Македонија
Левица со „Македонски предлог – нацрт“ за решавање на кризата во Франција
Левица со загриженост ги следи настаните изминативе денови во Франција и изразува жалење за насилствата и негативните последици што ги имаат врз сигурноста и стабилноста на државата и народот.
Оттаму, ја истакнуваат потребата за мирен и демократски дијалог, каде сите страни можат да ги изразат своите ставови и да преговараат посветено за мирни решенија.
„Најостро ја осудуваме ескалацијата на состојбите и повикуваме двете страни час поскоро да најдат простор за дијалог како би се дошло до решение на кризата во овие моменти кога демократијата е цел на напади. Ја осудуваме полициската бруталност и прекумерна сила која се употребува врз народот кој го изразува своето демократско право на протест поради незадоволството од властите и третманот кон малцинствата, особено во оние реони од каде постојано стигнуваат поплаки за зголемена, систематизирана полициска бруталност врз сиромашната, работничка класа и малцинствата“, велат од Левица.
„Имено, само во изминатава година, забележани се 13 убиени лица откако биле запрени поради сообраќајни прекршоци. Долг период се истакнуваат овие поплаки за полициска бруталност и дискриминација во овие области, особено против домаќинствата со пониски приходи од работничка класа и малцинства.
Статистиките велат дека младите, на возраст од 14 години, во овие области, стереотипно се втурнуваат во технички средни училишта каде се обучуваат за физичка работа или послабо платени работни места, наместо во училишта во кои ги подготвуваат учениците за универзитет“, додаваат од Левица.
За да се постигне фер решение, Левица ја нуди својата помош како медијатор во процесот на преговори во улога на олеснувачи на процесот на помирување.
„Нудиме нацрт за предлог решение, односно т.н. „Македонски предлог“ до Франција, со цел прекин на немирите, водени од искуствата кои ги има државата Македонија:
Партиите се обврзуваат да обезбедат инклузивност во спроведувањето на овој договор преку консултации и координација со главните чинители во процесот;
Малцинските заедници Мароканци, Тунижани, Алжирци и останати народи кои се дел од колонизаторското минато на Франција, да влезат во Уставот на Франција како државотворен народ;
Јазик на кој зборуваат малцинствата од овие заедници и народи кои се дел од колонизаторското минато на Франција да се воведе на цела територија на Франција, како и во образовниот систем;
Нова територијална поделба во интерес на малцинските заедници и останати народи кои се дел од колонизаторското минато на Франција, во духот на демократијата и европските вредности;
Партиите се согласни да го стават интересот на државата на прво место и ја повторуваат нивната определба за истрајност и за почитување на демократските принципи, во интерес на сите граѓани и сите заедници во државата, согласни да преземат чекори за надминување на постојната криза.
Како партнери во градењето на заедничка иднина, силно апелираме Франција да остане на демократскиот колосек, а ние сме тука да помогнеме да го оствари тоа“, се додава во соопштението на Левица.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Филков во посета на КПУ Идризово: Состојбата во затворите е алармантна
Министерот за правда Игор Филков го посети затворот во Идризово по вчерашниот инцидент кој се случи во затвореното одделение Амбуланта каде беа повредени припадници на затворската полиција и затвореници.
Состојбата во затворите е алармантна. Ресоцијализација и рехабилитација со лоши услови во затворите не може да има, се истакнува во информацијата од неговиот кабинет, по посетата на затворот.
Во разговорот со директорот на затворот, Зоран Јовановски, министерот беше информиран за настанот како и за проблемите со кои се соочува установата, пренатрупаноста, немањето соодветни просторни услови за сместување, недостигот на медицински персонал и лица задолжени за ресоцијализација.
„По извршениот претрес во одделението Амбуланта биле пронајдени 37 метални шипки, 21 дрвена рачка, 3 кабли, 12 штрафови, 15 ножеви, 4 штрафцигери, пластичен шприц со 2 игли, ножици, парчиња од скршено стакло и 3 полначи за мобилен телефон.
При физичката пресметка предизвикана е поголема материјална штета.
Во наредниот период потребно е да се донесат конкретни мерки за подобрување на состојбите и условите во затворите“, се истакнува во соопштениетот од кабинетото на министерот за правда.
Македонија
Јотова со порака: Сакаме да бидеме добри соседи, но да го почитуваме нашето заедничко културно наследство
Бугарија не го оспорува суверенитетот и јазикот на современите држави, изјави бугарската потпретседателка Илијана Јотова.
Јотова како што пренесуваат бугарските медиуми, вели дека не спречуваат никого во самоопределувањето, но ќе ги спречат обидите да се припише историјата.
„Ние не спречуваме никого во самоопределувањето ниту во нивниот јазик, но многу ќе ги спречиме токму овие обиди да се припише историјата, на соодветни факти. Сакаме да бидеме добри соседи, но да го почитуваме нашето заедничко културно наследство, бидејќи тоа е клучот за без спорови и конфликти. Науката, истражувањето, штити од искушението да се создаде фиктивна историја, што неминовно води до политички и билатерални или мултилатерални конфликти. Во последните неколку дена, во изјавите на некои политички и владини лидери на соседните земји за жал, токму тоа можеме да го видиме“, истакнува Јотова.
Бугарскиот премер Димитар Главчев е во Брисел. Тој за бугарските медиуми изјави дека Бугарија ќе инсистира Европскиот совет да ги потврди заклучоците за Северна Македонија и да ја повика земјата да ги почитува преземените обврски за да продолжи на својот пат кон ЕУ.
На прашањето дали разговарал со грчкиот колега за некакви заеднички активности во однос на позицијата на Скопје, Главчев одговори:
„Не сум разговарал со колегата од Грција за тоа прашање, но претпоставувам дека и тој нема да остане неактивен. ”
Македонија
Мицкоски на средба со евроамбасадорот Гир: Владата ќе продолжи да работи заедно со ЕУ во духот на партнерството и заедничките вредности
Претседателот на Владата Христијан Мицкоски, денеска оствари средба со Амбасадорот на Европската Унија во Северна Македонија, Дејвид Гир.
На средбата беа разменети мислења и ставови за тековните политички и економски прашања, како и за напредокот на државата кон интеграцијата во Европската унија.
Мицкоски ја истакна важноста на поддршката од Европската унија за реформските процеси и стабилноста на земјата, констатирајќи дека Владата ќе продолжи да работи заедно со ЕУ во духот на партнерство и заеднички вредности.
Амбасадорот Гир ја потврди посветеноста на Европската унија за продолжување на одличната соработка со Северна Македонија и изрази подготвеност за поддршка во клучните реформи и проекти што се предвидени во наредниот период.
Средбата заврши со согласност за натамошно зајакнување на билатералните односи и интензивирање на соработката во различни области од заеднички интерес.