еднаквост, Денис ван дер Веур го истакна задоволството од учеството и поддршката на Република Северна Македонија при изработката на Индексот за родова еднаквост. Тој посочи дека Европскиот институт за родова еднаквост е особено горд што може да ги сподели методите и алатките за подобрување на прашањето за родовата еднаквост во земјите од Западен Балкан.
Националната координаторка на програмата за Родово одговорно буџетирање на UN Woman во Република Северна Македонија, Ивона Паунович Бишевац се осврна на историјатот од спроведувањето на Индексот на родовата еднаквост во РСМ.
„Кога прес неколку години, точно во 2018 година за прв пат се роди иницијативата за спроведување на Индекс за Родова Еднаквост и се сретнавме со тимот на Европскиот институт за родова еднаквост во Скопје, зборувавме како со заеднички напори да направиме Северна Македонија да стане една од земјите кандидатки за членство во ЕУ која спроведува сопствен Индекс за Родова Еднаквост“ рече Паунович.
Настанот беше затворен со презентацијата на Индексот на Родовата Еднаквост од страна на експертите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сообраќајот се одвива во зимски услови, по претежно влажни коловози, на некои повисоки места со мали остатоци од кашест снег на коловозот
Сообраќајот на државните патишта се одвива во зимски услови, по претежно влажни коловози, на некои повисоки места во западните и југозападните делови од државата со мали остатоци од кашест снег на коловозот по интервенција на дежурните екипи на ЈП Македонијапат.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Мицкоски е во паника, опозицијата освои двојно повеќе гласови од власта, велат од СДСМ
„Мицкоски мора да е во голема паника штом свика прес конференција да се пофали дека опозицијата освоила повеќе гласови од владејачките партии“, велат од СДСМ.
„Дури и со сите можни злоупотреби на институциите и притисоци, кандидатите за градоначалници од опозициските партии освоија двојно повеќе гласови од кандидатите на владејачките партии.
Опозицијата освои двојно повеќе гласови, 21.394 гласови а власта само 12.534 гласа. Заклучокот е едноставен, власта на ВМРО, ВЛЕН и ЗНАМ загуби вечерва и тоа убедливо“, соопшти СДСМ.
Македонија
Почувствуван земјотрес во Прилеп и околината
Телеметриската сеизмолошка мрежа на Република Северна Македонија, на сеизмолошките станици инсталирани ширум нашата територија, одржувани од Сеизмолошката опсерваторија при Природно-математичкиот факултет во Скопје, ноќеска во 01 часот и 14 минути регистрира земјотрес чиј епицентар потекнува од соседна Република Грција, на околу 116 км југоисточно од Скопје, со Рихтерова локална магнитуда, ML2.9
Според досегашните податоци со кои располага опсерваторијата, земјотресот е почувствуван во Прилеп и околината со интензитет од III степени според Европската макросеизмичка скала.

