Македонија
Маричиќ со О’Брајан: Довербата и поддршката од САД ги имаме, да останеме фокусирани на стратешката цел
![](https://makfax.com.mk/wp-content/uploads/2023/07/thumbnail_OAP_8763.jpg)
Вицепремиерот задолжен за европски прашања, Бојан Маричиќ, се сретна со шефот на Одделот за координација на санкциите при Стејт департментот и именуван помошник-државен секретар за Европа и Евроазија, амбасадорот Џим О’Брајан, со кој размени мислења за актуелните процеси што ги води Македонија и за улогата на нашата држава во зачувувањето на регионалната стабилност.
Маричиќ нагласи дека досегашната несебична пријателска поддршка на Соединетите Американски Држави одиграла важна улога во зачувувањето на стабилноста и мултиетничката хармонија во македонското општество, како и во остварувањето на стратешкиот интерес – членството во НАТО. Во тој контекст Маричиќ изрази очекување дека плодната соработка меѓу двете земји ќе продолжи и во процесот на интеграција во ЕУ, како и во исполнувањето на реформската агенда.
Пораката на Џим О’Брајан, шефот на Одделот за координација на санкциите при Стејт департментот и именуван помошник-државен секретар за Европа и Евроазија, кој има одлично познавање на состојбите во Западен Балкан, беше дека Северна Македонија мора да остане непоколеблива во исполнувањето на визијата за ЕУ и е на добар пат да ја обезбеди европската перспектива, која ќе ја направи клучен фактор за регионалната стабилност и дефинирањето на новите европски граници.
Маричиќ му се заблагодари на О’Брајан што САД го препознава лидерството и што ја цени решителност и посветеноста на реформите, кои, како што рече тој, „мораме да ги продолжиме подинамично, со посебен акцент на владеењето на правото и борбата против корупцијата како главни предуслови за напредок во евроинтеграцијата“.
Соговорниците на средбата се согласија дека довербата и сојузништво што ги имаме во НАТО, заедно со стратешкото партнерство, ги унапредија односите меѓу двете земји и зајакнаа подготвеноста на американската администрација да дава силна поддршка на Северна Македонија во преговорите со ЕУ, со цел побрзо достигнување на европските вредности и исполнување на нашата стратешка цел.
Имајќи ја предвид важноста на процесот на преговори со ЕУ за просперитетот и развојот на регионот, вицепремиерот го изрази своето задоволство од вниманието што САД му го посветува на Западен Балкан, со уверување дека македонската Влада ќе ги направи сите напори да остане Северна Македонија позитивен пример и промотор на евро-атлантските вредности во регионот.
Во рамките на официјалната посета на Вашингтон, вицепремиерот Маричиќ, придружуван од државната секретарка при Секретаријатот за европски прашања, Дрита Абдиу Халили, ќе оствари средба и со американскиот специјален претставник за Западен Балкан и заменик-помошник државен секретар за Европа и Евроазија, Габриел Ескобар.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Македонија
Љутков од Велес: Фолклорот нè идентификува и нè поврзува со светот
![](https://makfax.com.mk/wp-content/uploads/2024/07/ИФФ-Велес-2024-2.jpg)
Во Младинскиот парк во Велес, вчеравечер свечено беше отворено 19. издание на Интернационалниот фолклорен фестивал „Велес 2024“.
Во присуство на многубројни гости, Фестивалот за отворен го прогласи министерот Зоран Љутков, кој изрази задоволство што низ годините овој фестивал прерасна во вистински репрезент на фолклорната традиција на народите од повеќе држави во светот, потенцирајќи дека Министерството за култура и туризам останува отворено за поддршка на сите проекти што ја афирмираат културната традиција и посебноста на сите чинители.
– Нема ништо поубаво од тоа од генерација на генерација да се пренесува сето она културно наследство што нè идентификува, што нè прави посебни и препознатливи во европскиот, но и во светскиот културен мозаик. Секоја држава, секоја култура е посебна токму поради шаренилото на културните вредности што имаме обврска да ги чуваме, да ги негуваме и да ги пренесеме на идните генерации – рече Љутков.
Преку настапите на младите уметници, како што рече министерот за култура и туризам, ќе се запознаеме со убавината на фолклорната традиција, музиката, песната и сето она што е обележје на земјите од кои доаѓаат, збогатувајќи го на тој начин културното живеење во Велес.
Честитајќи им на организаторите за посветеноста во реализацијата на Фестивалот, Љутков им посака убав престој во Македонија и во Велес на учесниците, а на посетителите незаборавни мигови со музиката и ората од земјите учеснички.
Љутков изрази уверување дека Меѓународниот фолклорен фестивал „Велес 2024“ и во иднина ќе биде настан на радост и среќа каде што ќе се создаваат спомени кои ќе останат траен запис во историјата на манифестацијата.
Македонија
Средба на претседателот Гаши со посебниот советник за Западен Балкан: Влезот на Западен Балкан во ЕУ треба да се случи што поскоро
![](https://makfax.com.mk/wp-content/uploads/2024/07/gashi-frangesh1.jpg)
Претседателот на Собранието, Африм Гаши, оствари средба со посебниот советник за Западен Балкан, Анжеј Франгеш.
Гаши изрази благодарност за заложбите на Словенија да назначи специјален претставник за Западен Балкан, со што ја потврдува својата посветеност на европската перспектива на земјите од Регионот, вклучително и нашата земја.
Словенија е искрена, пријателска земја, силен поддржувач на евроинтеграциите. Особено се ценат нејзините заложби за одржување на прашањето за проширувањето високо на агендата на Европската Унија.
Влезот на Западен Балкан во ЕУ треба да се случи што поскоро, затоа што и Балканците се Европејци и тоа е во корист не само на овие земји, туку и на самата Унија.
Во таа насока, прашањето за уставните измени како пречка за влез во големото европско семејство треба да се реши што поскоро, а реформскиот процес да продолжи. Помошта и поддршката од посебниот советник Франгеш е добредојдена како одличен познавач на Регионот.
Франгеш на претседателот Гаши му посака успешна работа во новиот мандат, истакнувајќи дека парламентарната демократија е многу важна.
Соговорниците оставија отворена врата за соработка, со почести средби и поактивна улога во наредниот период.
Македонија
Левица: Државата нема средства за младите што ја претставуваат Македонија на меѓународни научни олимпијади
![](https://makfax.com.mk/wp-content/uploads/2024/07/FB_IMG_1720076660923.jpg)
Години наназад, вклучително и оваа, средношколците кои се дел од тимовите што ја претставуваат Македонија на научни олимпијади ширум светот каде што го веат македонското знаме и од каде што донесуваат бројни признанија и медали, мака мачат да најдат средства за воопшто да стигнат на тие натпревари, велат од Левица.
„Наместо последните седмици пред натпреварувањата да ги вложат за што подобро да се подготват, тие се принудени да одат од една до друга врата, барајќи некој да им излезе во пресрет за да можат да ја претстават Македонија. Новата министерка за образование, Весна Јаневска, смета дека има недостаток во Законот за средно образование во смисла што во него не е предвидено доделување на финансиска поддршка од страна на МОН за ученици и нивни ментори за учество на меѓународни научни олимпијади, туку само доделување на стипендии доколку е освоено едно од првите три места, па најавува решението за овој проблем да се бара во корекции на Законот за средно образование во таа насока. Во меѓувреме, државата годишно ја напуштаат по 2500 високообразувани млади луѓе откако успеале да поминат низ образовниот систем во државата како по минско поле! Деценски проблем е што државата нема никаква стратегија за континуирана поддршка на талентираните ученици, уште помалку да го усмери нивниот професионален развој и да ги задржи како кадри“, додаваат од Левица.
Според Левица, проблемот е системски, длабок и од суштинско значење за иднината на државата и луѓето што живеат овде.
„Ако состојбите денес се лоши, тогаш кој ќе ги промени на подобро утре? Нашата иднина си заминува преку границите со застрашувачка брзина, а државата ниту понуди, ниту, пак, сега нуди план за надминување на таквата алармантна состојба. Проблемот бара длабоки решенија, а не површни шминкања на одделни закони! Левица ја повикува новатата министерка Јаневска да собере сила и храброст за да почне работите да ги решава од корен и систематски! Во овој момент не е потребно козметички да се надополнуваат празнините што го проголтуваат еден од најважните сектори во државата, туку напротив, потребни се итни и радикални промени во образованието“, завршуваат од Левица.