Полициски службеници од Единицата за интервентна полиција, во координација со Единицата за недозволена трговија и ЕУМНА при СВР Скопје, презедоа опсежни истражни дејствија во врска со настан од минатиот месец, кога беше пронајдена голема количина наркотични супстанци.

Според информациите од полицијата, на 2 октомври, околу 01 часот, по претходно обезбедена судска наредба, извршен е претрес на патничко моторно возило „мини“ на улицата „Ѓурчин Кокале“, при што биле пронајдени 6,2 килограми марихуана, 442 таблети екстази (МДМА), пиштол, осум куршуми, пригушувач од пиштол, 14,2 мл хашиш смола, машина за вакумирање и две дигитални ваги.

Со цел расчистување на случајот, полицијата започнала со повикување на повеќе лица на службен разговор и извршила претреси на домови на повеќе локации во Скопје, кај лица кои се сомничат за можната инволвираност во случајот.

На 7 ноември 2024 година, при претрес во домот на О.А. во Скопје, полицијата пронашла марихуана, мобилен телефон и други предмети кои се поврзуваат со случајот.

О.А. бил лишен од слобода и вчера од страна на СВР Скопје поднесена е кривична пријава против него, по член 215 и 396 од Кривичниот законик.

Полицијата, исто така, открила дека уште едно лице, М.З. од Скопје, е поврзано со случајот и моментално е во бегство. Се преземаат мерки за негово пронаоѓање.

Полициски службеници од Единицата за интервентна полиција при СВР Скопје утринава, околу 02:45 часот, ги лишија од слобода двајцата осомничени Ј.Т. (19) и К.П. (19), двајцата од Скопје, поради основано сомнение за извршено кривично дело „разбојништво“.

Според информациите од Министерството за внатрешни работи, инцидентот се случил околу 02:30 часот, кога Ф.Ф. (22), скопјанец, пријавил дека бил нападнат од две лица во близина на Собранието во град Скопје. Осомничените, со закана од остар предмет, му одзеле пари.

По пријавата, полицијата веднаш презела брзи мерки за лоцирање и апсење на извршителите. За кратко време, Ј.Т. и К.П. биле приведени, а одземеното било пронајдено и ќе му биде вратено на оштетениот. Пронајден е и предметот со кој е извршено делото.

По документирањето на случајот, против осомничените ќе биде поднесена соодветна кривична пријава.

Основното јавно обвинителство Битола до надлежниот суд поднесе предлог за определување мерка притвор против 23-годишник осомничен за две кривични дела – Полов напад и силување од член 186 став 7 во врска со став 1 од Кривичниот законик.

Против него е поведена постапка, бидејќи во два одвоени настани, на 9 септември и на 7 ноември, полово нападнал две млади девојки и започнал да ги допира. Жртвите и во двата случаи успеале самите да го оттурнат и да се ослободат, по што осомничениот бегал од местото на нападот.

Бидејќи се работи за кривично дело против половата слобода и моралот и затоа што постојат околности кои укажуваат дека осомничениот би ги повторувал ваквите напади доколку остане на слобода, надлежниот јавен обвинител предложи определување притворска мерка, која од Судот е прифатена.