Свет
Иранската полиција за морал ги обновува патролите за носење шамии: „Жените што ќе се противат, ќе бидат казнети“
Иранската полиција за морал ќе продолжи со патролите за да ги натера жените да се придржуваат до строгите исламски правила за облекување, објавија државните медиуми во неделата, 10 месеци откако смртта на една млада жена во притвор предизвика протести во целата земја.
Саид Монтазералмахди, спикер на овој орган, рече дека полицијата повторно ќе почне со патролите со возила и пешаци во земјата од недела, објави државната новинска агенција „Фарс“.
„Службениците првин ќе ги предупредат жените што не ги почитуваат правилата, а оние што инсистираат да ги прекршат нормите, може да се соочат со правни мерки“, рече тој.
Полицијата за морал стана позната на меѓународната сцена во септември минатата година кога 22-годишната Махса Амини почина три дена по апсењето од страна на силите за неправилно носење на својот хиџаб и одведена во центар за превоспитување.
Нејзината смрт предизвика национални протести, кои ја потресоа земјата, претставувајќи една од најголемите домашни закани за владејачкиот свештенички режим во Иран во повеќе од една деценија.
Властите реагираа насилно за да го потиснат повеќемесечното движење за време на кое сведоците рекоа дека полицијата за морал практично исчезнала од улиците на Техеран.
Убиени се најмалку 582 лица од страна на режимот во Иран минатата година, што е зголемување од 75 отсто во однос на 2021 година, според групите за човекови права, кои велат дека порастот ги одразува напорите на Техеран да внесе страв меѓу демонстрантите против режимот.
Полицијата за морал има пристап до моќ, оружје и центри за притвор и контрола врз центрите за превоспитување, изјави за Си-ен-ен минатата година „Хјуман рајтс воч“. Групата е санкционирана од САД и од Европската Унија.
Центрите дејствуваат како установи за притвор, каде што жените, а понекогаш и мажите, се приведуваат затоа што не ги почитуваат државните правила за скромност.
Внатре во објектите на затворениците им се даваат часови за исламот и важноста на хиџабот и се принудени да потпишат ветување дека ќе ги почитуваат државните прописи за облека пред да бидат ослободени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
(Видео) „Црвената фурија“ фуриозно во 119. минута
Фудбалерите на Шпанија се пласираа во полуфиналето на Европското првенство откако во дерби натпреварот ја совлада Германија со 2:1.
Се играше брз и динамичен фудбал, без калкулации.
Имаше можности, многу картони, возбудувања и голови, а натпреварот беше решен во неизвесна завршница.
На крајот, Шпанија имаше повеќе среќа, но и повеќе вештина и по долг период на доминација на Германците и голем број на пропуштени шанси, успеа да го повтори успехот од претходното ЕП и да се пласира меѓу најдобрите четири селекции.
Избраниците на Луис де ла Фуенте славеа со голот на Мерино во 119. минута од натпреварот.
Претходно Олмо ги доведе Шпанците во водство, Германците потоа напаѓаа како ураган.
Имаа шанси, ја погодија стативата, а преку Вирц во 88. минута го постигнаа заслуженото израмнување.
И во продолжението Германците беа подобри, поблиску до голот, Вирц имаше уште една голема шанса, Фулкруг беше неверојатен.
Шпанците имаа проблем со него, но Шпанците имаа човек на одлука во Мерино.
На една минута пред крајот на продолжението, на асистенција на Олмо, Мерино го направи најдобриот скок, и го матираше Нојер – на голема жалост на Германците во Штутгарт.
Судијата Ентони Тејлор покажа дури 16 жолти и еден црвен картон.
Свет
Се менува името на аеродромот во Милано: неговото име ќе биде Силвио Берлускони
Главниот аеродром во Милано наскоро ќе биде преименуван по поранешниот италијански премиер и бизнис тајкун, Силвио Берлускони, соопшти денеска министерот за транспорт Матео Салвини.
Берлускони, кој почина минатата година на 86-годишна возраст, водеше четири влади на чело на неговата централно-десничарска партија Форца Италија. Тој без сомнение беше една од италијанските личности од модерната ера која предизвика огромни раздори.
Салвини на конференција во јужна Италија изјави дека властите за цивилна авијација го одобриле барањето на регионот Ломбардија да го преименува аеродромот Малпенса во чест на Берлускони, кој потекнува од финансискиот главен град на земјата.
„Со оглед на тоа што конечната одлука е на министерот за транспорт, навистина верувам дека ќе биде спроведена“, изјави Салвини, лидер на десничарската партија Лига и долгогодишен сојузник на Берлускони.
„Во спомен на мојот пријател Силвио, голем бизнисмен, голем миланец и голем Италијанец“, напиша Салвини подоцна на социјалната платформа Х над фотографијата од Берлускони и аеродромот Малпенса.
Свет
Агенцијата на СЗО: Талкот во прав е веројатно канцероген
Агенцијата за рак на Светската здравствена организација (СЗО) денеска оцени дека талкот во прав е „веројатно канцероген“ за луѓето, но независен експерт вели дека тоа не треба да се сфати како нешто што служи како дефинитивен доказ.
Одлуката се заснова на „ограничени докази“ дека талкот во прав може да влијае на развојот на рак на јајниците кај жените, „доволно докази“ дека е поврзан со развој на рак кај стаорци и „силни механички докази“ дека постојат знаци на канцерогеност кај луѓето, објави Меѓународната агенција за истражување на ракот на СЗО (IARC) со седиште во Лион.
Талкот е природен минерал кој често се користи за правење бебешка пудра. Повеќето луѓе се изложени на талк во форма на бебешка пудра или козметика, се вели во соопштението на IARC.
Но, најголемата изложеност на талкот има во моментот кога се вади, преработува или се користи за правење други производи, се наведува во соопштението.
Можно е талкот во студиите да бил контаминиран
Треба да се напомене дека талкот е природен минерал кој се состои од магнезиум, силициум, калциум и кислород, а се карактеризира со благ земјен мирис. Не се раствора во вода, алкохоли или масла, што му дава посебни карактеристики и широка примена во козметиката.
Агенцијата во соопштението наведува дека постојат бројни студии кои постојано укажуваат на зголемена стапка на рак на јајниците кај жени кои користат или користеле талк во прав на гениталиите.
Во исто време, публикацијата не ја исклучува можноста дека талкот во некои студии бил контаминиран со азбест, кој е директна причина за рак.
Независен експерт: Ова не е убедлив доказ
Кевин Меконвеј, статистичар од британскиот Отворен универзитет, кој не бил вклучен во истражувањето, предупреди дека во случајот на проценката на IARC, „најочигледното толкување е всушност погрешно“. Тој посочува дека „целта на Агенцијата е да одговори на прашањето дали некоја супстанца има потенцијал да предизвика рак под услови кои не се специфицирани или специфицирани од IARC“.
Со оглед на тоа што спроведените студии беа набљудувачки, поради што не можеа да докажат причинско-последична врска, презентираните податоци не треба да се сфатат како нешто што може да послужи како дефинитивен доказ.
Најавата доаѓа само неколку недели откако американскиот фармацевтски и козметички гигант Џонсон и Џонсон се согласи да плати 700 милиони долари за конечно да ги решат обвинувањата дека ги заведувал клиентите за безбедноста на производите на компанијата базирани на талк.
Компанијата Џонсон и Џонсон не призна злоупотреба, иако го повлече производот од северноамериканскиот пазар во 2020 година.
Според резимето на студијата објавено во 2020 година, а студиите опфатиле 250.000 жени од Соединетите Држави, не била воспоставена статистичка врска помеѓу употребата на талк во прав на гениталиите на жените и ризикот од развој на рак на јајниците.
Ново предупредување од IARC: Акрилонитрилот е хемиско соединение кое е канцерогено за луѓето
Во петокот, IARC го класифицираше хемиското соединение акрилонитрил, кое се користи за производство на полимери, како „канцерогени за луѓето“ – највисокото ниво на предупредување на агенцијата.
Има „доволно докази“ кои го поврзуваат акрилонитрилот со развојот на рак на белите дробови.
Полимерите составени од акрилонитрил се користат за правење разни предмети – од влакна во облеката до теписи, пластика и други производи за широка потрошувачка.